لاس رسیدونکی لینک

تازه خبر

پاکستان

 فاټا د پښتونخوا سره د یو ځای کولو قانون پارلېمان ته وړاندې نه شو

ټاکل شوې وه چې نن به د پاکستان په پارلیمان کې په ایئن کې د دیرشم بدلون منظور کیدلو سره د فاټا اصلاحات عملي کیږي خو فاټا د پښتونخوا سره د یو ځای کولو قانون پارلېمان ته وړاندې نه شو.

که چري پارلیمان په ایئن کې د دېرشم بدلون منظوري ورکړی وی نو قبايلي سیمه فاټا به په پښتونخوا صوبه کې ورگډه شوی وی. په دې قانون د بحث منظوري د پاکستان وفاقي کابېنې تېره ورځ ورکړې وه.

وي او ای ډیوه ته د نوم نه ښودلو په شرط د پارلېمان یوه غړي وویل په دې قانون به وس بحث درې ورځې ورستو د مۍ په ٢١ مه نیټه کېږي. د پارلېمان څخه د منظورۍ ورستو به دا قانون سېنټ ته او بیا دهېواد صدر ته دستخط لپاره لېږل کیږي.

خو دا لومړی ځل نه دی چې په پارلیمان کې په فاټا د ائیني بدلون په سر بحث ځنډول شوی وي، وړاندې هم څو ځله داسې شوي دي. ډیوه ته د خبرو په وخت د پارلېمان غړي وویل چې نن په بجټ بحث وغزیدلو او په فاټا د خبرو موقع ضایع شوه.

د وسني حکومت د اسمبلۍ نیټه د مۍ په ٣١ مه پوره کیږي. که چري د ٣١ مۍ څخه د مخه پارلېمان دغه منظوري ور نه کړله نو بیا به دا منظوري بل نوی ټاکل شوی پارلېمان ورکوي. معنا دا شوه چې په هېواد کې د کال ٢٠١٨ ممکنه انتخاباتو کې به د فاټا نمایندگي نه وي.

د دیرشم بدلون په تیار کړې شوي قانون کې د پښتون خوا صوبې د اسمبلۍ د څوکو شمېر ١۴٧ ښودل شوی دی وړاندې دا شمېر ١٢٦ وو. دغه شان د فاټا د قامي اسمبلۍ ١٢ څوکۍ به هم د صوبې سره یوځای شي او د پښتونخوا څخه به په قامي اسمبلۍ کې ټولې څوکۍ د ۴٨ په ځای ٦٠ شي.

فاټا ته د هېواد ایئن غزولو لپاره د تېرو څو کالو راهسې د سیمې پارلېماني غړي او عامه ټولنه کوښښونه کوي. وسني حکومت فاټا ته د هېواد د عدالتي نظام ورغزولو او هلته د روان کال د اکتوبر په میاشت کې د بلدیاتي انتخاباتو اعلان څو میاشتې وړاندې کړی دی خو تر اوسه ددغه پرېکړې سرکاري اعلان (گزټیټیډ نوټیفیکېشن) نه دی جاري کړی شوی.

د پاکستان د وسني واکمن گوند مسلم لیگ نون په گډون د حکومت مخالف گوندونه تحریک انصاف، پاکستان پیپلز گوند او گڼ شمېر نور د فاټا په پښتون خوا صوبه کې د ورگډولو ملگرتیا کوي. د هیواد د پوځ مشر جنرل قمر جاوید هم ويلي دي په فاټا کې ايئني بدلون وکړې شي. دوه گوندونه پښتنونخوا ملي عوامي گوند او جمعیت علما اسلام فاټا په پښتونخوا کې د ورگډولو مخالفت کوي او وايي په فاټا کې د څه قسمه بدلون څخه د مخه هلته د خلکو رای اخستل ضروري دي

په فاټا کې د میلینو خلقو سره لکه د نور پاکستان په رنگه بنیادي انساني حقونه نشته دی. هلته د١٩٠١ راهسې دایف سي ار تور قانون دی د څه په وجه چې هلته د اولس سره د اپيل وکيل او دليل حق نشته دی

د فاټا اولس ته لکه د گلگت بلتستان او پاکستان دواک لاندې کشمیر د خلقو په رنگه د صوبايي اسمبلیو یا شوراگانو کې د ووټ په لاره د نمایندگانو ټاکلو اختیار هم نه دی ورکړی شوی.

See all News Updates of the Day

د عمران خان ضد د عدت مقدمه کې فېصله نه ده اورول شوې، هايکورټ ته لېږل شوې

د پاکستان تحريک انصاف ګوند مشر او پخواني وزيراعظم عمران خان ضد د عدت په مقدمه کې د اورول شوو سزاګانو خلاف اپيلونو باندې فېصله نن نه ده ‏اورول شوې، او قضيه هايکورټ ته لېږل شوې ده.‏

د رپورټونو ترمخه، د اسلام اباد سېشن جج شاه رخ ارجمند به نن د عدت په قضيه کې د عمران خان او بشرا بي بي د سزاګانو ضد اپيلونو باندې فېصله ‏اوروله.‏

د پي ټي آی ګوند مشر بېرسټر ګوهر تور لګولی، چې د فېصلې نه اورول کېدو دپاره په جج فشار اچول شوی دی.‏

له دې وړاندې ويل شوي، د اورېدنې په وخت د بشرا بي بي پخواني مېړه خاور مانيکا په جج شارخ ارجمند باندې د باور د نشتوالي څرګندونه کړې او په ‏عدالت کې د عمران خان د پلوي وکيلانو او خاور مانيکا ترمنځ خبرې اړول شوي او عدالت کې دننه ګډوډی او شور شوی دی، له دغې وروسته بيا جج د ‏فېصلې اورولو بغېر د عدالت څخه پاڅېدلی وو.‏

ورووسته نوموړي جج هايکورټ ته خط ليکلی او ویلي يې دي، اعتراضونه پرې کيږي ځکه هغه فېصله اورول مناسب نه ګڼي.‏

د روان کال فرورۍ په درېمه عمران خان او د هغه مېرمنې بشرا بي بي ته عدالت د عدت دوران کې د نکاح کولو په جرم کې د 7، 7 کالو د بند سزا اورولې ‏وه، ‏بيا د دغو سزاګانو پرضد خواستونه شوي وو.‏

سيشن جج شارخ ارجمند هايکورټ ته په ليکلي خط کې ويلي، خاور مانيکا پرې په خلاص عدالت کې د بې باورۍ اظهار کړی دی، او زياته کړې یې ده، ‏شکايت کوونکي او وکیل یې تل څه نا څه بهانه جوړه کړې او د اورېدنې وروسته کولو هڅه یې کړې ده.‏

بېرسټر ګوهر د عدالت نه بهر مطبوعاتو سره خبرو کې ويلي، نن سهار د قضيې فېصله اورول وو، خو په عدالت کې سرکاري وکيل نه وو او خاور مانيکا د ‏عدالت ضد ناوړه توري کارولي دي.‏

د خاور مانیکا لخوا په دغه اړه کوم بيان مخې ته نه دی راغلی.‏

د بشرا بي بي پخواني مېړه خاور مانيکا د تېر کال نومبر په میاشت کې د اسلام اباد د سېول جج قدرت الله عدالت ته خواست کړی وو چې د عمران خان او ‏بشرا بي ‏بي نکاح د عدت وخت پوره کېدو نه مخکې شوی وو او په دواړو یې د ناجايزه تعلقاتو تور لګولی وو.‏

د عدت په وخت نکاح قضيه کې د سزاګانو د فېصلې اورول کېدو وروسته د فرورۍ په میاشت کې عمران خان ویلي وو، په ده باندې په عدت کې د نکاح ‏کولو قضیه د ده د سپکاوي یا ذلیله کولو لپاره جوړه کړل شوې ده او په دې مقدمه کې په بشپړ ډول هڅه شوې ده چې دی ذلیله کړل شي.‏

عدت څه ته وايي؟

قانون پوهان وايي، عدت دوه ډوله وي، "يو عدت د ښځې او خاوند د طلاق او خلعې نه وروسته وي، بل عدت د ښځې د خاوند د مړينې وروسته وي، د دې ‏خپله خپله موده ټاکل شوې ده".‏

د قانون پوهانو په خبره، د پاکستان د عايلي يا کورنيو معاملاتو د قانون ترمخه، "د خاوند د مړینې نه وروسته د عدت موده څلور میاشتې او لس ورځې ده ‏او د طلاق او خلعې په صورت کې د عدت وخت درې میاشتې يا 90 ورځې دی"، او "د دواړو ډوله عدت په وخت کې ښځه د هیچا سره د نکاح په صورت کې ‏راشه درشه نه شي کولی دا قانوني او شرعي دواړه حکمونه دي".‏

قانون پوهان وايي، "د عايلي قوانينو د 90 ورځو پوره کېدو وروسته چې طلاق ډګري يا پوخ وشي هغه بيا متعلقه يونين کونسل ته د تاييد دپاره ولېږل شي ‏او د هلته نه یې تاييد کيږي، او د عدت 90 ورځو کې نکاح ځکه نه شي کېدی وجه یې د ښځې او د هغې د نسل سره جوړيږي".‏

پوهان وايي په دې کې د وراثت مسله راځي، "د درېو میاشتو نه پس که ښځه واده وکړي يا څلورو میاشتو او لسو ورځو نه وروسته کوم ماشوم زيږوي، نو ‏هغه به معلوم وي چې هغه د کوم خاوند نه وو ځکه دغه کار ته د قانوني بڼې ورکولو دپاره د عدت وخت ټاکل شوی دی د وراثت مسله پکې راځي".‏

د بلوچستان په واشک کې مسافر بس کندې ته لوېدلی، 28 تنه پکې مړ‎ہ 20 ټپیان شوي

د بلوچستان ایالت په واشک سیمه کې یو مسافر بس د تېزرفتارۍ له کبله یوې ژورې کندې ته لوېدلی دی او په پېښه کې د ښځو او ماشومانو په ګډون 28 تنه مړ‎ہ شوي او 24 تنه ټپيان شوي دي.

د بسیمې د لیویز چاراکو په وینا د چهارشنبې- شورو په سهار وختي شاوخوا پینځه بجې د ضلع واشک په بسیمه تحصیل کلغلي غرنۍ سیمه کې دا پېښه شوې ده.

د بسیمه لیویز چارواکي محمد نور وي او اې ډیوہ ته د ټیليفون له لارې وویل، مسافر بس د شپې له تربته را وتلی او د بلوچستان ایالت سر ښار کوټې ته روان وو چې د زیات رفتار له کبله پېښه بې قابو شوی دی:

“د بس ټایر وتلی، له دې سرہ سم بس اول له غرہ سرہ ټکر شوی او وروسته لاندې کندې ته لوېدلی، په بس کې تر پینځوست زیات نارینه او ښځینه مسافر سوارہ وو”۔

د چارواکو په وینا د سخت ټکر له کبله په بس کې بند/نښتي مسافر د کرېن په واسطه را ایستل شوي ځکه ھم د مرستو په کار کې زیات وخت لګیدلی۔

د پېښې مړ‎ي او ټپیان د سیمې سرکاري روغتون ته وړ‎ل شوي دي. پولیس وایي شپږ کسان د پېښې په ځای کې مړه شوي وو او د ډېرو ټپیانو حالت مرګونی وو او په روغتون کې یې ساه ورکړه.

د بسيمې روغتون مشر ډاکټر نورالله رسنیو ته ویلي، ”27 مړي او 24 ټپيان د بسيمې دولتي روغتون ته راوړ‎‎ل شوي دي، د شپږ‎ ټپیانو حالت مرګونی دی، په مړ‎و کې درې ښځې او يو ماشوم ھم دی، په ټپيانو کې ھم ښځې او ماشومان شامله دي”۔

د بلوچستان وزیر اعلا میر سرفراز بګټي پر پېښه خفګان ښکارہ کړ‎ی او د ټپیانو د ښه علاج کولو امر یې کړ‎ی دی.

په بلوچستان کې له تېرو څو کلونو راهیسې پر لویو لارو مسافربسونه او نور د مسافرو ګاډي کله د تېزرفتارۍ او کله د ټکر کېدو له پېښو سره مخ کیږي چې په نتیجه کې یې په سلګونو کسان مړه شوي او ټپیان شوي دي.

شهباز شریف: پاکستان کې به د چین وګړو ته بشپړ امینت ورکوؤ

وزیراعظم شهباز شریف ویلي په پاکستان کې میشت د چین وګړو ته به بشپړه امنیت ورکول کیږي اؤ په دې لړ کې یو هر اړخیزه امنیتي پلان هم جوړ کړل شوی دی.

د نهې په ورځ د چین لخوا پاکستان کې د سرمایه ګزارۍ اؤ د چیني وګړو د امنیت په اړه د اوچتې پایې د یوې غونډې د مشرۍ کولو په مهال وزیراعظم شهباز شریف ویلي، حکومت یې د سي پیک د راتلونکي پړاؤ په اړه کوټلې تیارۍ نیسي اؤ د چین په مرسته به د ګوادر بندرګاه د نقل و حمل یا لاجسټکس مرکز جوړولی شي.

پاکستاني رسنۍ وایي چې په دې غونډه کې د بیلابیلو وزارتونو له لوري د پاکستان اؤ چین د اقتصادي اړیکو په اړه وړاندیزونه هم ورکړل شوي دي.

ښاغلي شهباز شریف غونډې ته ویلي پاکستان له چین سره د زراعت، آي ټي اؤ توانایۍ په څانګو کې خپلو مرستو پراخولو ته لیواله دی.

هغه وویل چین د پاکستان په معاشي پرمختیا کې یو مهم انډیوال دی اؤ مونږ د چین صنعتونو په ځانګړي ډول د کپړو صنعت ته پاکستان کې د کارخانو جوړولو بلنه ورکوؤ.

د وزیراعظم وینا وه چې که چینایي صنعت کاران اؤ سرمایه کاران په پاکستان کې سرمایه ګزارۍ ته راوړاندې شي نو پاکستان به ورته کوټلی امنیت اؤ هر ډول اساني ورکوي .

دا په داسې حال کې ده چې په دې وروستیو کې د پاکستان دننه په چینایي وګړو یو شمیر ترهګریز اؤ ځانمرګي بریدونه شوي چې پکې د چین وګړو ته درنه مرګ ژوبله اوښتې ده.

تر دغو خونړیو بریدونو وروسته روانه میاشت د کورنیو چارو د وزیر محسن نفوي په مشرۍ شوې یوه غونډه کې د چینایي وګړو د امنیت لپاره چیلاس کې د سیف سټي یا خوندي ښار د پروژې پېلولو پرېکړه شوې وه.

د روانې میاشتې په پیل کې د کورنیو چارو وزیر محسن نقوي په کراچۍ کې د چين کونسلګرۍ ته ورغلی ؤ او ويلي یې وؤ چې "د چينايي وګړو امنيت ورته ډېر ګران دی، د ‏چينايانو د تګ راتګ دپاره جوړ پلان باندې عمل کولی شي او د چينايي وګړو خونديتوب زمونږ فرض دی"

په پاکستان کې د چین په وګړو وروستی برید په 26م مارچ د خېبر پښتونخوا د شانګلې ضلعې په بشام سیمه کې شوی ؤ .

دغلته داسو ته روانه د چیني انجنیرانو په قافله یو ځانمرګي برید شوی و چې پکې پینځه د چین ‏انجنیران او د هغوي یو پاکستانی ډرایور وژل شوي وو.‏

تر دغه برید وروسته چین پاکستان کې د خپلو وګړو په تحفظ ژورې اندېښنې ښکاره کړې وې اؤ د پاکستان له حکومت یې غوښتنه کړې وه چې د چین د وګړو تحفظ باید باوري کړي.

په شمالي وزیرستان کې نا معلومو کسانو د جینکو سکول سوځولی

امنیتي سرچینې وایي، له افغانستان سره په پوله پرته د خېبر پښتونخوا قبایلي ضلعه شمالي وزیرستان کې نامعلومه کسانو د جینکو یو هایي سکول ته اور لګولی اؤ دغه سکول یې په بشپړ ډول سوځولی دی.

دا په روانه میاشت کې په شمالي اؤ جنوبي وزیرستان کې د جینکو په سکولونو دریم برید دی چې پکې ددغو سکولونو ودانیو ته زیان رسول شوی دی.

څېړونکي وایي، د یو پلان له مخې د پښتنو ماشومان او په ځانګړي ډول جینکۍ د تعلیم نه لرې ساتل کیږي تر څو چې پښتانه هم داسې په تیاره کې پاتې شي او په سیمه کې یې د جنګ دا پالیسۍ دوام ومومي.

د سیمې نه امنیتي سرچینو وي او ای ډیوه ته ویلي تېره شپه ناوخته د شمالي وزیرستان په رزمک سب ډویژن کې نامعلومه کسانو د جینکو د هایي سکول ودانۍ ته اور لګولی دی چې په دې پېښه کې دغه وداني په مکمل ډول سوځېدلې ده.

پولیس سرچېنې وایي سکول ته د اور لګولو پېښه کې ددغه سکول کمپیوټرې، فرنیچر، تعلیمي اسناد اؤ نور سامانونه ایره شوې دي.

د یاد سکول د انتظامیې وینا ده چې تر دې وړاندې د مارچ په میاشت کې هم وسله والو په دغه سکول ډزې کړې وې چې له امله یې د یاد سکول سولر سیسټم ته زیان رسېدلی ؤ.

د پولیس سرچینو له مخې په یاد سکول کې تر 400 زیاتې جینکۍ زده کړې ترلاسه کوي .

پولیس وایي د پېښې په اړه یې پلټنې پیل کړي اؤ هڅه کوي چې د تعلیم هغه دښمنان معلوم اؤ د قانون منګولو ته یې راکش کړي چې جینکۍ د تعلیم نه لرې ساتل غواړي.

تر دې وړاندې د روانې میاشتې په 17مه نېټه په پیوست قبایلي سیمه جنوبي وزیرستان کې هم د واوا نومې یو غیر دولتي سازمان په مرسته فعالې د جینکو د زده کړو په یوه اکاډمۍ وسله والو برید کړی ؤ اؤ وداني یې ورله په بمونو الوځولې وه.

همدا شان تر دغه پېښې یوه اوونۍ وړاندې په شمالي وزیرستان کې د جینکو يو شخصي پرايمري يا د ابتدايي زده کړو سکول هم په بمي چاودنو الوځول شوی و.

تر اوسه هیڅ یوې وسله والې ډلې د جینکو په سکولونو د شوؤ دې بریدونو ذمه واري پغاړه نه ده اخستې.

تر دغو پېښو وروسته څېړونکي اؤ د عوامي نېشنل ګوند یو ځايي مشر اياز وزير د وي او ای ډیوه خبریال عدنان بیټني ته ویلي وؤ چې د یو پلان له مخې د پښتنو ماشومان او په ځانګړي ډول جینکۍ د تعلیم نه لرې ساتل کیږي تر څو چې دا خلک هم دغسې په تیاره کې پاتې شي او دغلته د جنګ دا پالیسۍ دوام داره وي .

هغه ویلي وؤ علاقه یې د اوږدې مودې نه د ناکرارۍ ښکار ده اوس دغه سیمې چې په صوبه کې شامل کړل شوي په سیمه کې د سولې او امنیت ټینګښت د حکومت په غاړه دی.

د ایاز وزیر په وینا، که په دغه پېښه کې ککړ کسان مالوم نه شول په سیمه کې به د زده کړو چارې نورې هم اغېزمنې شي.

د جینکو په سکولونو ترسره شوي دا بریدونه په ملکي او نړیواله کچه غندل شوي اؤ اندېښنه یې ښودلې چې داسې د نفرت ډک عملونه د جینکو راتلونکی له خطر سره مخ کولی شي.

د ملګرو ملتونو د ماشومانو د تحفظ ادارې (یونېسف) د شمالي وزیرستان په شیوا تحصیل کې د جېنکو په سکول باندې له حملې وروسته ویلي وؤ چې دغه "قابل نفرت او بزدلانه عمل" د ګڼ شمېر تکړه جېنکو آینده خطرې سره مخامخ کوي.

په وزیرستان کې د جینکو په سکولونو بریدونه بیا په داسې حال کې چټک شوي چې ورسره په پوله افغانستان کې د طالبانو لخوا په اګست کال ۲۰۱۲م کې په اقتدار له قبضې کولو وروسته دغه هیواد کې تر شپږم ټولګي پورته د جینکو په زده کړو بندیزونه لګول شوي دي.

نوازشریف د پاکستان مسلم لیګ (ن) صدر منتخب شو

نوازشریف په کال ۲۰۱۹ کې د عمران خان د وزیراعظمۍ په مهال د علاج په غرض لندن ته تللی و او د تېر کال د اکتوبر په میاشت کې د خودساخته جلاوطنۍ نه ملک ته ستن شو
نوازشریف په کال ۲۰۱۹ کې د عمران خان د وزیراعظمۍ په مهال د علاج په غرض لندن ته تللی و او د تېر کال د اکتوبر په میاشت کې د خودساخته جلاوطنۍ نه ملک ته ستن شو

د پاکستان پخوانی وزیراعظم نوازشریف د نهې، سه شنبې، په ورځ د هېواد د واکمن پاکستان مسلم لیګ (ن) پارټۍ بیا صدر منتخب شو.

نوازشریف په کال ۲۰۱۷ کې د بد عنوانۍ د الزاماتو وروسته د مسلم لیګ (ن) د صدارت نه لرې کړی شوی و.

مسلم لیګ (ن) د سږ کال د فېبرورۍ په میاشت کې د عامو انتخاباتو په نتیجه کې اقتدار ترلاسه کړی دی.

د پخواني وزیراعظم عمران خان پاکستان تحریک انصاف پارټي الزام لګوي چې په عامو انتخاباتو کې په پراخه کچه درغلي شوې ده خو پاکستاني چارواکي او پوځ دا خبره ردوي.

نوازشریف د پارلېمنټ غړی دی او کشر ورور شهبازشریف يې د مخلوط حکومت مشر او وزیراعظم دی.

په کال ۲۰۱۷ کې د پاکستان سپریم کورټ نوازشریف د مالي اثاثو خفیه ساتلو په الزام د هر ډول عوامي عهدې دپاره نااهله وټاکلو. هغه دا الزام ردوي.

تېرکال د نوازشریف سزا مسترد کړی شوه او هغه د عوامي عهدې او د مسلم لیګ (ن) د صدارت دپاره بیا اهلیت ترلاسه کړو.

نوازشریف په کال ۲۰۱۹ کې د عمران خان د وزیراعظمۍ په مهال د علاج په غرض لندن ته تللی و او د تېر کال د اکتوبر په میاشت کې د خودساخته جلاوطنۍ نه ملک ته ستن شو.

عمران خان په ۲۰۰۲ کې د عدم اعتماد د ووټ دلارې د حکومت نه لرې کړی شو او دا مهال په مختلفو الزاماتو په زندان کې بند دی.

نور کتل

ځانګړې ویډیوګانې

د ایکنا کنوینشن کې سږ کال له ۳۰،۰۰۰ هم ډیرو کسانو ګډون درلود
please wait

No media source currently available

0:00 0:03:09 0:00

بي بي شیرینه

بي بي شیرینه: په ټیلې ویژن
please wait

No media source currently available

0:00 1:59:58 0:00
XS
SM
MD
LG