لاس رسیدونکی لینک

Breaking News

کرونا وایرس: د لومړي امریکايي په شمول چین کې د مړو شمیره ۷۲۲ ته ورسیدله


د چین ووهان ښار نه خور شوي کرونا وایرس د لاسه د مړو شوو تنانو شمیره نن د خالي یا شنبې په ورځ د ۷۰۰ نه سېوا شوې او په بیجنګ کې د امریکا سفارت پخلی کړی په ووهان کې ژوند کونکی یو امریکايي هم ژوند د لاسه ورکړی.

د امریکايي سفارت تر مخه ۶۰ کلن امریکايي د زیارت یا پنجشنبې په ورځ په ووهان کې مړ شوی. د یو بل خبر تر مخه په ووهان کې اوسیدونکی یو جاپانی هم مړی شوی. خو د دغې خبر لا پخلی نه دی شوی.

د کرونا وایرس د لاسه په چین کې د مړو شوو تنانو شمیره د خالي یا شنبې په ورځ ۷۲۲ ته رسیدلی او یواځې په چین کې ۳۴۵۴۶ کسانو ته وایرس لږیدلی.

د چین نه علاوه د نړۍ په ۲۳ هیوادونو کې د کرونا ۱۵۰ کیسونو پخلی شوی دی. د چین نه علاوه په فلپاېن او هانګ کانګ کې هم د کرونا د لاسه یو یو تن ژوند د لاسه ورکړی.

هم د خالي په ورځ د جاپان په ساحل د سیلګرو هغه سمندري بیړۍ کې په دریو نور کسانو کې د کرونا وایرس پخلی شوی دی. په دغه سمندري کشتې کې ۳۷۰۰ مسافر سواره دي او دغه ټول خلک د ۱۴ ورځو لپاره قرنطین شوي دي.

په چین کې د کرونا وایرس د لاسه د مړو شوو او متاثره شوو تنانو شمیره په داسې مهال سېوا شوې چې د شنبې په ورځ امریکا ویلي د کرونا وایرس د مخنیوي لپاره یې چین او نورو اغیزمندو هیوادونو ته د ۱۰۰ میلینه ډالرو د مرستو وړاندیز کړی.

د امریکا لخوا د مرستو دغه اعلان د امریکا د خارجه چارو سیکتر ماېک پمپیو تیره ورځ کړی. نوموړي ویلي ٫٫ دغه ژمنه او اعلان او ورسره د امریکا د شخصي څانګو یا برخو لخوا د سوونو میلینه ډالرو امداد ښايي چې په نړۍ کې د وبا مخه نیولو کې امریکا د مشرۍ رول ترسره کوي.٬٬

هم تیره ورځ د امریکا صدر ډانلډ ټرمپ د چین صدر شي جنګ پنګ ستایلی وو چې د کرونا وایرس مخنیوي لپاره یې ښه ګامونه پورته کړي.

په چین کې د هغه ډاکټر چا چې په لومړي ځل د دسمبر په میاشت کې د کرونا وایرس د خپرویدو خبره کړې وه. د هغه د مرګ وروسته په چین کې په حکومت سختې نیوکې روانې دي.

تیره ورځ (جمعه – فروري ۷مه) د چین صدر شی جن پنګ خپل امریکایي سیال ډانلډ ترمپ سره په ټیلي فون خبرو اترو کې د کرونا وایرس ختمولو په اړه دچین لخوا داخستل شوؤ ګامونو نه خبر کړی دی.

XS
SM
MD
LG