د افغانستان صدر اشرف غني یو وارې بیا په ولس غږ کړی چې په طالبانو دې فشار زیات کړي چې سولي ته اماده شي.
د اتوار، یکشنبې، په ورځ د پکتیا ولایت مرکز گردیز کې اشرف غني د امنیتي چارواکو، د قومي مشرانو او د یني علماو په غونډه کې غوښتنه وکړه چې ولس دې د سولې په بهیر فشار راوړي.
افغان صدر وویل "پس له دې نه چې هرڅوک وینه تویوي، د خدای مخالفت کوي، د ولس مخالفت کوي اوله تاسوهریو نه غواړوم چې ولسي فشار پرسوله راوړئ."
افغان صدر د دې نه وړاندې هم په هېواد کې د امن او طالبانو ته د سولې د وړاندیز په لړ کې د ولسي فشار خبره کړې ده.
آیا افغان صدر په طالبانو د ولسي فشار مثال په پښتون ژغورنې غورځنگ کې ویني؟
څېړونکي گڼي چې د پښتون ژغورنې غورځنگ د پاکستان د پښتنو په سیمو کې د تېرې لسېزې نه د زیات وخت حالاتو زیږولی دی. د تندروۍ، تشدد، ناامنۍ او د بې کورۍ دغه حالاتو د پښتنو د ژوند هر اړخ متاثر کړی دی.
د وسله والو خلاف د پاکستان جنگ زیاتره د پښتنو او په خصوصي توگه په قبایلي سیمو کې کولی شي. د دې دلاسه په لکونو پښتانه بې کوره شوي، کورونه، پولې پټې، روزگار او اقتصاد یې زیانمن شوی، ټولنیزه اډاڼه یې تباه شوي او په پاکستان کې پښتنو ته د بل هرقام نه زیاته مرگ ژوبله ور اوړیدلې ده.
د پاکستان د سرحد، ډیورنډ کرښې، پورې غاړه په افغانستان کې هم زیاته ناامني او جنگونه د پښتنو په سیمو کې دي. د طالبانو زیات فعالیتونه د افغانستان په جنوبي او ختیځو برخو کې لیدل کیږي چې مثالونه یې لکه د ننگرهار، هلمند، کندهار، زابل او غزني په رنگ ولایتونو کې لیدل کیږي.
څیړونکی خادم حسین د پاکستان د انگریزۍ ژبې ورځپاڼې ایکسپریس ټرېبیون کې لیکي چې د پښتون ژغورنې غورځنگ د راپورته کیدو دوه بنیادي وجې دي، یوه وجه د پښتنو اجتماعي "درد" او بل د ریاست هغه بیانیه ده چې تیرو څو لسیزو راهېسې يې "پرتشدد تندورۍ او د جنگ اقتصاد" ته وده ورکړې ده.
د پي ټي ایم په بنیادي غوښتنو کې په قبایلي سیمو کې د امنیتي ځواکونو د چېک پوسټونو لرې کول، د قبایلي ولس دپاره د "وطن کارډ" نومې د شناخت ځانگړی ثبوت ختمول او د بې درکه کسانو لټون شامل وو.
د تحریک مشر منظور پشتین د اتوار، یکشنبې، په ورځ د وی او ای ډیوه سره مرکه کې وویل د تحریک د لاریونونو او غوښتنو په ترڅ کې ځینې امنیتي چېک پوسټونه ختم کړی شوي دي، په زیاتره قبایلي سیمو کې د وطن کارډ شرط ختم کړی شوی دی او تر ٢٥٠ پورې بې درکه کسان، چې گمان کیدو د پاکستاني امنیتي ادارو په ولکه کې وو، کورونو ته ستانه شوي دي.
څېړونکې وايي پي ټي ایم تر دا وخت پرامنه تحریک پاتې شوی دی او ښاغلی پشتین وايي دوی د پاکستان د پوځ، آئین او د حکومت مخالف نه دي خو د پښتنو د قانوني حقونو دپاره پورته کړی خپل غږ به نه خاموشه کوي.
آیا افغان صدر هم غواړي چې څه رنگ د پښتون ژغورنې غورځنگ د پاکستاني ادارو د چلند په اړه خپل اواز پورته کړی دی، افغانان دې هم دغه رنگ غږ د طالبانو لړ کې پورته کړي چې سولې ته غاړه کېږدي؟
