حماس وايي یوه یرغمل شوې ښځه د اسرایل په برید کې وژل شوې ده

د حماس ډلې پوځي څانګې د شنبې- خالي په ورځ وویل یوه یرغمل شوې اسرایلۍ ښځه د غزې پټۍ په شمال کې د نښتو پر مهال د اسرایلي ځواکونو په برید کې وژل شوې ده.

د حماس ډلې د عزالدین القسام د څانګې ویاند ابو عبیده وویل، له څو اوونیو وروسته بریالي شول چې د یرغمل شوې ښځې له ساتونکو سره بېرته اړیکه ونیسي.

د هغه په وینا د اړیکې له نیولو وروسته معلومه شوه چې یرغمل شوې ښځه د غزې د شمال په هغه سیمه کې وژل شوې چې د اسرایل پوځ پکې عملیات کول.

د اسرایل پوځ ویلي چې د حماس د ډلې د دې دعوې په تړاو پلټنې کوي.

د اسرایل دفاعي ځواک پر خپل ایکس لیکلي، پرون ماښام حماس “ترهګر تنظیم” هغه ویډیو خپره کړه چې دعوه کیږي یوه یرغمل ښودل شوې وژل شوې ده:

“موږ پلټنه کوږ او په دې مرحله کې موږ نه شو کولای دا تایید یا رد کړو. د ای ډي ایف استازي د هغې له کورنۍ سره په تماس کې دي او ټول تازه معلومات ورسره شریکوي”.

ابو عبیده د یرغمل شوې ښځې شناخت نه دی څرګند کړی او د هغې د وژل کېدو د څرنګوالي او کره وخت په اړه یې څه نه دي ویلي.

د تېر کال د اکتوبر په اومه پر اسرایل باندې د حماس په برید کې 1،200 کسان ووژل شول او د دغې ډلې وسلوالو شاوخوا 250 کسان یرغمل کړل.

په دغو یرغمل شویو کې 97 کسان لا هم په غزه کې له حماس ډلې سره یرغمل دي او د 34 کسانو وژل تایید شوی دی.

د حماس له دغه برید وروسته اسرایل پر غزې باندې د غچ اخیستلو بریدونه پیل کړل.

د حماس تر کنترول لاندې په غزه کې د روغتیا چارواکي وايي د اسرایل په بریدونو کې تر اوسه له 43،850 زیات کسان وژل شوي، چې وایي اکثریت یې ولسی خلک دي.

یادونه: د رپوټ ډېر معلومات له اې ایف پي خبري ایجنسۍ اخیستل شوي دي.