د هېواد د وزیراعظم مستعفي کېدو نه یوه ورځ وروسته په سري لنکا کې د نهې، سه شنبې، په ورځ د ګرځبندیز باوجود په سلګونو کسانو د حکومت په ضد مظاهرې وکړې.
د سري لنکا وزیراعظم ماهېندا راجاپکسی د ګل، دوشنبې، په ورځ د خپلې چوکۍ نه په داسې حال کې استعفا ورکړه چې د ای اېف پي خبري ادارې ترمخه د هغه د پلویانو او مخالفینو په جګړه کې لږ تر لږه درې کسان مړه شول او د 150 نه زیات زخمیان شول.
د اېسوسي اېټېډ پرېس خبري ادارې ترمخه د نهې، سه شنبې، په ورځ احتجاج کوونکي دې سري لنکا سرښار کولمبو کې د صدر ګوتابیا راجاپکسی د دفتر مخې ته جمع شوي وو او غوښتنه یې کوله چې صدر دې د خپل ورور په شان مستعفي شي.
د رپورټ ترمخه د تېرو څو هفتو راهسې د صدر د دفتر مخې ته په زرګونو کسان مظاهرې کوي خو د ګرځبندیز او د سختو امنیتي اقداماتو له امله د نهې، سه شنبې، په ورځ د مظاهره چیانو شمېره سلګونو کسانو ته راکمه شوي وه.
د ای پي رپورټ وايي مخالفین د سري لنکا صدر ګوتابیا راجاپکسی او د هغه ورور مستعفي وزیراعظم ماهېندا راجاپکسی د هېواد د اقتصادي مسلو ذمه وار بولي. د حکومتي اعلان ترمخه د وزیراعظم استعفا په رسمي ډول ومنل شوه. د نهې، سه شنبې، په ورځ مظاهره چیانو د صدر د استعفا غوښتنه هم کوله.
په سري لنکا کې د ورستي صورتحال په اړه خپل رپورټ کې ای پي وایي د جنوبي اېشیا په دې ملک کې د یوې میاشت نه زیات وخت راهسې سیاسي تاوتریخوالی دوام لري او د حکومت په ضد احتجاجونه د ښارونو نه کليوالو سیمه ته غځېدلي دي.
رپورټ وايي په احتجاجونو کې د هر قوم او مذهب خلک شرکت کوي او د وزیراعظم پلویانو هم پکې ګډون کړی او د هغه او د صدر د استعفاګانو غوښتنې یې کړي دي.
