د صحت نړیوالې ادارې یا ډبلیو اېچ او ترمخه ۱۲ کاله وړاندې هندوستان په ګرده نړۍ کې د پولیو یا ګوزڼ د ناروغۍ ۷۰ سلنه کیسونه لرل. خو په تیرو ۱۲ کالو کې بیا د پولیو ناروغۍ پرضد د هندوستان کامیابي یا ګټه د یاد هیواد لویه ګټه ده.
اداره وايي هندوستان به سږ کال د پولیو واېرس نه د پاکیدلو پېنځم کال لمانځي چې یوه لویه کامیابي ده. د ډبلیو اېچ اوچارواکي وايي د هندوستان دغه کامیابي څرګندوي دغه ناڅاپه خوریدونکي ناروغي سره د سختو حالاتو د مضبوطې سیاسي ژمنې سره ختمیدی شي.
په هندوستان کې د صحت نړیوالې ادارې لخوا د پولیو د مخنیو د کمپاېن په وخت (کال ۱۹۸۸) په هندوستان کې د پولیو ناروغانو شمیره په یو کال کې د درې نیم لکه نه ۳۳ ته را کمه شوه.
د صحت نړیوالې ادارې د ویاند کرېسټین لېنډمیر وايي پولیو اوس هم په دریو هیوادونو پاکستان، افغانستان او ناېجیریا کې شته چې هر کال ګڼ شمیر ماشومان د ټول عمر لپاره معذوره کوي.
ښاغلی کرېسټین لېنډمیر زیاتوي: ٫٫ په افریقا کې دکال ۲۰۱۶م راهسې د پولیو خوریدونکی واېرس نه دي ښکاره شوی او مونږ هیله مند یو چې د افریقا سيمه په دغه لړ کې کامیابۍ اړخ ته روانه ده. خو د بده مرغه پاکستان او افغانستان په نړۍ کې هغه دوه هیوادونه دي چرته چې کله هم د پولیو مخه کله هم نه ده نیول شوې.٬٬
د ډبلیو اېچ او د ویاند تر مخه پاکستان او افغانستان په ګډه د پولیو واېرس یو خوندي ځاې ګڼل کیږي او ځکه د ډبلیو اېچ او د پولیو د مخنیوي د پروګرام زیاتې مرستې او پام هم دغه دواړه هیوادونو ته دی. او په دغه دواړه هیوادونو کې د پولیو د مخنیوي لپاره روایتي او نوې طریقې کارول کیږي.
په دغه طریقو کې په یادو هیوادونو کې د کډوالو تګ راتګ څارنه کول، سختو یا وروسته پاتې سیمو ته ویکسین رسول هم شامل دي. د نوموړي په وینا په راتلونکې کې به څاڅکې ورکونکي داسې تربیه کیږي چې کور په کور وګرځي او هغه ماشومان ولټوي چا ته چې د پولیو د مخنیوي ویکسین نه دي ورکړل شوي.
د صحت نړیواله اداره وايي چې پولیو واېرس پولو ته هیڅ احترام نه لري او نه د پولو یا سرحدونو خیال ساتي. اداره زیاتوي چې پولیو تر هغه وخته نه شي ختمیدلی ترڅو چې اخیري ماشوم ته هم دغه څاڅکې نه وي ورکړل شوي.
پاکستان کې د پولیو تازه حال
په پاکستان کې د پوليو د مخنيوي د ادارې ترمخه د روانې میاشتې په ۲۱مه نېټه د خېبر پښتونخوا په خېبر ضلعې او کراچۍ کې د پولیو دوه تازه پېښې مخې ته راغلي او د دې سره په پاکستان کې روان کال د پولیو د پېښو شمېره شپږو ته ورسېده.
د پولیو وايرس پرضد کار کوونکې اداره وايي د پوليو جراثيمو په بشپړ ډول ختمولو لپاره ضروري ده چې د پوليو پرضد څاڅکو په هر کمپاين کې ټولو ماشومانو ته د پولیو مخنیوي څاڅکي یا قطرې ورکړی شي. د دې نه وړاندې د پاکستان په باجوړ، بنو، هنګو او لاهور کې هم د پوليو پېښې مخې ته راغلي دي.
افغانستان کې د پولیو تازه پېښې
په روان کال کې بیا په افغانستان کې د پولیو دوه مثبتې پیښې د کندهار په ولایت کې رپورټ شوي دي. تیر کال (۲۰۱۸) په افغانستان کې د پولیو ۲۱ پیښې رپورټ شوې وې چې پکې ۱۵ یواځې په کندهار ثبت شوې وې.
