په یو بل د حملو وروسته، پاکستان او ایران ویلي تاوتریخوالی به کم کوي، سفارتي تعلقات به بحال کړي، په دوه اړخیزو شخړو به همکاري زیاتوي او د ایران خارجه وزیر به د اسلام اباد او د پاکستان خارجه وزیر به تهران دوره کوي.
د پاکستان خارجه وزارت او په اسلام اباد کې د ایران سفارتخانې د دواړو ملکونو ترمنځ د وروستي کړکېچ نه پس د سولې په لوري د پرمختګ اعلان وکړو.
د جمعې په ورځ د پاکستان خارجه وزارت وویل د پاکستان د بهرنیو چارو وزیر جلیل عباس جېلاني د خپل ایراني هم منصب حسین امیر عبداللهیان سره په ټېلې فون خبرې وکړې او دواړه د سولې مفاهمت ته ورسېدل.
د پاکستان خارجه وزارت په خپل بیان کې وویل دواړه خارجه وزیران متفق شول چې د ترهګرۍ او د دوه اړخیزه تشویش په نورو مسلو به په لوړه کچه همکاري مضبوطوي. "دوی تاوتریخوالی په کمولو هم متفق شول."
دواړو خارجه وزیرانو د یو بل ملکونو ته خپل سفیران د ستنولو په موضوع هم خبرې وکړې.
په اسلام اباد کې د ایران سفارتخانې په اېکس، پخواني ټوېټر، وویل عبداللهیان او جېلاني تعلقات په لوړه کچه د بحالولو په لړ کې "ډېرې ښې" خبرې وکړې او دواړه ملکونه تاوتریخوالي د کمولو او د یو بل ملک ته سفیران د بېرته لېږلو په اړه "نوی رېکارډ" قایمولی شي.
ایراني سفارت وویل د ایران او پاکستان خارجه وزیران به د یو بل ملک ته د دورو تبادله هم کوي.
د ای اېف پي خبري ادارې ترمخه، جېلاني سره د خبرو وروسته، عبداللهیان په یو بیان کې وویل په پاکستان کې "ترهګر کېمپونه" ختمولو دپاره د دواړو ملکونو همکاري ضروري ده.
د اېسوسي اېټېډ پرېس خبري ادارې د رپورټ ترمخه، ایران سره تاوتریخوالی د کمولو فېصله د پاکستاني سیاسي او پوځي مشرانو د جمعې په ورځ غونډه کې وکړه چې مشري یې نګران وزیراعظم انوارالحق کاکړ کوله.
د پاکستان د نېشنل سېکیورټي کمېټۍ په غونده کې د پوځ مشر جنرل عام منیر هم شریک و، ای پي وویل.
د ایران او پاکستان شخړه د نهې، سه شنبې، په ورځ پس له دې راپورته شوه چې ایراني ځواکونو د پاکستان په پنجګور سیمه کې د مزایل او ډرون حمله وکړه. ایراني مطبوعاتو وویل په حمله کې د جېش العدل نومې وسله والې ډلې دوه مرکزونه تباه کړی شوو.
پاکستان د ایراني د حملې غندنه وکړه او ویې وېل په حمله کې دوه ماشومان ووژل شوو او ګڼ شمېر نور ملکي کسان زخمیان شول. د شورو، چهارشنبې، په ورځ پاکستان اعلان وکړو چې ایران نه خپل سفیر ستنوي او په اسلام اباد کې ایراني سفیر ته ملک نه د وتلو امر شوی دی.
د زیارت، پنجشنبې، په ورځ پاکستان وویل په "مرګ برسرمچار" عملیاتو کې یې د ایران په خاوره د ترهګرو پټن ځایونه وېشتلي دي.
ایران وویل د پاکستان په حملو کې نهه غېر ملکیان وژل شوي چې زیاتره ښځې او ماشومان دي.
د دواړو ملکونو په یو بل غېر معمولي حملو په سیمه کې تاوتریخوالي د زیاتېدو ویره راوپاروله، په داسې حال کې چې په منځني ختیځ کې د اسرایل او د حماس جنګ هم دوام لري.
د پاکستان خارجه وزارت وویل د ایراني هم منصب سره خبرو کې جېلاني د دواړو ملکونو د وروڼو په شان د تعلقاتو ذکر وکړو او لوظ یې وکړو چې پاکستان ایران سره د دوه اړخیزه اعتماد او همکارۍ په بنیاد کار کول غواړي. هغه زیاته کړه پکار ده چې د همکارۍ بنیاد په علاقيي سلامتیا او د خود مختارۍ په احترام وي.
د پاکستان نګران وزیراعظم انوارالحق کاکړ د جمعې په ورځ د پوځ او حکومت لوړ رتبه چارواکو سره ایران سره د شخړې په اړه خبرې وکړې.
ملګرو ملتونو، امریکې، چین او ځینو نورو ملکونو په ایران او پاکستان غږ کړی و چې تاوتریخوالی زیاتولو نه دې ډډه وکړي.
په ایران کې د حملو په اړه د پاکستان پوځ د زیارت، پنجشنبې، په ورځ وویل چې په ایران کې یې د بلوچ لېبرېشن فرنټ او بلوچ لېبرېشن ارمي، بي اېل ای، مرکزونه وویشتل. دواړه ډلې وخت په وخت په پاکستاني امنیتي ځواکونو د حملو ذمه واري مني.
امريکې بي اېل ای ترهګر تنظیم ټاکلی دی.
ایران وویل د پاکستان په خاوره حملو کې يې د سني ډلې جېش العدل مرکزونه په ډرون او په مزایلو وویشتل. ایران په دغه ډلې په خپلو امنیتي ځواکونو د حملو الزام لګوي.
ایران او پاکستان قریباً 900 کلومېټر مشترک سرحد لري او د دواړو ملکونو په سرحدي سیمو کې د کلونو راهسې بېلتون خوښتونکي ډلې او سمګلران فعالیتونه لري. دواړه ملکونه په یو بل دا الزام هم لګوي چې په پوله د امنیت مناسب انتظام نه کوي.
Forum