د انصاف نړیوال عدالت د امر باوجود اسرایل د رفح په ګډون د غزې پر بېلابېلو برخو نن بریدونه کړي

د انصاف نړیوال عدالت پرون اسرایل ته امر وکړ چې په رفح ښار کې پوځي عملیات سمدستي ودروي خو د اسرایل پوځ نن بیا د رفح په ګډون د غزې پر بېلابېلو سیمو بمباریو ته دوام ورکړی دی.

د اسرایل د جګړې کابینې یو مهم غړي بني ګانتز ویلي د دې هیواد پوځ به تر هغې په غزه کې د حماس خلاف جګړه کوي چې ټول یرغمل شوي کسان یې "په خوندي توګه" نه وي را خوشي کړي.

د اسرایل پوځ د ای سي جې له پروني حکم څو ګنټې وروسته نن د خالي- شنبې په سهار په داسې حال کې چې له حماس ډلې سره یې نښتې روانې وې، د غزې په بېلابېلو برخو کې هوايي بریدونه وکړل.

فلسطیني عیني شاهدانو او د اې ایف پي خبریالانو لیدلي چې دا بمبارۍ په رفح او مرکزي ښار دیرالبلاح کې شوې دي، خو د اسرایل د ملي امنیت سلاکار زاچي هېنګبي په یوه بیان کې ویلي:

"اسرایل په رفح کې داسې عملیات نه دي کړي او نه به یې وکړي چې د ټولو یا څه برخه فلسطیني ملکي وګړو د ژوند د تباهۍ سبب شي".

د انصاف نړیوال عدالت د جمعې په ورځ له حماس سره د یرغمل کسانو د سمدستي خوشي کېدو غوښتنه هم کړې وه او دا غوښتنه له هغه څو ګنټې وروسته وه چې اسرایل وویل پوځ یې له شمالي غزې د درو نورو یرغمل کسانو مړي تر لاسه کړي دي.

که څه هم د ای سي جې دا حکم په غزه کې د جګړې بندولو لپاره پر اسرایل فشارونه زیاتوي خو اسرایل بیا ددې د عدالت له حکم وروسته د جمعې په ورځ وویل عمل به پرې ونه کړي.

د اسرایل د وزیراعظم بنیامین نیتناهو دفتر او د بهرنیو چارو وزارت په ګډ بیان کې د انصاف نړیوال عدالت دا حکم غندلی او پر اسرایل د جنوبي افریقې لګېدلي د فلسطینیانو د "قتلِ عام" تورونه یې "ناسم، کرکجن او تېري کوونکي" بللي دي.

فلسطیني وسلوالې ډلې حماس، چې له 2007م کال راهیسې پر غزې پټۍ واکمنه ده، په رفح کې د اسرایل د عملیاتو درېدو په اړه د انصاف د نړیوال عدالت د امر هرکلی کړی او د غزې د نورو برخو په اړه د داسې امر نه کولو باندې یې پر عدالت نیوکې کړې دي.

د غزې یوې یوې اوسېدونکې فلسطینۍ مېرمن اوم محمد العشقا د جګړې له امله دیرالبله ښار ته بې ځایه شوې، هغه وایي، "موږ هیله لرو چې د انصاف د نړیوال عدالت پرېکړه به پر اسرایل فشار راوړي چې دغه وحشت ختم کړي، ځکه دلته هیڅ پاته نه دي".

د تېر کال د اکتوبر پر اوومه پر اسرایل د حماس په بریدونو کې 1,200 تنه وژل شوي او 252 یرغمل کړی شوي وو. د اسرایل پوځ وایي په هغوی کې 121 پاته دي چې وایي 37 پکې مړه شوي دي.

د حماس تر واک لاندې د غزې روغتیا وزارت وایي د اسرایل په بریدونو کې په تېرو شاوخوا اووه نیمو میاشتو کې لږ تر لږه 35,800 کسان وژل شوی چې وایي اکثر یې ښځې او ماشومان دي.