د اسرایل پوځ د غزه په جنوبي ښار رفح کې بمباري کړې

د اسرایل پوځ‌ ویلي د غزه په جنوبي ښار رفح کې یې د زیارت، پنجشنبې، په ورځ فضايي حملې کړي او هغه وسله وال يې په هدف کړي چې د رفح څخه يې د راکټونو حمله کړې وه.

د اسرایل دفاعي ځواکونو وویل د رفح څخه د چلول شوو راکټونو یې په کامیابۍ لاره ونیوله.

سرایلي ځواکونو د زیارت، پنجشنبې، په ورځ د جنوبي لبنان څخه ویشتل شوي مشکوک فضايي شیان هم راوغورځول خو دوه ډرون د اسرایل په ګلیلي علاقه کې وغورځېدل.

په اووم اکتوبر د اسرایل او حماس جنګ د شروع کېدو راهسې په لبنان کې مېشته حزب الله وسله واله ډله او اسرایلي ځواکونه د یو بل سره د ډزو تبادله کوي چې دا ویره يې راپارولې چې د اسرایل او حماس شخړه په سیمه اییزه کچه جنګ کې بدلېدلی شي.

بلخوا، د غزه پټۍ په شمالي ښار غزه کې د زیارت، پنجشنبې، په ورځ هم جګړې دوام لرلو. یوه ورځ مخکې اسرایلي په سیمه کې ملکي خلکو ته د وتلو امر وکړو.

د ملګرو ملتونو د مشر اېنټونیو ګوټېرېس ترجمان سټیفان ډوجېرېک د شورو، چهارشنبې، په ورځ‌ وویل فلسطینیانو ته د انخلا د اسرایل تازه احکامات به د هغه فلسطیني کورنیو کړمې نورې زیاتې کړي چې د دې نه مخکې هم څو ځله بې ځایه شوي دي.

ډوجېرېک وویل پکار ده چې د ملکي خلکو تحفظ وشي او او ضرورتونه یې پوره کړی شي که دوی په ځای پاتې کېږي او که بل ځای ته تګ کوي.

د ملګرو ملتونو د خوراک ادارې ورلډ فوډ پروګرام، ډبلیو اېف پی، د شورو، چهارشنبې، په ورځ په اېکس، پخواني ټوېټر، وویل په غزه ښار کې د شدیدو پوځي عملیاتو په نتیجه کې بشري ضرورتونه زیات شوي او صورتحال غېر یقیني دی.

په اووم اکتوبر په اسرایل د فلسطیني مسلح ډلې حماس د وسله والو په حمله کې تر 1200 پورې کسان وژل شوي او 250 نور کسان حماس یرغمال نیولي وو. د یرغمالانو څخه ځینې ازاد کړی شوی دی خو وېل کېږي چې 116 کسان اوس هم د حماس په ولکه کې دي. په دې شمېره کې د اسرایل پوځ‌ وايي د 42 یرغمالانو مړي هم شامل دي.

د حماس د حملې په جواب کې اسرایل په غزه کې د حماس خلاف جنګ شروع کړی چې د غزه د صحت وزارت وايي 38200 فلسطینیان په کې وژل شوي دي. په دې شمېره کې دا نه دي وېل شوي چې څومره ملکي خلک او څومره وسله وال دي.