د ټرمپ ملاتړی د ريپلکن ګوند مایک جانسن بیا د استازو د ایوان سپیکر وټاکل شو

د ریبپلکن ګوند غړی مایک جانسن د جمعې په ورځ د 119م امریکایي کانګریس د لومړۍ غونډې په ترڅ کې په ډېر لږ اکثریت سره د کانګریس سپیکر وټاکل شو. د هغه ملاتړ منتخب صدر ډونلډ ټرمپ کاوه.

هغه مخکې په تېر کانګریس کې هم د سپیکر په توګه ټاکل شوی و او اوس په دې څوکۍ د دویم ځل لپاره بریالی شو.

د جمعې په ورځ د رایې ورکولو پر مهال، جانسن د سختې سیالۍ سره مخ و، ځکه چې د هغه خپل ګوند ځینې غړي د رایې ورکولو لپاره چمتو نه وو. د دې یو دلیل دا و چې تېره میاشت د حکومت بندېدو خطر له منځه وړلو لپاره هغه له ډیموکریټس سره د قانون جوړونې په برخه کې همکاري کړې وه.

په 435 کسیزه ایوان کې د ریپبلکنز غړي 219 او د ډیموکریټس 215 دي.

کله چې رایې ورکول پیل شول، ټولو 215 ډیموکریټانو د خپل نوماند حکیم جیفریز په ملاتړ رایه ورکړه، په داسې حال کې چې د ریپبلکنز درېوو غړو د جانسن لپاره د رایې ورکولو څخه انکار وکړ. په دې کې د دوو غړو ناخوښۍ ختمې شوې، چې په پایله کې مایک جانسن دویم ځل د سپیکر څوکۍ وګټله.

په سینیټ کې هم ریپبلکنز د 47 په مقابل کې 53 رایو سره برلاسی دي. په دې ایوان کې د قانون منظورۍ لپاره د 100 څخه 60 رایې اړینې دي.

د جانسن د سپیکر په توګه ټاکنه ځکه هم مهمه وه چې د جنورۍ په شپږمه، کانګریس باید د صدر په توګه د ټرمپ بریا تایید کړي، او د سپیکر د نشتوالي له امله بحران رامنځته کېدای شو.

د رایې ورکولو د بریا وروسته، مایک جانسن خپلو همکارانو د لاسونو په پړقا یا چکچکو کې خپلې څوکۍ ته بوتللو او جانسن غړو ته مننه وکړه.

د سپیکر په توګه په ایوان باندې واک لرل نه یوازې د هغه د خپلې بقا لپاره اړین دي بلکې د ټرمپ د ټیکس کمولو او د پراخې کچې د ملک بدرۍ د لویې ایجنډې د بشپړولو لپاره هم مهم دي.

د جمعې په سهار ټرمپ په ټولنیزو رسنیو کې په خپل پوسټ کې د جانسن لپاره د بریا هیله څرګنده کړې وه او لیکلي یې وؤ چې هغه 100 فیصده ملاتړ ترلاسه کولو ته ډېر نژدې دی.

که جانسن ناکام شوی وای، نو دا به د ټرمپ لپاره بله لویه رسوایي وه، ځکه چې مخکې په ډسمبر کې هم هغه له ورته وضعیت سره مخ شوی و، کله چې ریپبلکنز د هغه د حکومت د پور اخیستو د حد د معطلولو غوښتنه رد کړه. دې کړنې داسې تاثر ورکړی و چې د ریپبلکنز په ګوند کې د ټرمپ اثر کم شوی دی.

د جمعې په ورځ د سپیکر لپاره د رایې ورکولو یو مهم اړخ دا و چې پخوانۍ ډیموکریټک سپیکر نینسي پیلوسي، چې اوس 84 کلنه ده او وروستۍ موده کې یې د پوښتۍ هډوکی مات شوی و، د ډیموکریټک نوماند حکیم جیفریز ته د رایې ورکولو لپاره ایوان ته راغله.

د کانګریس ریپبلکن غړي به د شنبې په ورځ د خبرو لپاره په واشنګټن کې سره راټول شي، او د هغوی مشران به د یکشنبې په ورځ بیا په بالټیمور کې سره وویني.

ریپبلکنز د ورځنیو چارو لپاره چې کوم نوي بزنس رولونه وړاندې کوي، هغه لانجمن ګڼل کېږي، ځکه چې په دې کې دا ماده شامله ده چې یوازې ریپبلکنز به د سپیکر د لرې کولو لپاره رایه ورکولی شي.

ډیموکریټس وايي چې د دې په پایله کې به جانسن ټول ایوان ته د ځواب ویلو په ځای یوازې خپل ګوند ته حساب ورکوونکی وي، په داسې حال کې چې په تېر کانګریس کې هر غړی کولی شول چې د سپیکر د لرې کولو لپاره تحریک وړاندې کړي.

(د دې راپور لپاره معلومات له رویټرز، ای پي، او ای ایف پي څخه اخیستل شوي دي.)