د پاکستان قبائيلي سيمې شمالي وزيرستان کې د پوځي اپرېشن څخه د کډوال شوؤ خلکو شمېره د ۹ لاکهه او ۵۵ زرو نه اوړېدلې ، او چارواکي وايي د صبا پورې به د کډوالو د رجسټرېشن عمل سرته ورسي .
د قبائيلي سيمو دپاره د قدرتي افتونو په وخت د مرستو رسولو او انتظام د ادارې اېف ډي اېم ای مرستيال مشر حسيب وائس اف امريکا ډيوه ريډيو سره خبرو کې ووئيل ، چې د نن پورې د شمالي وزيرستان ۹ لاکهه او ۵۷ زره کډوال رجسټرکړی شوي دي .
د نوموړي په خبره پېښور کې به د رجسټرېشن عمل نن سرته ورسي ، او بنو کې د صبا پورې خلک کولی شي ، چې ځانونه رجسټرډ کړي .
د اېف ډي اېم ای مرستيال مشر وايي دويې نه گڼي ، چې کوم کډوال به د رجسټرېشن نه پاتې شوی وي ، ځکه چې د هغه په وينا ، ډېرو خلکو په دوه ، او درې ځله د خپلو نومونو اندراج کړی دی . او د نوموړي په وينا داسې مالوميږي چې په دوېم او درېم ځل به نزدې ۳۰ فيصده خلکو خپله نوم ليکنه کړي وي .
د اېف ډي اېم ای د رپورټ ترمخه تر اوسه پورې په نزدې ۳۰زره کورنو باندې د درې نيم ميليينه نه زياتې امدادي نقدې روپۍ وېشل شوي دي ، او راپورونه وايې چې د خوراک نړيوال پروگرام لاندې کډوالو ته د ۳ زره او ۷ سوه ټنه نه زيات خوراکي توکي هم ورکړل شوي دي .
نن د گل په ورځ د پنجاب صوبې وزيراعلي شهباز شريف او د خېبر پښتونخوا گورنر سردار مهتاب احمدخان سره د نورو لوړ پوړو چارواکو د بنو د کډوالو د کمېپ دوره هم کړې ده .
د پنجاب وزيراعلي اعلان کړی چې د پنجاب صوبې حکومت به هره مياشت هرې يوې کډوالې کورنۍ ته ۷۰۰۰ روپۍ امدادي نقدي روپۍ ورکوي .
