لاس رسیدونکی لینک

Breaking News

په کوئټه کې چاودنه ـ د مړو شمېر څلورو او د ټپیانو هغې دوه دېرشو ته ورسېد


چاودنه په میزان چوک کې شوې ده

د بلوچستان په سرښار کوئټه کې نن د نهې/سې شنبې په مازدیگر بمي چاودنه وشوه چې له امله یې پولیسو او عامو وگړو ته مرگ ژوبله اووښتې ده.

د کوئټې سېول هسپتال د مړو او زخمیانو لست خپور کړی چې له مخې یې، د نن ورځې په چاودنه کې څلور تنه مړه او ٣٢ نور زخمیان شوي دي.

د سېول هسپتال مشر سلیم آبړو ویلي چې په څلورو مړو شویو کسانو کې، یو یې پولیس دی او په زخمیانو کې هم پولیس او عام خلک شامل دي. سربیره پر دې، ویل شوي چې د څلورو تنو زخمیانو حال خراب دی.

د زخمیانو او ټپیانو خپور شوی لیست
د زخمیانو او ټپیانو خپور شوی لیست

دا چاودنه د کوئټې باچا خان چوک ته نږدې د لیاقت بازار په میزان چوک کې شوې ده. د بلوچستان ایالت د پولیسو مشر محسن حسن بټ ډېوه نیوز ته ویلي چې چاودېدونکي توکي په یو موټرسایکل کې ځای پر ځای شوي و او هدف یې د پولیسو یو گاډی و.

تر اوسه د دې برید زمه واري چا پر غاړه نه ده اخیستې.

د بلوچستان اعلی وزیر جام کمال آلیاني د نننۍ بمي حملې غندنه کړې او ویلي یې دي چې د ټپیانو درمنلې ته دې پاملرنه وشي.

د بلوچستان د داخله چارو وزیر، میرضیا لانگو د پیښې رپوټ طلب کړی او غوښتي یې دي چې د پیښې پلټنې دې وشي.

په بلوچستان صوبه کې په ټیټه سطحه د تشدد پیښې رامنځته کیږي چې یا یې عاملین جلا غوښتونکي بلوڅان وي او یا هم اسلامي تندلارې ډلې چې د پاکستان پر امنیتي ځواکونو کله ناکله حملې کوي.

  • 16x9 Image

    حفیظ الله شېرانی

    حفیظ الله ستوری شېرانی په بلوچستان کې د وي.او.اې ډیوه د خبریال په توګه کار کوي. هغه له بلوچستان پوهنتون څخه په جرنلزم او پښتو ادبیاتو کې ماسټرۍ کړې دي او له تېرو اوو کلونو راهیسې د جرنلزم په میدان کې کار کوي. شپږ کاله یې د پاکستان له (ډان) ټیلیویژن سره د خبریال په توګه کار کړی او په بېلابېلو ورځپاڼو کې یې کالمونه هم لیکلي دي. په بلوچستان کې د ډیوه رېډیو او ټیلویژن لپاره د ملټي مېډیا په برخه کې پر بېلابېلو سیاسي، کلتوري او ټولنیزو موضوعاتو رپوټونه جوړوي.

     

XS
SM
MD
LG