چین او پاکستان په ملگرو ملتونو کې د امریکې د هغه قرارداد مخالفت کړی چې هدف یې د جېش محمد ډلې مشر مسعود اظهر نړیوال ترهگر نومول وو. دواړو هېوادونو ویلي امریکې د مسعود اظهر په اړه قرارداد د ضوابطو په ضد په مستقیم ډول امنیتي شورا ته وړاندې کړی دی.
امریکې د فرانس او برطانيي په ملاتړ د ملگرو ملتونو ١٥ کسیزې امنیتي شورا یا سکېورټي کاونسل ته د شورو، چهارشنبې، په ورځ مسعود اظهر د ترهگر نومولو دپاره قرارداد پېش کړو.
دوه هفتې وړاندې بېجنگ د ترهگرۍ خلاف د ملگرو ملتونو د بندیزونو کمېټۍ کې د امریکې د هم دغه رنگ قرارداد مخه ونیوله. د چینايي مامورینو ترمخه قرارداد په ټېکنیکي بنیادونو ونیول شو چې مقصد په قرارداد نور بحث او د خبرو دلارې د مسلې حل راویستل وو.
د امریکې د تازه هڅو په اړه د چین د خارجه وزارت ترجمان گنگ شوانگ وویل امریکې ته پکار دي چې د احتیاط نه کار واخلي او په زور دې قرارداد نه مخې ته کوي.
چین په کال ٢٠١٦ او کال ٢٠١٧ کې هم د ملگرو ملتونو په کمیټۍ کې په مسعود اظهر د پابندیو مخه نیولې وه.
جېش محمد د فېبرورۍ په ١۴ نېټه د هندوستان د انتظام دلاندې کشمیر په پلوامه ښار کې په هندي پوځ د حملې ذمه واري په غاړه واخیسته. په حمله کې د ۴٠ نه زیات عسکر ووژل شو او په نتیجه کې د پاکستان او پاکستان ترمنځ تاوتریخوالی زیات شو او د دواړو هوايي ځواکونو د یو بل په ضد عملیات هم وکړل.
په اسلام آباد کې د پاکستان د خارجه وزارت ترجمان محمدفیصل هفتنۍ خبري غونډې ته وویل د "افسوس" خبره ده چې امریکې امنیتي شورا ته خپل قرارداد په داسې حال کې وړاندې کړی دی چې د مسعود اظهر په اړه معامله د وړاندې څخه د بندیزونو کمېټۍ کې غور روان دی. ترجمان وویل د کمیټۍ نه بهر هر اقدام به د بندیزونو نظام کمزوری کړي.
