پاکستان کې پټرول او ډيزل ارزان کړی شوي

پاکستان کې د پټرولو، ډيزلو او د خاورو تېلو بیعې ارزانې کړی شوي دي. يو ليټر پټرول 14 روپۍ، يو لیټر ډيزل 13.50، د خاورو تېل 10.14 او لايټ ډيزل 11.29 روپۍ ارزان کړی شوي دي.

د پاکستان د خزانې وزارت د جمعې په شپه د تېلو نوې بيعې اعلان کړي او ويل شوي د 16م دسمبر څخه به نوي بيعې عملي وي.

د خزانې وزارت ویلي، د تېلو او ګېس د انتظام ادارې (اوګرا) په سپارښتنه تېل ارزان کړی شوي دي.

د اعلاميې ترمخه په نوو بيعو کې پټرول د 14 روپو ارزانولو سره د 281.34 روپو نه 267.34 روپو لیټر ته راغلي دي.

يو ليټر ډيزل 13.50 روپۍ ازران کړی شوي او نوې بیعه یې د 289.71 روپو نه 276.21 ته راکوزه شوې ده.

د خاورو تېل د 201.16 روپو نه 191.02 روپو او لايټ ډيزل د 175.93 نه 164.64 روپو ته راکم شوي دي.
پاکستان کې هر 15 ورځې وروسته د تیلو نوې بيې ټاکل کيږي.

له دې وړاندې په لومړي دسمبر د پټرولو قيمت په ځای ساتل شوی، ډيزل، د خاور تېل او لايټ ډيزل ارزان کړی شوي وو.

ويل شوي وو يو ليټر ډيزل اووه روپۍ ارزان کړی شوی، د خاورو تېل 3.82 روپۍ او لايټ ډيزل 4.52 روپۍ ارزان کړی شوي وو.

د نومبر په سر کې د پټرولو او ډيزلو په بيعو کې بدلون نه وو شوی، قيمتونه یې په زوړ حال ساتل شوي وو.

له دغې وړاندې په 15م اکتوبر پاکستان کې د تېرو څو مياشتو راهسې پرله پسې د پټرولو او ډيزلو ګرانېدو وروسته حکومت پټرول او ډيزل ارزان کړي وو. يو ليټر پټرول 40 روپۍ او ډيزل 15 روپۍ ارزان کړی شوي وو.