لاس رسیدونکی لینک

تازه خبر

پاکستان

باجوه: هرکار په قامي مفادو کې کوو، حقاني: دا فیصله به اولسي استازي کوي

په یو داسې وخت کې چې د پاکستان زیاتره سیاسي ګوندونه، بشري ټولنه او فعالین فکر کوي په پاکستان کې اولسي واکمني د پوځ په موټي کې ده د پوځ مشر جنرل قمر باجوه ويلي د هیواد پوځ هر کار د آئین لاندې په قامي مفادو کې کړی دی. په پوځي اکیډمۍ کاکول ایبټ اباد کې جنرل باجوه وویل:

"دښمن په خپل هدف کې د ناکامۍ ورستو د پاکستان په ضد هائبریډ جګړه شورو کړیده”

که څه هم هغه ددغه “هایبریډ دښمن”نوم نه دی اخستی خو د هغه په خیال ددې جنګ هدف قامي مشران دي.

هغه دا هم وویل چې پوځ ته کوم کار سپارل کیږي کوي به یې. جنرل باجوه دا خبرې په داسې حال کې کړي چې په پاکستان کې د ګڼو او لویو سیاسي ګوندونو اتحاد پاکستان ډیمو کریټک الاینس په دې بنیاد د عمران خان د حکومت په ضد تحریک شورو کړی چې واي دا حکومت پوځ په اولس ورتپلی او د اولس نماینده نه دی.

په عیني حال کې په جنوبي ایشا کې د ترهګرۍ خلاف او د بشري حقونو ملګری تنظیم ساتھ وايي پاکستان کې ملت پاله او ازاد خیاله فکر کوي چې د عمران خان د وزېراعظم په توګه ټاکل په اصل کې د پوځیانو واک دی.

د ساته پینځمه دوه ورځنۍ غونډه د “اولسي واک، قانون واکمني، او بشري حقونه” سرخط لاندې د نن نه په ان لاین بڼه شوروه شوه،

دتنظیم یو مشر او د پاکستان پخوانی سفیر حسین حقاني د غونډې پس وي او ای ډیوه ته وویل د قامي مفاد فیصلې د هغې هیواد د اولس نمایندګان کوي، او ددې تعین د باچا د وینا مطابق نه کېږي:

"قامي مفاد به د قام نمایندګان ټاکي، او دا هله ممکن ده چې د اولس واکمني اومنل شي”

هغه وویل چې دوي د اولسي واکمنۍ غوښته کوي او هم په دغه بنیاد ورته غداران وویل کیږي، د حقاني په خیال:

“د هغو دغه سوچ هیواد ته ګټه نه زیان رسوي”

حقاني دا هم وویل چې پخوا هم ددغه شان پوځي سوچ په وجه پاکستان دوه ټوټې شوې او بیا هم داسې کیدی شي:

“په کوم هیواد کې چې یواځې یوه بیانیه په ځای کېږي یا خو هغه کمزوري وي یا یې په ځای کونکي”

د ډیوه ددې تپوس په ځواب کې چې په تاسو د هیواد په ضد د منفي پروپیګنډې تور دی نو ښاغلي حقاني ددې نه انکار کړو چې دوي د هیواد او ددې په ضد غلیمانه پروپیګنډه کوي، د هغه په خیال دوي د هیواد او ادارو سره مینه لري خو د اولسي واکمۍ غوښتنه به تل کوي. هغه وویل په دغه علت:

“د دوي د سوچ مرۍ غلې کولو هسې کېږي خو هم دا وخت دی چې دوي خپل سوچ خلکو ته رسوي”

حقاني دا هم وویل چې پخوا هم ددغه شان پوځي سوچ په وجه پاکستان دوه ټوټې شوې او بیا هم داسې کیدی شي
please wait

No media source currently available

0:00 0:03:11 0:00

جنرل باجوه په خپل تقریر کې دا هم وویل چې د پاکستان ائین د پاکستان د پوځ لارښود دی، د هغه په خیال اولس، دستور، او دستوري روایتونه ساتل د پوځ زمواري ده.

د ساتھ مشران دعوا کوي چې د تیرو انتخاباتو ورستو جمهوریت، امریت لور ته روان شوی دی.

غونډې ته سیاست وال او دانشور افراسیاب خټک د اسلام اباد نه په وینا کې وویل:

"د 2018 د انتخاباتو په نتیجه کې پاکستان د نیمګړي اولسي واک نه یو مکمل پوځي واک ته منتقل شو"

ښاغلي خټک وویل دا وخت په پاکستان کې یوه غیر اعلانیه مارشل لا دی. هغه دا هم وویل چې دې وسني نظام ټولې ادارې بربادې کړې.

پاکستانۍ خبریاله ماروي ماروي سرمد واي پوځ هایبرډ جګړه یواځې دغه خبره ګڼي چې په جرنیلانو څوک تنقید وکړي
please wait

No media source currently available

0:00 0:01:18 0:00

په پاکستان کې تحریک انصاف د 2018 انتخاباتو په نتیجه واک تر لاسه کړی دی او وايي په انتخاباتو کې درغلي نه ده شوی. انتخابات د پاکستان تر سیوري لاندې شوي وو او پوځ هم یاد انتخابونه پاک او صاف ګڼي.

په پاکستان کې د پوځ او عمران خان نقادان د جنرل باجوه ددې خبرې سره اتفاق نه کوي چې په د هیواد خلاف د غلیم په لمسه د رسنیو د لارې منفي پروپیګنډه روانه ده.

پاکستانۍ خبریاله او لیکواله ماروي ماروي سرمد واي پوځ هایبرډ جګړه یواځې دغه خبره ګڼي چې په جرنیلانو او د هغو په خپل سره تګ لارو څوک تنقید وکړي. د ماروي په خیال:

“که دوي په دغه تنقید خفه دي نو هغه داسې کارونه دې نه کوي چې بیا پرې تنقید کېږي”

هغې وویل دوي د یوې سوچه جمهوریت غوښتنه کوي او دا د دوي جمهوري حق دی:

“دا کار مونږ د چا په لمسه نه کوو” هغې تپوس وکړو چې دوي باید دغه دښمن په ګوته کړي.

که دوي په دغه تنقید خفه دي نو هغه داسې کارونه دې نه کوي چې بیا پرې تنقید کېږي
please wait

No media source currently available

0:00 0:04:35 0:00

د ساتھ په غونډه کې په امریکه کې دمیشتو سیاسي، اقتصادي او د بشري حقونو د کارپوهانو نه علاوه د پاکستان څخه هم د ساتھ ځیني هم فکره برخه اخلي.

See all News Updates of the Day

"له جنت سواته د بلوچستان د کولې دوزخ ته ځو": په پاکستان کې سږ کال 111 کارګر مړه شوي

په پاکستان کې روان کال د کولې په درنګونو یا کانونو کې په بېلابېلو پېښو کې د مړه شوو مزدورانو شمېر 111 ته رسېدلی، په مړو کې زيات شمېر د خيبر پښتونخوا په خاصه د سوات د شانګلې سیمې د مزدورانو دی.

روان کال د جولای مياشتې په اتلسو ورځو کې په ټول پاکستان کې 19 د کولې مزدوران مړه شوي دي، په بلوچستان او پښتونخوا کې په تيره يوه اونۍ کې نهه مزدوران مړه شوي دي.

د چارشنبې- شورو په ورځ د هرنايي ضلعې په لعل خان کول ماينز کمپنۍ نومي سيمه کې څلوېښت کلن نعمت اللہ سنزرخیل په کوله کان کې مړه شوی دی.

د چارواکو په وينا نعمت الله د هرنايي اوسېدونکی دی او هغه د کولې په کان کې د زهرجن ګېس د جمع کېدو له کبله مړ شوی دی.

له همدې پېښې سره په تېره شاوخوا يوه اوونۍ کې په بلوچستان کې د کولې په کانونو کې د مړو شوو مزدورانو شمېر درې شوی، خو د پښتونخوا او سيند صوبې په ګډون د مړه شوو ټولو مزدورانو شمېر 11 ته رسېدلی او دا ټول پښتانه مزدوران دي. په مړه شوو کې 10 تنه د پښتونخوا صوبې دي.

په کوټه کې د پښتونخوا صوبې یو د کولې کارکوونکی خورشيد وایي، د دوی سیمې بحرين، مينګوره، شانګله او کالام د جنت غوندې دي، خو وایي هلته مزدورۍ او کارونه نشته نو ځکه بلوچستان ته "د کولې کانونو دوزخ" ته راځي:

"درې زره، څلور زره فيټه لاندې ځو د کولې په کانونو کې، دلته هم موږ ته سهولتونه نه شته، چې ملګړی مو خوږ شي نو په شا يې تر ډاکټر پورې وړو، ايمبولنس نه شته او مرګونه خو هره ورځ وي، په مياشت کې مرګونه تر شل اوړي".

د پاکستان سنټرل ماينز لېبر فېډريشن رپورټ دی چې په ټول پاکستان کې روان کال په جلا جلا پېښو کې 111 تنه مړه شوي چې په سيند صوبه کې پينځه، په پنجاب کې 10، په پښتونخوا کې 29 او د تېرو کلو په څېر تر ټولو زيات په بلوچستان کې 67 د کولې مزدوران مړه شوي دي، چې زياتره د سوات او شانګلې دي.

د پاکستان سېنټرل ماينز لېبر فېډريشن صدر لالا سلطان وایي، د کارګرو خوارانو پر مخ او سر باندې يو څادر او ګونۍ [بوجۍ] واچوي چې که په کان کې دننه چاودنه کېږي او دوی پکې مري نو د دوی شناخت به بيا په اسانه کېږي:

"دا ظلم او بربريت دی، د ملک د غريبانو او اميرانو په ګډه ملک دی، بايد دې ته توجه وشي، ما و چيف سيکرېټري ته ليکلي دي چې نوره دې دا د ماينز انسپېکټريټ زړه عمله بدله کړه".

د سوات او په خاصه د شانګلې خلک له حکومته د کار او دوی ته پر کلي وطن د روزګار نه برابرولو ګیلې کوي.

د همدې جواب لپاره مو د مسلم ليګ ن د پښتونخوا صوبې صدر او له شانګلې څخه د پاکستان قامي اسمبلۍ ته کاميابه شوي او وفاقي وزير امير مقام سره د ټيليفون له لارې تماس ونيو.

اول د هغه ټيليفون اوچت کړل شو، له تعارف وروسته وي او اې ډیوه ته وويل شو چې" نيم ساعت پس ټيليفون وکړئ، صاب به له تاسو سره خبرې وکړي" خو وروسته د ډېر زيار ايستلو باوجود له وفاقي وزير سره په دې اړه سوال جواب ونه شول.

لالا سلطان د کولې په کانونو کې د مرګونو پېښو ذمه واري پر حکومت او اړوند ادارو اچوي.

په دې اړه مو د بلوچستان د ماينونو د محکمې له سېکرټري سيدال خان لوڼي سره د ټيليفون له لارې تماس ونيو خو هغه هم ځواب ونه وايه.

تر دې وړاندې حکومتي چارواکو او ياد سيکرېټري په بيا بيا د مرګونو پېښو ذمه واري د کولې کانونو پر ټيکه دارانو او مزدورانو اچوي او وايي هغه احتياط نه کوي نو ځکه داسې پېښې کېږي.

د پوهانو په وينا په کوله کانونو کې زياتره مرګونې پېښې د زهرجن ګېس د جمع کېدو، چاودنې، اور لګېدو، د هوايي لارې د نشتوالي، کانونو ته د باران په وخت د اوبو ننوتلو، د اوسپنيزې رسۍ د پرې کېدو او ځينو نورو وجوهاتو له کبله کېږي.

د مزدورانو لپاره کارکوونکو تنظيمونو د مشرانو په وينا دا ځکه چې په شته قوانينو باندې عمل شته او اړوندې ادارې یې څارنه نه کوي.

د بلوچستان د ماينونو محکمې چارواکي د کال په اربونو روپو ټېکس تر لاسه کوي خو پر دې برسيره هم دا مني چې دوی په صوبه کې د انتظامي عملې او وسايلو له کمۍ سره مخ دي.

د پاکستان سېنټرل ماينز لېبر فېډريشن رپورټ دی چې په بلوچستان کې د بېلابېلو قدرتي معدنياتو تر يو لک زيات قانوني او ناقانونه ماينونه يا درنګونه دي چې پکې تر يو نيم لک زيات مزدوران کار کوي.

وايي په دې کې تر يو لک زيات مزدوران د کولې په کانونو کې کار کوي، د تنظيم د مشرانو په وينا په يو نيم لک کې يوازې 6,500 مزدوران له حکومت سره رجسټرډ دي.

د رپورټ له مخې په کال 2023م کې په ټول پاکستان کې په نورو صوبو کې 148 خو يواځې په بلوچستان کې د سکرو په کانونو کې 122 مزدوران په بېلابېلو پېښو کې مړه شوي وو.

د بلوچستان صوبې د سکرو په کانونو کې زياتره د پښتونخوا د شانګلې او سوات، افغانستان او د بلوچستان ځايي مزدوران کار کوي چې هغه هم زیاتره پښتانه دي.

اقتصاد پوهان: د پاکستان د ونډو بازار د آی اېم اېف سره د موافقې له امله په بره روان دی

د سټاک اېکسچېنج ترمخه، د ونډو بازار د کاروباري ورځې پيل د 81,155 پواينټونو نه پيل شوی او نزدې درې بجې پکې 663 پواينټونه سېوا شوي وو.
د سټاک اېکسچېنج ترمخه، د ونډو بازار د کاروباري ورځې پيل د 81,155 پواينټونو نه پيل شوی او نزدې درې بجې پکې 663 پواينټونه سېوا شوي وو.

اقتصاد پوهان وايي، د پاکستان د ونډو بازار (پاکستان سټاک اېکسچېنج) بره تلو علت د نړيوالې مالياتي ادارې (آی اېم اېف) سره د پور لومړۍ موافقه کېدل دي، خو د دې عام ولس ته نېغ په نېغه ګټه نه رسي.

د پاکستان د ونډو بازار د وېب پاڼې ترمخه، نن په 18مه جولايۍ د ونډو بازار کې د سر د سلو کمپنو کاروبار د 670 پواينټونو نه زيات بره تللی دی.

د سټاک اېکسچېنج ترمخه، د ونډو بازار د کاروباري ورځې پيل د 81,155 پواينټونو نه پيل شوی او نزدې درې بجې پکې 663 پواينټونه سېوا شوي وو.

اقتصاد پوه جبران سرفراز وايي، د کله نه چې د نړيوالې مالياتي ادارې (آی اېم اېف) سره د پاکستان د سټاف لېول يا عملې په کچه د پور په پروګرام اتفاق شوی دی، د هغې وروسته د ونډو بازار په بره روان شوی دی.

آی اېم اېف په 12مه جولايۍ پاکستان ته د درېو کلونو دپاره د اووه بيلينه ډالرو قرض په ورکولو په ابتدايي کچه د اتفاق کولو اعلان کړی وو.

مطبوعاتو ته په لېږلي پيغام کې آی اېم اېف ويلي وو، پاکستان ته د نوي قرض ورکولو فېصله د سټاف یا د عملې په کچه شوې او د آی اېم اېف اېګېزکټیو بورډ منظورۍ ته به ضرورت لري.

د بورډ د منظورۍ وروسته به پاکستان ته د 37 میاشتو دپاره اووه بيلينه ډالره ورکول کيږي.

آی اېم اېف ويلي، دغه پور به د پاکستاني چارواکو لخوا د اقتصاد او ثبات او پرمختيا په لړ کې د ګامونو پورته کولو په سر ورکوي.

ايي اېم اېف وویل په دغو ګامونو کې د پاکستان مالیاتي پاليسي ښه کول، د ټېکس جال د پراخولو په لړ کې اصلاحات، د ریاستي تجارتي ادارو انتظام ښه کول، سرمایه کارۍ دپاره هوار مېدان جوړول، انساني صلاحیت ښه کول او د بېنظیر انکم سپورټ پروګرام د لاندې سماجي تحفظ او په دې کې د زیات سخاوت نه کار اخیستل شامل دي.

وي او اې ډيوه سره خبرو کې جبران سرفراز وويل، د ونډو بازار په بره تلل د مارکيټ دپاره ښه اشاره ده، بهرنۍ پانګونې به راشي، کاروباري مسلې به ورسره کمې شي.

اقتصاد پوه جرنلسټ وکیل الرحمان هم وايي، د ونډو بازار د آی اېم اېف سره د تړون له امله په بره روان دی.

خو نوموړی وايي، د ونډو بازار په بره تلو په عامه کچه ولس ته خېر نه رسي.

وي او اې ډيوه سره خبرو کې هغه وويل، پاکستان کې د پانګونو نورې لارې بندې دي، پانګه وال ټولې پانګونې د ونډو په بازار کې کوي، ځکه چې د بېنکونو په کاروبار کې زیاته ګټه نشته او د ځمکو کاروبارونه په ټپه ولاړ دي، خلک ځکه د ونډو بازار ته را روان دي.

هغه زياته کړه، عام ولس ته هغه وخت خېر رسي چې نوي کاروبارونه، صنعتونه روان شي، د روزګار موقعې په لاس ورشي، د ملک نه بهر تجارت سېوا شي، نو د ونډو بازار نېغ په نېغه په دغو شعبو کې کومه برخه نه لري.

ایا پښتونخوا کې د ترهګرۍ وروستۍ پېښې "عزمِ استحکام " عملیاتو ته د ترهګرو ډلو غبرګون دی؟

د پاکستان په خېبر پښتونخوا صوبه کې په دوؤ ورځو کې دننه د ترهګرئ په بیلابیلو پېښو کې د ۱۰ امنیتي عسکرو په ګډون د ۲۸ؤ کسانو وژنې د صوبې په امنیتي وضعه پوښتنې راولاړې کړې دي.

څېړونکي وایي په پاکستان کې د امنیتي ځواکونو له لوري د ترهګرو په ضد عملیاتو کې چټکتیا راوستل شوې چې له هغې وروسته اوس ترهګرې ډلې هم د سترو بریدونو هڅه کوي.

څېړونکي په دې اند دي چې له هر پوځي اپرېشن وروسته تندلاري په نور زیات قوت سره مخې ته راغلي دي.

د ګل- دوشنبې په ورځ د پښتونخوا په بنو چاوڼې یو ترهګریز برید شوی ؤ چې پوځ په دې برید کې د اتوؤ عسکرو وژنه تایید کړې اؤ دعوه یې کړې ده چې ۱۰ ترهګر یې هم وژلي.

پوځ پخپل بیان کې ددې برید پړه نیغ په نیغه د پاکستاني طالبانو په حافظ ګل بهادر ډله ور اړولې ده.

پاکستان په دې پېښه په افغانستان د واکمنو طالبانو حکومت ته احتجاج کړی اؤ په اسلام اباد کې د طالبانو د حکومت مرستیال چار سمبالی یا ناظم الامور خارجه دفتر ته غوښتل شوی اؤ په دې پېښه ورته احتجاجي چیټۍ یا مراسله سپارل شوې ده.

د طالبانو حکومت لا د بنو په پېښه د پاکستان احتجاج ته څه غبرګون نه دی ښودلی.

په یوه بله پېښه کې اوړمه ورځ د ډيره اسماعیل خان سره نزدې په یو کلیوال روغتیایي مرکز شوي برید کې د دوؤ ماشومانو اؤ دوؤ مېرمنو په ګډون پینځه کسان وژل شوي وؤ.

د پوځ د دعوې له مخې په ځوابي کارروایۍ کې دوه پوځیان اؤ درې ترهګر هم وژل شوي وؤ.

دا پېښې په داسې مهال مخې ته راغلي چې په دې وروستیو کې د پاکستان حکومت د ترهګرۍ د مخنیوي لپاره د عزم استحکام په نوم د نوؤ پوځي عملیاتو د پېل کولو منطوري ورکړې ده خو په خېبر پښتونخوا کې سیاسي ګوندونو اؤ مدني ټولنو ددې عملیاتو په کلکه مخالفت کړی اؤ د دې په ضد احتجاجونه هم شوي دي.

د امنیت په چارو ژور نظر لرونکی خبریال اؤ څېړونکی داؤد خټک وایي ، دا حقیقت دی چې معاملې په مذاکراتو نه حل کیږي نو بیا پوځي عملیات یوازینۍ لاره پاتې کیږي .

خو هغه وایي چې د طاقت په استعمال سره بیا هم سل په سله پایلې نه شي ترلاسه کیدای.

امریکا غږ اردو سره خبرو کې هغه ویلي چې تر دې وړاندې هم پوځ د ترهګرو په ضد یو شمیر عملیات کړي اؤ په دغو عملیاتو کې د کامیابۍ دعوې هم شوي خو د دغو دعوؤ سر بېره هم ترهګرې ډلې سر راپورته کوي.

هغه وایي پاکستان څخه د ترهګرۍ د نوغي ویستلو لپاره یوه کوټلې اؤ ګټوره تګلاره وجود نه لري.

د داؤد خټک په خبره، که وکتل شي نو په تېرو دوؤ لسیزو کې په باجوړ، مومند، خېبر، اورکزو، کورمه ، جنوبي اؤ شمالي وزیرستان کې ګڼ شمیر عملیات شوي اؤ په دې عملیاتو کې د سیمې خلک ډير زیات اغېرمن شوي هم دي.

نوموړی وایي ددې عملیاتو په نتیجه کې ځایي خلک د خپلو کورونو ، مالونو، څارویو، د بچو د تعلیم اؤ حتی له هر څه محروم شوي همدا لامل دی چې نن د پوځي عملیاتو په ضد غږ پورته کیږي.

داؤد خټک وایي که تېرو وختونو ته نظر واچول شي نو تندروه مشران نیک محمد، بیت الله مسید،حکیم الله مسید، ملا فضل الله، خالد سجنا اؤ داسې نور په امریکایي ډرون بریدونو کې وژل شوي اؤ دا خلک د پاکستان د پوځي عملیاتو نه خوندي وتلي وؤ.

د داؤد خټک په خبره ، همدا لامل دی چې خلک په پوځي عملیاتو پوښتنې راولاړوي.

د حافظ ګل بهادر ډله څومره پیاوړې ده؟

د داؤد خټک په وینا د ضرب عضب عملیاتو نه مخکې د حافظ ګل بهادر ډله هم د پاکستان د سیکیورټي اسټیبلشمنټ لپاره ګواښ نه ؤ دا ډله هم په غوره طالبانو کې شمیرل کېده.

هغه وایي حافظ ګل بهارد پخپله سیمه کې زیات اثر رسوخ لرلو اؤ هغه د القاعده اؤ د سیمې نورو تندروه ډلو سره اړیکې درلودې خو وایي کله چې د ضرب عضب عملیاتو نه وروسته د هغه د ډلې وسله وال هم افغانستان ته لاړل نو هلته یې د ټي ټي پي سره نزدیکت سیوا شو اؤ د دواړو ډلو اهداف هم شریک شول.

هغه زیاتوي چې د حافظ ګل بهادر ډله د القاعده په طرز عملیات کوي یعني په یو ځای کې د کارروایۍ په مهال وړومبی ځانمرګي برید وکړي اؤ بیا خپل وسله وال دننه کړي چې مقصد یې مخالف فریق ته زیات نه زیات زیان رسول وي.

د پاکستان د دفاع پخوانی سکتر لیفټننټ جنرال(ر) اصف یاسین وایي دهغه په دوره کې چې څومره پوځي عملیات شوي وؤ هغې ته ولسي ملاتړ ترلاسه ؤ همدا لامل دی چې نتیجې یې هم ورکړې وې.

جنرال اصف یاسین د پېښور کور کمانډر هم پاتې شوی ؤ اؤ د افغانستان د پولې سره د لګیدلو ټولو قبایلي سیمو څارنه د هغه په ماموریت کې شامله وه.

امریکا غږ سره خبرو کې هغه وایي د پوځ کار یوازې جنګیدل وي ځکه نو په هره سیمه کې له پوځي عملیاتو وړاندې د هغه ځای خلک په اعتماد کې اخستل د حکومت ذمه واري وي.

زیارت او نیلم کې د سېلانیانو ګاډي حادثو سره مخ شوي، 7 کسان مړه، 4 ژوبل

د بلوچستان د سېلګرۍ په یخه سیمه زیارت کې د سېلګرو یو ګاډي ژورې کندې ته لویدلی چې له امله یې پینځه کسان مړه شوي اؤ دوه نور ژوبل شوي دي.

د لیویز سرچینو ویلي دا پېښه د شورو یا چهارشنبې په ورځ د زیارت په ډومیاره دوزخ تنګي سیمه کې شوې ده.

د سرچینو په وینا دغلته د کوټې نه د سېل لپاره د ورغلو څو ملګرو ګاډی له ډرایوره بې قابو شوی اؤ کندې ته غورځېدلی دی.

سرچینو ویلي په پېښه کې پینځه کسان مړه شوي چې پېژندګلو یې د رحیم الدین، نجیب الدین، عبدالله، محمد اعظم اؤ عبدالمالک په نومونو شوې ده چې د کوټې د پښتون اباد سیمې اوسېدونکي وؤ.

په پېښه کې دوه تنه نور ژوبل شوي هم دي چې د علاج لپاره ضلعي روغتون ته رسول شوي دي.

د پاکستان د واک لاندې د کشمیر په نیلم وادۍ کې هم د مسافرو یو جیپ ژورې کندې ته غورځېدلی چې د رسنیو د رپورټونو له مخې دوه کسان پکې مړه شوي اؤ څلور نور ژوبل دي.

پاکستاني رسنۍ وایي چې دغه جیپ کې د کراچۍ اوسیدونکي ۱۰ سېلانیان رتي ګلۍ سیمې ته روان وؤ چې په نیلم وادۍ کې جیپ له ډرایور بې قابو شو اؤ ژورې کندې ته پرېوتو.

په پېښه کې د مړو شوؤ کسانو جسدونه اؤ زخمیان مرستندویه ادارې اؤ ځایي خلکو راویستي اؤ هسپتال ته یې رسولي دي.

د فیچ رپورټ: د پاکستان موجوده حکومت به تر یونیم کال پر ځای وي او عمران خان به زر نه خلاصیږي

د معاشي درجه بندۍ نړیوالې ادارې فیچ د پاکستان په اړه خپل رپورټ کې اټکل کړی چې ددې هیواد موجوده حکومت تر یو نیم کال پځای پاتې کیدای شي اؤ که حکومت بدل شوي نو بیا د سره به ټولټاکنې نه کیږي بلکې د ټیکنوکریټانو حکومت به جوړیږي.

په رپورټ کې ویل شوي د تحریک انصاف ګوند باني عمران خان به په نزدې راتلونکي کې له بنده نه خلاصیږي اؤ دا چې د پاکستان په ښارونو کې احتجاجي مظاهرې د هیواد معاشي فعالیتونه اغېزمنولی شي.

د فیچ په رپورټ کې ویل شوي چې د پاکستان معاشي بحالي د نازک صورتحال سره مخ ده اؤ سیاسي صورتحال د معیشت مخې ته ډب کیدای شي.

د رپورټ تر مخه د پاکستان د معیشت لپاره د بهرنیو اداییګیانو فشار یا دباؤ معاشي خطره ده اؤ د زراعت لپاره سیلاب اؤ وچکالي معاشي خطره ده .

یادې ادارې ویلي چې موجوده حکومت به د آي ایم ایف سره په ګډه ټول معاشي اصلاحات کوي.

د رپورټ له مخې د پاکستان د حکومت سختې معاشي پرېکړي آي ایم ایف سره پروګرام ته لاره هواري .

د فیچ رپورټ وایي چې د روان مالي کال تر پاي پاکستان کې د ګرانۍ لوړېدو کچه راکمیدای شي اؤ هیله ده چې د مالي کال تر پاي به د پاکستان د دولتي بینک د سود کچه هم ۱۴فیصده ته راټيټه شي.

د رپورټ تر مخه د پاکستان حکومت په بجټ کې سخت معاشي اهداف ټاکلي دي اؤ حکومت مالیاتي خساره د ۷.۴ نه راکمول اؤ ۶.۷ ته راوستل غواړي.

فیچ پخپل رپورټ کې اټکل کړی چې د روان کال تر پاي د ډالر بیعه ۲۹۰ روپو اؤ تر کال ۲۰۲۴م ۳۱۰ روپو ته لوړیدلی شي.

فیچ ویلي دي د آي ایم ایم پروګرام لاندې د بجټ اهداف ترلاسه کول ګران ښکاري.

تر دې وړاندې د درجه بندۍ نړیوالې ادارې موډيز هم په خپل رپورټ کې ويلي وؤ که څه هم د آي اېم اېف سره د نوي پروګرام له کبله به د پاکستان له لوري د نورو هېوادونو او ګڼ اړخيزه مالياتي ادارو څخه په فنډونو ترلاسه کولو کې غوره والی راشي خو د حکومت سره د مضبوط انتخابي منډېټ د نيشتوالي له امله د حکومت لخوا اعلان کړی شوؤ اقتصادي اصلاحاتو باندې عمل کېدل ګران ښکاري.

موډيز په خپل رپورټ کې ويلي چې ددې هېواد لپاره د نړیوالې مالياتي ادارې آي اېم اېف نوی پروګرام به د بهرنيو مالیاتي همکاریو غوره سرچینې رابرڅېره کړي خو ورسره یې اندېښنه څرګنده کړې چې په پاکستان کې د ګرانۍ له کبله ټولنيز تناو هم سېوا کېدای شي.

موډيز ویلي د زياتو ټېکسونو او د توانايۍ په نرخونو کې پرله پسې اضافه د پاکستان د حکومت لخوا اعلان کړی شوؤ اصلاحاتو باندې هم فشار اچولی شي.

تېره اوونۍ نړیوالې مالياتي ادارې آي اېم اېف پاکستان لپاره د 7 اربه ډالرو د قرض پروګرام منظوري ورکړې ده.

د 37 مياشتو د دې قرض پروګرام لاندې به آي اېم اېف پاکستان دا رقم په قسط وار ډول ورکوي.

اقتصاد پوهان وايي، و به کتل شي چې حکومت د اصلاحاتي اېحنډې لاندې واړه کاروبار کوونکي څنګه د ټېکس په داېره کې راولي، د ټېکسونو جال په کوم ډول پراخوي او د زيان سره مخ حکومتي محکمې څنګه شخصي څانګې ته سپارل کېږي .

ډیوه سره خبرو کې اقتصاد پوهه ډاکټر عابد قیوم سلهري ویلي"ښکاره ده چې ددې ټولو ګامونو پورته کولو بد اثر به د تېغ په نېغه او بلواسطه ټېکسونو په شکل کې په عوامو پرېوځي، هلته بيا د ولس او حکومت ترمنځ خامخا تناو مخې ته راځي".

ډاکتر عابد قيوم سلهري وایي ، د بده مرغه د پاکستان حکومت دا وخت د يو مشکل صورتحال سره مخ دی، چين، سعودي عرب او متحده عرب امارات تر هغې پورې د پاکستان حکومت ته مالي اسانۍ نه ورکوي تر څو چې د آي اېم اېف سره لوظنامه لاسلیک نه شي.

نور کتل

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00
XS
SM
MD
LG