د صحت نړيوالې ادارې ډبليو اېچ او د خېبرپښتونخوا د حکومت چارواکي وايي په خېبر پښتونخوا کې به د دې مياشت په شلمه نېټه د کرونا وبا له وجې ځنډېدلی د پوليوضد کمپېن به بيا پېل کيږي.
په پاکستان کې د مارچ مياشت نه راپدېخوا د کرونا وبا خوريدو له عمله د پوليو ضد قطرې ورکولو کمپېنونه ځنډيدلې وو.
په خېبر پښتونخوا کې د ډبليو اېچ او تېکنيکي صلاح کار ډاکټر سرفراز افريدي ډيوه ته وويلي دا کمپېن به په اولني پړاؤ کې يواځې په جنوبي وزيرستان کې وي او ۹۵ زره د پينځو کالو نه کم عمر ماشومانو ته به قطرې ورکول کيږي۔
ډاکټر سرفراز وايي د قطرې ورکونکي ټېمونه به د کرونا وايرس نه ځان ساتنې ټول اختياطي تدابير خپلوي
"د لوي اختر نه پس په نورو ضلعو کې هم د پوليو ضد قطرې وکولو پلان لرو چې د کرونا وبا خوريدو کچې ته په کتو سره به نېټې اعلانو، که د کرونا خوريدو کچه هم دې موجوده وخت شان وه نو تمه ده چې د نورو کمپېنونو نېټې به اعلان شي "
ډاکټر سرفراز زياتوي جنوبي وزيرستان کې په نزديو کې د پوليو کېس هم رپورټ شوې وو او د نورو سيمو په نسبت پکې د کرونا کېسونه کم دي نو ځکه يي د اولني کمپېن د پاره د دغې سيمې انتخاب کړې دي.
د جنوبي وزيرستان اېډيشنل ډپټي کمېشنر فريدالله ډيوه ته وويلي د صحت محکمې، امنيتي ادارو او ضلعې انتظاميه لخوا د کمپېن پورا تيارۍ نيولي دي.
" زمونږ ټولو متعلقه ادارو خپلې تيارۍ پورا کړې او خپل مينځ کې په رابطه کې دي "
څيړونکي وايي د تېرو کلونو په نسبت روان کال په پاکستان کې د پوليو کېسونه زيات شوي دي، په کال ۲۰۱۷ کې اته، کال ۲۰۱۸ کې ۱۲ ، په کال ۲۰۱۹ کې ۱۴۷ کېسونه او کال ۲۰۲۰ کې تر اوسه ۶۰ د پوليو کېسونه رپورټ شوي دي.
