د پاکستان پارلماني مشرانو د سې شنبې په ورځ وړاندیز کړی چې په ملي اسامبلۍ کې دې د پنجاب نهه څوکۍ (سیټونه) کم کړای شي.
پدې اړه د پارلماني مشرانو غونډه وروسته له هاغې وشوه کله چې د حکومت کابینې د اکټوبر په ۲۵ نېټه پارلمان ته د نوې حلقه بندۍ (د وګړو په تناسب پنجاب ته د زیاتو څوکیو ورکولو) یوه قانوني مسوده واستوله.
په کابینه کې د لومړي وزیر شاهد خاقان عباسي په مشرۍ په پارلمان کې د وکیلانو د څوکیو په زیاتوالي باندې خبرې شوې وې.
دغه قانوني مسوده بیا پارلمان ته د بحث او خبرو اترو لپاره واستول شو.
د سې شنبې د ورځې په غونډه کې، چې د ملي اسامبلۍ د مشر ایاز صادق په مشرۍ جوړه شوې وه، پارلماني مشرانو په ایالتونو باندې د څوکیو د بیا وېشلو وړاندیز وکړ، بې له دې چې د اسمبلۍ د څوکیو په شمېر کې څه زیاتوالی یا کموالی راشي.
پدغو خبرو کې پارلماني مشرانو وغوښتل چې د پنجاب نهه څوکۍ دې کمې کړای شي او پر ځای دې د خیبر پښتونخوا پنځه او د بلوچستان درې څوکۍ زیاتې کړای شي.
په وړاندیزونو کې دا هم راغلي وه، چې د پلازمینې اسلام اباد دې هم یوه څوکۍ زیاته شي خو د سیند د صوبې څوکۍ به په خپل اوسني شمېر کې پاتې کېږي.
د سې شنبې د ورځې د پارلماني مشرانو په دغې غونډه کې په اسامبلۍ کې د مخالفینو مشر خورشید شاه، په ملي اسامبلۍ کې د جمعیت اسلامي مشر صاحب زاده طارق الله او د عوامي نشنل پارټۍ مشر حاجي غلام بیلور د نورو ډلو له مشرانو سره موجود وو.
په غونډه کې د پاکستان پیپلز ګوند او د متحده قومي پي تحریک غړو وویل که د دوي اندېښنو ته ځواب وه نه ویل شي نو دوی به دا مسله په محکمه کې په حقوقي توګه تعقیب کړي.
