د ایران خارجه وزیر حسین امیر عبداللهیان به د جنورۍ په ۲۹ نېټه د پاکستان دوره کوي. دا خبره د پاکستان خارجه وزارت کړې ده.
د ایران سرکاري خبري ادارې ایرنا وویل عبداللهیان د خپل پاکستاني هم منصب جلیل عباس جیلاني د دواړو ملکونو تاوتریخوالی د ختمولو په اړه خبرې هم وکړې.
د پاکستان خارجه وزارت د ګل، دوشنبې، په ورځ په یو بیان کې وویل دواړه خارجه وزیران په دې هم متفق شول چې د دواړو ملکونو سفیران به هم د جنورۍ په ۲۶ نېټه د یو بل ملکونو ته ستانه شي.
د پاکستان او ایران تعلقات پس له دې د تاوتریخوالي ښکار شول چې ایران تېره هفته وویل ځواکونو يې د پاکستان په پنجګور سیمه کې د جېش العدل نومې وسله والې ډلې دوه مرکزونه په ډرون او مزایلو وويشتل. پاکستان د ایراني د حملې غندنه وکړه او ویې وېل په حمله کې دوه ماشومان ووژل شوو او ګڼ شمېر نور ملکي کسان زخمیان شول.
د ایراني حملې نه یوه ورځ وروسته، پاکستان اعلان وکړو چې ایران نه خپل سفیر ستنوي او په اسلام اباد کې ایراني سفیر ته یې ملک نه د وتلو امر کړی دی.
د زیارت، پنجشنبې، په ورځ پاکستان وویل په "مرګ برسرمچار" عملیاتو کې یې د ایران په خاوره د ترهګرو پټن ځایونه وېشتلي دي. ایران وویل د پاکستان په حملو کې نهه غېر ملکیان وژل شوي چې زیاتره ښځې او ماشومان دي.
د ایران او پاکستان ترمنځ شخړې راپورته کېدو په نړیواله کچه د تشویش اظهار شوی و او د دواړو ملکونو نه غوښتنه شوې وه چې د زغم نه کار واخلي.
د جمعې په ورځ د پاکستان خارجه وزارت وویل چې جېلاني د عبداللهیان سره په ټېلې فون خبرې وکړې، دواړه وزیران متفق شول چې تاوتریخوالی به ختم کړي، سفارتي تعلقات به بحال کړي او د دواړو خارجه وزیران به د یو بل ملکونو ته دورې وکړي.
ایران او پاکستان قریباً 900 کلومېټر مشترک سرحد لري او د دواړو ملکونو په سرحدي سیمو کې د کلونو راهسې بېلتون خوښتونکي ډلې او سمګلران فعالیتونه لري. دواړه ملکونه په یو بل دا الزام هم لګوي چې په پوله د امنیت مناسب انتظام نه کوي
Forum