په بلوچستان کې له دوو مياشتو د ځنډ وروسته د ګوزڼ يا پوليو ضد کيمپېن د ګل، دوشنبې، په ورځ پېل شو، چې پرانيسته يې د صوبې په مرکز کوټه کې د روغتيا صوبايي سېکرټري وقاص علي محمود وکړه.
ښاغلي وقاص ماشومانو ته له څاڅکو ورکولو او د کېمپېن له پرانيستې وروسته خبري کانفرنس ته وويل، که څه هم په بلوچستان کې په تېرو دوو کلونو کې د پوليو مثبت کېس نه دی رپوټ شوی خو البته په نورو صوبو کې د پوليو مثبت کېسونه رپورټ کېدل د بلوچستان لپاره يو چېلنج دی.
په بلوچستان کې د پولیو ضد اوسنی کيمپېن په اتلسو ضلعو کې ترسره کېږي، چې په کې شاوخوا پنځه زره ګرځنده ټيمونه برخه اخلي.
روغتيايي ټيمونه به د صوبې په ښاري یا شهري او کليوالو سيمو کې دولس لکه دوه شپېته زره ماشومانو ته د پوليو ضد قطرې ورکوي.
له وي او اې ډيوه سره په خبرو کې د بلوچستان د روغتيا د بېړنيو عملياتو د دفتر يا اي او سي مشر سيد زاهد شاه وايي، چې په بلوچستان کې اوسنی کيمپېن په دوو برخو وېشل شوی، په کوټه کې کېمپېن د لوبو د سيالیو له امله ځنډول شوی، خو د جون له لومړۍ نېټې به پيل کېږي.
هغه وویل"اوسنی کيمپېن تېره مياشت ځنډول شوی وو، که څه هم د ځنډېدلو منفي اغېز پرېوزي، خو البته ډېر وخت نه دی تېر شوی. دا کيمپېن په اتلس ضلعو کې دی، په کوټه کې کيمپېن د نېشنل ساليو له امله نه ترسره کېږي، چې راتلونکې مياشت کې ترسره شي."
د پاکستان په اته اوويا ضلعو کې د پوليو ضد اوسنی کيمپېن ترسره کېږي. دا کيمپېن ځکه هم مهم دی، چې د پاکستان او ګاونډي افغانستان چارواکو په يو وخت د پوليو کيمپېن ترسره کولو پرېکړه کړې ده.
په نړيواله کچه پاکستان او افغانستان د پوليو وايرس له پلوه په يو بلاک کې شامل هيوادونه دي.
