د پاکستان د بلوچستان صوبې چارواکي وايي په نوشکي ضلع کې يې د قطر د شاهۍ کورنۍ اووه غړي نيولي ځکه چې د چارواکو په وېنا دوی په غېرقانونه توګه د څاړي مرغه ښکار ته روان وو.
د وي او ای ډيوه خبریال حفيظ الله شېرانی وايي د نوشکي تحصيلدار عرفان خلجي ورته ویلي چې دغه " اووه کسان چې تعلق يې د قطر د شاهي کورنۍ سره ؤ هغه په خپله نيولي، دوه شپې يې د دوی سره تېرې کړي او بيا يې د قطر سفارتخانې ته سپارلي دي".
هغه وويل "دغو کسانو پاکستان ته د راتګ قانوني اسناد لرل خو د ښکار اجازه یې نه لرله ځکه يې نيولي دي".
د خلجي په وېنا د دغو کسانو کوربه "عارف بادينې نومې تن يې نيولی او مقدمه يې پرې درج کړې ده".
نياز کاکړ چې د بلوچستان صوبې د ځنګلي ځناورو د ساتنې د محکمې مرستیال مشر دی، هغه ویلي "مرکزي حکومت سږ کال يواځې دوه عرب شېخانو ته د څاړي مرغه اجازه ورکړې يو د ډېره بګټي او بل د جهل مګسي دپاره".
هغه وويل دغه اجازت نامې "د يو لاک ډالرو په بدل د سل (۱۰۰) څاړو مرغانو د ښکار د اجازت دپاره ورکړی شوي دي".
د نوموړي په وېنا "تراوسه پورې د ښکار د اجازت دپاره ټول ۱۸ خواستونه مرکزي حکومت ته ترلاسه شوي او د بلوچستان حکومت لخوا په شريکه دا اجازت نامه ورکول کيږي".
د کاکړ په خبره "په اجازت نامه ترلاسه کېدونکې پېسې د بلوچستان ایالت د ځنګلي ځناورو د محکمې په خزانه کې جمع کولی شي".
