د امریکې د دفاع وزیر لواېډ اسټن ویلي که چېرې روسي ځواکونه د اوکراین مشرقي ښار پخموت په نیولو کې کامیاب شي نو دا به په جګړه کې څه فېصله کن بدلون نه وي ځکه چې بخموت سټرېټيجېک نه بلکې علامي اهمیت لري.
د ګل، دوشنبې، په ورځ د اردن د سفر په مهال اسټن خبریالانو ته وویل چې هغه فکر نه کوي چې بخموت څه سټرېټيجېک اهمیت لري.
د اوکراین په دونباس سيمه کې په بخموت ښار د تېرو څو میاشتو راهسې سخته جګړه دوام لري او روسي ځواکونه يې د نیولو کوښښونه کوي.
اسټن وویل د اوکراین دا فېصله به پسپايي نه ګڼي چې د ځواکونو ځای يې بدل کړی او د بخموت مغربي لور کې يې ځای په ځای کړي دي.
هم د ګل، دوشنبې، په ورځ اوکرایني ځواکونو وویل چې روسي ځواکونو په اوکراین د ډرون تازه حملې کړي دي.
د اوکراین د دفاع وزارت په یو ټویټ کې وویل چې د روس ۱۳ ډرون جهازونه يې غورځولي دي.
په اوکراین په هدفونو د غورځولو دپاره روس د ایران جوړ شاهد ډرون جهازونه استعمال کړي دي.
د روس د دفاع وزیر سرګی شوېګو د ګل، دوشنبې، په ورخ په جنوبي اوکراین کې روسي عسکرو سره ملاقاتونه کړي او د یو طبي مرکز دوره يې وکړه.
د روس د دفاع وزارت وویل شوېګو په د مارېیوپل ښار هم دوره وکړه چې د ښار د بیا ابادولو هلې ځلې وګوري. روسي ځواکونو ماريیوپل تېر کال په بمبارۍ تباه کړی دی.
یادونه: د دې خبر معلومات د ای پي او روېټرز خبري ادارو نه اخیستل شوي دي
