د پاکستان د قامي سلامتیه کمیټۍ ویلي د هیواد په اړه د امریکايي چارواکو ورستي بیانونه د مایوسۍ سبب دي او د دواړو هیوادونو ترمنځ اعتماد ته سخت نقصان رسوي.
د نیشنل سکیورټي کمیټۍ غونډه د نهې، سه شنبې، په ورځ د وزیراعظم شاهد خاقان عباسي په مشرۍ کې په داسې وخت وشوه چې یوه ورځ وړاندې د امریکې صدر ډانلډ ټرمپ د نوي کال په وړمبۍ ورځ په ټوېټر خپل وړمبي پیغام کې د ترهگرۍ خلاف جنگ کې د پاکستان په کردار سخت تنقید وکړو.
صدر ټرمپ وویل په تیرو ١٥ ؤ کلونو کې د ٣٣ ارپ ډالرو نه زیاتو پېسو اخیستلو په بدل کې ورسره پاکستان د دروغو او د درغلۍ نه کار اخیستی دی او په خپله خاوره یې هغه وسله والو ته پناه ورکړې ده چې امریکايي ځواکونه ورسره په افغانستان کې په جنگ کې ښکیل دي.
د پاکستاني کمیټۍ د غونډې ورسته مطبوعاتو ته جاري شوی بیان وايي کمیټۍ د پاکستان په اړه د امریکايي رهبرانو په بیانونو د "ژورې مایوسۍ" څرگندونه وکړه.
بیان وايي د اگست په میاشت کې د افغانستان او د جنوبي ایشیا لپاره د صدر ډانلډ ټرمپ د تگلارې د اعلانیدو ورسته دواړه هیوادونه په افغانستان کې د امن په لړ کې د یو بل په دریځ ښه پوه شوي وو خو د امریکايي مشرانو ورستۍ څرگندونې د پام څخه بهر دي او د دواړو هیوادونو ترمنځ اعتماد ته سخته ضربه رسوي.
بیان وویل پاکستان په افغانستان کې د امریکې په مشرۍ کې د نړي والو کوښښو ملاتړ کوي.
بیان وویل په افغانستان کې د موجوده مشکلاتو بنیادي په جنگ ځپلې هیواد کې د کوردننه سیاسي جگړې، په لویه پیمانه اداري فساد، د نشۍ موادو پیداوار او په هیواد کې د حکومت د واک اختیار څخه بهر پرتې سیمې دي.
"په افغانستان کې د اجتماعي ناکامۍ ذمه واري په پاکستان نشي اچول کیدی او په ملگرو الزام لگول په افغانستان او په سيمه کې د دوام داره امن هدف ترلاسه کولو کې مرسته نه کوي،" بیان زیاتوي.
د الزاماتو باوجود پاکستان به د بیړې نه کار نه اخلي او په افغانستان کې د امن لپاره به خپل "مثبت" کردارا ادا کوي، بیان زیاته کړه.
د کمیټۍ بیان وايي د ترهگرۍ پرضد د پاکستان د کوښښونو په نتیجه کې په افغانستان کې موجود وسله والې ډلې خپل فعالیتونه نشي زیاتولی. بیان وايي امریکايي مامورینو هم په افغانستان کې د گڼ شمیر وسله والو ډلو د موجودگۍ خبره تسلیم کړې ده.
امریکايي او افغان مامورین د ډیر وخت راهسې وايي چې د افغان طالبانو مشران او په خصوصي توگه حقاني ډله په پاکستان کې پناه ځایونه لري او د هلته څخه په افغانستان کې ناامني راپاروي. پاکستان دا خبره ردوي.
