د امریکې په صدارتي انتخاباتو کې درې هفتې وخت پاتې دی او د واک من ريپبلېکن پارټۍ صدر ډانلډ ټرمپ او د نومبر په دریمه نېټه کېدوونکو ووټونو کې د ډېموکرېټک پارټۍ د هغه مخالف جوبایډن دواړو توجه په فلوریډا، اوهایو او پېنسلوېنیا ریاستونو کې په حمایت ترلاسه کوولو ده.
صدر ټرمپ چې د صدارت د دویمې دورې دپاره په انتخاباتو کې ولاړ دی د ګل، دوشنبې، په ورځ یې په سېنفرډ فلورېډا کې انتخابي جلسې ته وویل یوه کرپټ سیاسي طبقه په هر حال کې ځان بیا اقتدار ته رسول غواړي "خو مونږ د دوی په لاره کې ولاړ یوو."
صدر ټرمپ وویل جو بایډن د ډېموکرېټک پارټۍ واک اختیار سوشلسټانو، مارکسسټانو او د ګس لاس نظریه لروونکو سخت دریځو ته ورکړی دی.
به کرونا وایرس د ناروغه کېدو او په هسپتال کې د څو ورځو تېرولو نه پس په فلورېډا کې دغه د صدر ټرمپ لومړۍ انتخابي جلسه وه. د وي او ای د انګریزۍ څانګې رپورټ وايي د فلوریډا په جلسه کې د زرګونو په شمېر کې کسان موجود وو خو ډیرو لږو خلکو پکې ماسکونه لګوولي وو.
کله چې صدر ټرمپ فلورېډا ته په لاره وو نو د هغه معالج ډاکټر شان کانلي وویل د صدر ټرمپ د کرونا وایرس ورستي تېسټ منفي وو او دا چې هغه نورو خلکو ته وایرس نشي منتقل کولی. بلخوا پخوانی نایب صدر جوبایډن د ګل، دوشنبې، په ورځ په اوهایو کې و. د اوهایو په ټولیډو ښار کې د موټرو په کارخانه کې د کارکوونکو غونډې ته جوبایډن وویل د امریکې ولس خپلې سترګې خلاصې کړي دي. هغه وویل امریکایانو ولیدل چې د کرونا وایرس، اقتصاد کړکېچ، نسلې عدم مساوات او په نړیواله څه وکړی شول. هغه زیاته کړه امریکایان اوس بدولون غواړي.
د نهې، سه شنبې، په ورځ بایډن په فلوریډا کې او صدرټرمپ په پېنسلوېینیا کې جلسو ته وېنا کوونکي وو.
د رییل کلیر پالېتېکس ادارې ترمخه جوبایډن په پېنسلوېنیا کې په صدر ټرمپ د اووه فیصد پواینټ بری لري. دا ریاست په انتخاباتو کې ډیر اهم ګڼل کیږي. د ادارې ترمخه په فلورېډا کې جوبایډن په صدر ټرمپ د درې اشاریه اووه فیصد برتري لري.
خو صدر ټرمب دغه نظر پوښتنې رد کړې او د ګل، دوشنبې، په ورځ یې په فلورېډا کې جلسې ته وویل د څلور کاله په مقابل کې دا وخت یې خلک زیات حمایت کوي.
په اوهایو ریاست کې د دواړو امیدوارانو مقابله برابر ګڼل کېږي. د کال ۲۰۱۶ په انتخاباتو کې صدر ټرمپ د ډېموکرېټک پارټۍ هغه مخالفې هېلري کلنټن ته به اته فیصد پواینټونو ماتی ورکړی و. په فلورېډا او پېنسلوېنیا کې هم صدر ټرمپ هېلرې کلنتڼ ته ماتی ورکړی و.
