د افغانستان په شمال خيتز کې د تخار ولايت (صوبې) لرې پرته درقد ولسوالي (ضلع) طالب وسله والو نيولې ده .
د تخارد امنيتي مشر وياند عبدالخليل اسير وئيلي نن د شورو په سهار وختې طالبانو په درقد ضلع حمله کړې او ضلع يې په خپله ولقه کې اخيستې ده .
نوموړي وئيلي په ضلع کې ملي او محلې پوليس موجود ؤ چې کره شمېره يې نه ده وئيلي ، خو زياته کړې يې ده پوليس د ضلعې بيرته نيولو دپاره منصوبه بندي کوي .
د افغان خبري ادارې پژواک ترمخه د ضلعې نيول کېدو په مهال څلور امنيتي عسکر او يو شمېر طالبان هم وژل شوي دي .
خبري اداره د تخار د چارواکو له قوله وايي چې امنيتي ځواکونوپه تکنيکي توګه شاته تګ کړی دی او که څه وخت وغواړي ضلع بيرته نيولی شي .
د تخار د ګورنر وياند سنت الله تيمور وئيلي چې په درقد کې د 200 نه زيات ملي او محلې پوليس موجود وو ، خو د دشت ارچي ضلعې نه هم طالبان درقد ته اوختي او په ضلع يې ډله ييز بريد کړی دی .
نوموړي وئيلي په ضلع د جګړې په مهال پينځه محلي پوليس وژل شوي دي .
طالبانو وئيلي د درقد د نيولو په جګړه کې دولس پوليس او دوه طالبان وژل شوي دي .
تخار د افغانستان په شمال ختيزکې تاجکستان سره پرته صوبه ده چې ختيز لوري ته يې بدخشان، جنوب ته پنجشېر او لوئيديز ته کندوز او بغلان صوبې پرتې دي .
