د عوامي نیشنل ګوند د خېبرپښتونخوا د اطلاعاتو سېکتر او د پي کی ۷۸حلقې کانديد هارون بشير بلور باندې تېره شپه د پېښور په يکه توت سيمه کې د شوي ځانمرګي بريد زمه واري پاکستاني طالبانو ومنله.
د پاکستاني طالبانو ناقانونه ګرځول شوې ډلې ويلي هارون بلور يې ځکه په هدف کړو چې هغه د بشير بلور زوی ؤ.
د هارون بلور په پلار بشير بلور باندې هم په کال ۲۰۱۲م کې پاکستاني طالبانو په پېښور کې ځانمرګی بريد کړی او هغه يې پکې وژلی ؤ.
عوامي نيشنل ګوند د هارون بلور په وژنه د درېو ورځو ماتم اعلان وکړو او د ګوند د خېبرپښتونخوا صوبې سيکرټري جنرال سردار حسېن بابک وي او ای ډیوه سره په خبرو کې وويل درې ورځې به دوی هيڅ ډول سياسي هلې ځلې نه کوي.
د کال ۲۰۱۳م د اپرېل په مياشت کې هم په پېښور کې د عوامي نيشنل ګوند په يو انتخابي لاريون يو ځانمرګی بريد شوی چې پکې ۱۵تنه وژل شوي او د ګوند مشر غړي غلام احمد بلور په ګډون پکې نزدې ۵۰ تنه ژوبل شوي وو.
د پاکستاني طالبانو تحريک د دغه بريد زمه واري منلې او د هغه وخت طالب وياند احسان الله احسان چې دا وخت د پوځ سره په بند کې دی ویلي ؤ چې د دوی هدف هارون بلور ؤ.
په هارون بلور هم تېره شپه د پېښور په يکه توت سيمه کې د انتخابي جلسې په مهال ځانمرګی بريد شوی دی.
په ياد بريد کې د هارون بلور په ګډون ۲۰تنه وژل شوي او ۴۸ نور ژوبل شوي دي.
له دې نه علاوه هم په عوامي نيشنل ګوند د زياتو بريدونو او چاؤدنو زمه وارۍ پاکستاني طالبانو منلي دي.
د پاکستان لنډ مهاله حکومت، سياسي مشرانو، د پوځ مشر ، بهرنيو سفيرانو او د ټولنې د هرې طبقې سره تعلق لرونکو خلکو په هارون بلور د ځانمرګي برید په سختو ټکو کې غندنه کړې ده.
پېښور کې په هارون بلور ځانمرګی بريد په داسې حال کې شوی چې دوه ورځې وړاندې په پاکستان کې د ترهګرۍ د مخنيوې ادارې (نېکټا) ویلي د سياسي ګوندونو شپږو سياستمدارو ته د ترهګرو بريدونو ګواښونه دي، په دغو شپږو سياستمدارو کې پينځه پښتانه دي.
د نېکټا مشر عبید فاروق، د سېنېټ قایمه کمېټۍ ته په وینا کې د دغو شپږو سیاستوالو نومونه ويلي چې پکې "د پاکستان تحریک انصاف مشر عمران خان، د عوامي نيشنل پارټۍ مشران اسفندیار ولي خان او امیر حیدر هوتي، د قامي وطن پارټۍ مشر افتاب شېرپاو، د جمعیت علمااسلام (ف) یو مشراکرم خان درانی، او د حافظ سعید زوی، طلحه سعید" شامل دي.
په دغو کسانو کې له طلحه سعید پرته چې هغه د تندلاري حافظ سعید زوی او پنجابی دی، پينځه نور ټول پښتانه سیاستوال دي.
د نېکټا مشر ویلي ؤ د کورنيو چارو مرکزي او صوبايي وزارتونو ته يې په دغه اړوند د ګواښ ۱۲ خبرتياوې ورلېږلي دي.
په هاورن بلور د بريد وروستو د عوامي نيشنل ګوند مشرانو ويلي د سترې محکمې د مشر قاضي په امر د هارون بلور نه ساتونکي بیرته اخستل شوی او زمه وار چيف جسټس دی.
