د پاکستان دولت په ملک کې د عامو انتخاباتو په مهال د افغانستان سره د چمن او خرلاچي ترڅنګ د انګور اډې او غلام خان لارې تړلي دي.
د پاکستان د بهرنیو چارو د وزارت وياند محمد فېصل ويلي په ملک کې د عامو انتخاباتو په مهال به نن د نهې، سه شنبې او سبا د شورو، چهارشنبې په ورځ د چمن او خرلاچي پولې تړلې وي.
نوموړي ویلي يواځې د تورخم لاره به خلاصه وي په دغه لار به هر ډول تګ راتګ کيږي.
د تورخم پرته نورې لارې د هر ډول تګ راتګ دپاره تړل شوي دي.
د بلوچستان صوبې د چمن ضلعې څخه د ډيوه خبريال نعمت الله سرحدی خبر راکوي چې د افغانستان سره په پوله پرته درېو ضلعو قلعه عبدالله، پشين او مستونګ کې د انټرنېټ د تهري جي او فورجی سروس هم بند کړی شوی دی.
پاکستان کې چارواکي وايي د انتخاباتو په مهال کلک امنیتي ګامونه پورته کړی شوي او د امنيت دپاره د پوليس او پوځ نزدې اته لاکه سرتيري په ځای کړی شوي دي.
د پاکستان پوځ نزدې لس ورځې وړاندې ویلي ؤ چې افغان صدراشرف غني د پاکستاني پوځ مشر جنرال قمر جاوېد باجوه ته پاکستان کې د ټاکنو په مهال د افغانستان له لوري د پولي د امنیت زیاتولو ډاډ ورکړی دی.
اشرف غني د پاکستان د پوځي مشر او لنډ مهاله وزيراعظم ناصرالملک سره د انتخابي کمپاين په مهال د ترهګرۍ په پېښو کې د خلکو په وژنه د غمرازۍ دپاره په ټيليفون خبرې کړې وې.
پاکستان کې روانه مياشت د انتخابي کمپاين په مهال په ځانمرګو بریدو او چاؤدنو کې د درېو کانديدانو په ګډون د ۱۵۰ نه زيات کسان وژل شوي او په سوؤنو نور ژوبل شوي دي.
