لاس رسیدونکی لینک

Breaking News

عمران خان د مالي مرستو ترلاسه کولو د اوازو سره د سعودي عرب په سفر دی


د پاکستان وزیراعظم عمران خان د سعودي عرب دوه ورځنی سفر په داسې حال کې کړی چې په نړیوالو او ځايي مطبوعاتو داسې اوازې دي چې نوموړی خان د سعودي عرب نه مالي مرستو غوښتو له تللی تر څو خپلې اقتصادي ستونزې راکمې کړي.

عمران خان پرون د نهې، سه شنبې په ورځ د پلاوي سره مدينې ته رسېدلی دی. د پاکستان د دولتي ميډيا ترمخه نوموړي عمره ادا کړې، د پېغمر (ص) روزې او مسجد نبوي ته ورغلی دی.

د پاکستان د بهرنيو چارو وزارت په وېنا عمران خان د باچا سلمان په بلنه سعودي عرب ته سفر کړی او دا د نوموړي د وزيراعظم جوړېدو وروستو د بل کوم هېواد لومړی سفر دی.

عمران خان په داسې حال کې د سعودي عرب سفر کړی چې پرون د خزانې وزير اسد عمر پارليمان ته د ضمني بجټ تجويزونه وړاندې کړي او ويلي يې دي د دغه کار هدف يې د پاکستان مرګونی اقتصاد په سمدستي ډول راژوندی کول دي.

رويټرز خبري ادارې ويلي، عمران خان د سعودي عرب سفر په داسې حال کې کړی چې ورسره دا اوازې تړلي دي نوموړی نړيوالې مالياتي ادارې (ايي اېم اېف) ته د تلو په ځای په لټه کې دی چې د خپل اتحادي نه اقتصادي مرستې ترلاسه کړي.

رويټرز ويلي، په کال ۲۰۱۴م کې هم د ايي اېم اېف نه د قرضې اخيستو شپږ میاشتې وروسته سعودي عرب ـ پاکستان ته ۱.۵ اربه ډالره ورکړي، کوم چې د هغه وخت د مسلم ليګ ن حکومت د خپلې روپۍ د پياوړتيا دپاره کارولې وې.

وال سټريټ جنرال په خپل رپوټ کې ليکلي، د اسد عمر په پارليمان کې د بجټ وړانديزونو سمدست وروسته عمران خان د سعودي عرب سفر کړی، ښاغلي عمر ويلي د سعودي عرب سره به د " سوداګرۍ او پانګونو د فرصتونو" برابرولو په سر خبرې وکړي.

خو نوموړي د هغو اوازو په اړوند څه نه دي ويلي چې سعودي عرب به يې اقتصادي مرسته کوي.

ډان هم په خپل رپوټ کې د دغو اوازو يادګېرنه کړې ده.

په رياض کې د سعودی عرب سفارتخانې ویلي، وزیراعظم عمران خان به نن د سعودي عرب باچا سلمان او ولي عهد محمد بن سلمان سره وويني.

بيان کې ويل شوي ښاغلی خان به د سعودي چارواکو سره د دوه اړخيزه اړيکو په ارزښت، سیمې او نړيوالو مسلو باندې خبرې وکړي.

وزیراعظم سره د سعودي عرب په سفر کې د بهرنيو چارو وزير شاه محمود قرېشي، د خزانې وزير اسد عمر، د اطلاعاتو وزير فواد چوهدري او اقتصادي مشاور عبدالرزاق داؤد ملګري دي.

ويل شوي وزيراعظم عمران خان به نن ماښام متحده عرب اماراتو ته سفر وکړي.

XS
SM
MD
LG