لاس رسیدونکی لینک

Breaking News

پاکستان کې ژورنالسټان د رياستي ادارو د ګواښونو سره مخ دي، راپور


پاکستان کې د ژورنالسټانو یو سازمان (پاکستان فېډرل يونين اف جرنلسټس، پي اېف يو جی) په يوه ناسته کې ژورنالسټانو ويلي، "دوی د رياستي ادارو د ګواښونو سره مخ دي کومې چې د رسنيو ازادي غلې کول غواړي".

د پي اېف يو جي د سيوري لاندې په اېبټ اباد کې جوړې شوې غونډه کې د رياستي ادارو لخوا غېر اعلاني سنسرشپ، د ژورنالسټانو پرضد د غدارۍ د مقدمو جوړولو، د خبري ادارو نه د خبريالانو ويستلو او هغوی ته د تنخواګانو نه ورکولو پرضد په نهم اکتوبر په ګرد هېواد کې د احتجاجي مظاهرو اعلان کړی دی.

د ژورنالسټانو سازمان دا غونډه په داسې حال کې راجوړه کړې او د احتجاجي مظاهرو اعلان يې کړی چې د ډان ورځپاڼې يو ژورنالسټ سرل الميډا د غدارۍ په مقدمه کې عدالت غوښتی دی.

د ډان د راپور ترمخه د پي اېف يو جی د مرکزي شورا په ناسته کې د ګرد هېواد نه ژورنالسټانو ګډون کړی تر څو نه يواځې ژورنالسټانو او مطبوعاتي ادارو کې کارکوونکو د اقتصادي حقونو بلکې د ائين لاندې د رسنیو د ازادۍ ساتنې په اړوند مشورې وکړي.

ژورنالسټانو ويلي، "ریاستي ادارې رسنۍ د اشتهارونو د بندېز د لارې قابو کوي او هغه ټيلي ويژن چېنلې بندوي کومې چې د دوی په لار نه ځي".

په ناسته کې ويل شوي، "ریاستي عناصر د خپلو خلکو او ادارو په لاس ژورنالسټان ځوروي او د هغوی پرضد د غدارۍ مقدمې جوړوي".

لاهور هايکورټ په ۲۴م ستمبر د غدارۍ يا بغاوت په مقدمه کې د پخواني وزيراعظم نوازشريف سره د (ډان ورځپاڼې) ژورنالسټ سرل الميډا د نيولو (ناقابل ضمانت وارنټ جاري کولو) او نوم يې په اي سي اېل کې اچولو حکم کړی او عدالت ته د حاضرېدو امر يې کړی ؤ.

د ملګرو ملتونو د تعليم، سائنس او کلتور ادارې (يونيسکو) تېره مياشت ويلي چې د کال ۲۰۱۲م نه تر کال ۲۰۱۶م پورې په پاکستان کې ۳۰ ژورنالسټان وژل شوي دي، او په ژورنالسټانو د تشدد او وژنو په لړۍ کې پاکستان په پينځم نمبر دی.

پاکستان کې ژورنالسټان او د رسنیو د ازادۍ دپاره کار کوونکې ‌‌ډلې وايي د تېرې يوې مودې نه د سانسور (سنسرشپ) سره مخ د پاکستاني رسنيو (ميډيا) ستونزې په وروستيو کې نورې سېوا شوي دي.

XS
SM
MD
LG