لاس رسیدونکی لینک

Breaking News

په بنو کې د پي ټي اېم فعال او ای اېن پي ضلعي صدر نيول شوی دی


په بنو کې د پښتون ژغورنې غورځنګ (پي ټي اېم) فعال او د عوامي نيشنل ګوند د ضلعې صدر عبدالصمدخان پوليسو نيولی دی.

د پي ټي اېم مخکښ مشر حنيف وزير وي او ای ډیوه سره په خبرو کې وويل، د عبدالصمد خان سره نور هم ډېر کسان پوليسو نیولي دي.

نوموړی وايي چې د بېګاه راهسې په بنو کې د پي ټي اېم د غړو په کورونو چهاپې وهل کيږي او هغه تور لګوي چې تراوسه پورې د ۱۵۰ پورې کسان نیول شوي دي.

هغه وويل په خپله د هغه په کور هم بېګاه چهاپه وهل شوې، هغه په خپله په کور کې نه ؤ او پولیسو يې د تره دوه زامن نيولي دي.

وزير زیاته کړه د تره زامن يې د لسم او بل د يوولسم ټولګي زده کوونکي دي او دوی د پوليس په هغه مقدمه کې هم نه وو کومه چې د پي ټي اېم د بنو د مشرانو پرضد جوړه کړی شوې ده.

هغه وویل حکمت او فريد د تره په زامنو يې پوليسو مقدمې درج کړي او نن يې جېل ته لېږلي دي.

بل لور ته د بنو پوليس مني چې د بنو په صدر تاڼه کې د پي ټي اېم د کسانو پرضد مقدمه درج شوې او له هغې وروسته د دوي پرضد د نيولو عمليات پېل کړی شوي دي.

د بنو د صدر تاڼې مشر (اېس اېچ او) رضا الله وي او ای ډيوه سره په خبرو کې وويل، د کومو کسانو پرضد چې مقدمه (اېف ايي ار) درج شوی دی نو پوليس هغوي نيسي، خو نوموړي د نيول شوؤ کسانو شمېره ونه ښايله.

په بنو کې د پښتون ژغورنې غورځنګ په ۲۸م اکتوبر يوه اولسي غونډه کړې وه.

له دغې جلسې درې ورځې وروسته د پي ټي اېم په ۲۸ غړو باندې مقدمه درج شوې او پکې ویل شوي ؤ چې دوی په جلسه کې د رياست او رياستي ادارو پرضد خبرې کړي دي.

خو د پي ټي اېم مخکښ مشر او د قامي اسمبلۍ غړی محسن دواړ وايي چې دوی يوه پرامنه مبارزه پېل کړې او د احتجاجونو د لارې هغه حقونه غواړي کوم چې نورو پاکستانيانو ته ترلاسه دي.

وي او ای ډيوه سره په خبرو کې داوړ وويل، هغه خلک چې په پاکستان کې د ائين او قانون پرضد خبرې کوي د هغوي سره روغې جوړې کيږي او څوک چې په پرامنه ډول د حقونو دپاره احتجاج کوي د هغوي پرضد مقدمې درج کولی شي.

هغه زياته کړه که څه هم حکومت د دوي په وړاندې د مقدمو خنډان جوړوي خو پي ټي اېم به ترخپل منزله مبارزې ته دوام ورکړي.

هغه وويل د پي ټي اېم په مشرانو او غړيو باندې له دې وړاندې هم مقدمې درج شوي او دوی به د دغو مقدمو د قانون د لارې مقابله کوي.

د پي ټي اېم د مشرانو او غړيو پرضد له دې وړاندې په صوابۍ، کراچۍ او د بلوچستان صوبې په بېلابيلو برخو کې هم مقدمې درج شوي دي.

XS
SM
MD
LG