لاس رسیدونکی لینک

Breaking News

تحریک لبېک د اولس د مال او ځان دپاره خطره جوړه شوې ده، فواد چوهدري


د پاکستان د اطلاعاتو مرکزي وزير فواد چوهدري ويلي د تحریک لبېک ډلې مشر خادم حسېن رضوي يې په حفاظتي بند کې اخيستی او مېلمستون ته منتقل کړی شوی دی.

چوهدري ویلي، "تحريک لبېک پرله پسې د اولس د مال او ځان دپاره خطره جوړيږي اود مذهب په نوم سياست کوي".

هغه ويلي د تازه عملياتو د اسيه بي بي د قضيې سره هيڅ تعلق نشته،حالات په بشپړ ډول قابو دي او اولس دې د چارواکو مرسته وکړي.

د تحریک لبېک د مشر سره د دغه ډلې د نورو ګڼ شمېر غړيو نيولو خبرونه هم مخې ته راغلي دي.

خادم رضوي په داسې حال کې نيول شوی چې دوه ورځې وړاندې د پاکستان د سترې محکمې د مشر قاضي مياثاقب نثار نه په لندن کې پوښتنه شوې وه چې،

"د مذهبي تندلارو پرضد عدليه تراوسه خاموشه ولې ده؟ چا چې د ججانو او حاضر سروس جرنېلانو پرضد د کفر فتوې لګولي"؟.

مشر قاضي ويلي ؤ "دا به تاسو ته څو ورځې ورسته پته ولګي" خو نوموړي په دغه اړوند نور څه نه ؤ ويلي.

د پاکستان سترې محکمې د مذهب د سپکاوي په تور د مرګ سزاواره اسیه بي بي د اکتوبر په وروستۍ نېټه په قضيه کې بري کړې او د هغې د خوشي کولو امر يې کړی ؤ.

د يادې فېصلې سمدست وروسته مذهبي تندروه ډلې تحریک لبېک په ټول پاکستان کې د فېصلې پرضد احتجاجونه پېل کړي وو.

تحریک لییک دسترې محکمې د درېو ججانو د وژلو او د پوځ د مشر جنرل قمر باجوه په ضد یې نورو جنرالانو نه د بغاوت غوښتنه هم کړې ده.

فواد چوهدري ویلي خادم رضوي ځکه نيول شوی چې په ۲۵ نومبر يې د احتجاج اعلان بيرته نه اخيستو.

د خادم حسېن رضوي د نيولو د خبرو وروسته په کراچۍ او لاهور کې د احتجاجي مظاهرو خبرونه مخې ته راغلي او د ځينې سړکونو د بندولو هم ويل شوي وو.

خو نن د خالي، شنبې په سهار ويل شوي ټول سړکونه ازاد دي.

د تحريک لبېک يو بل مشر پير افضل په يو ويډيو بيان کې په خپلو پلويانو غږ کړی ؤ چې په سړکونو راووځي احتجاج پېل کړي او د ځان سره ډنډې هم راوړي چې خپله دفاع پرې کوي.

XS
SM
MD
LG