په سوشل ميډيا د سل ورځې سل راګرځېدنې (#100Days100Uturns) د هېش ټېګ سره د پاکستان تحریک انصاف (پي ټي ايي) د حکومت د سلو ورځو د حکومت يادګېرنه کيږي.
د پاکستان حکومتي واکمنه ګوند پي ټي ايي د جولايي د عامو انتخاباتو نه وړاندې په واک کې د راتلو وروسته د ۱۰۰ ورځو پلان وړاندې کړی ؤ.
په ياد پلان يا ايجنډا کې په پينځه کاله موده کې د ۵۰ لاکه کورونو، اقتصادي سفارتکارۍ، بهرنۍ او داخله پاليسۍ، پنجاب صوبه په دوه برخو کې شاملول، نېب خپلواکه اداره جوړول، په پينځه کاله کې يو کروړ نوکرۍ او د کرکيلې په برخه کې اصلاحات کول ياد کړی شوي وو.
په سوشل ميډيا د پي ټي ايي په حکومت ټکونه کيږي چې د ۱۰۰ ورځو په پلان کې يواځې ۱۰۰ ورځې بيرته راګرځېدلی دی.
عبدالماجد په ټويټر ليکلي،
"د پروټوکول، د ايي اېم اېف نه د قرضې، د دوه کروړه نوکريانو، د پټرولو د بېعې، د ټېکس نه اخستو، د پينځه ملینه کورونو، د ډالر ۱۲۰ روپو ته راوستو، د پاکې کابينې او عامو خلکو ته د خېر رسولو ټولې خبرې غلطې، يواځې مونږ بيرته په واپس کېدو پسې بيا واپس کېدل وينو".
د قامي اسمبلۍ پخواني غړي رضا علي عابد په ټويټر ځینې نورې خبرې يادې کړي چې د عمران خان حکومت يې په پوره کولو کې پاتې راغلی دی.
هغه ويلي، " د فاټا په خېبرپښتونخوا کې په تندۍ ورګډول، جنوبي پنجاب صوبه جوړول، د بلوڅو سره روغه جوړه، د کراچۍ دپاره پرمختيايي پېکج، د غربت د ختمولو دپاره ګامونه، اقتصاد ته وده ورکول، په دې هر څه کې ناکامه".
د پيپلز ګوند د قامي اسمبلۍ غړې شازيه مري ویلي،
"نړیوال بېنک د دوه سوه اربه ډالرو د واپس کولو په تمه دی کومه ادعا چې د پي ټي ايي مشرتابه کړې وه چې په واک کې د راتلو په ۲۴ساعتونو کې به يې بيرته ورکړي".
په عمران خان باندې ټکونه کيږي چې هغه د خپلې هرې خبرې نه بيرته ګرځي، عمران خان روانه مياشت د يوټرن يا بيرته ګرځېدو د خبرې سپيناوی کړی او ويلي يې ؤ،
"چې د حالاتو سره سم بيرته ونه ګرځي هغه کامياب مشر نه شي کېدی نيپولين او هټلر بيرته نه ؤ ګرځېدلي ځکه يې تاريخې ماتې خوړلې وه".
خو د عمران خان دغه بيان ته هم سخت غبرګون ويل شوی چې هغه د خپلې هرې کړې خبرې او ادعا نه بيرته ګرځي.
عمران خان د اګست د مياشتې په ۱۸م نېټه د پاکستان د ۲۲م وزیراعظم په توګه سوګند اخيستی ؤ.
عمران خان او د هغه په کابينه کې شاملو وزيرانو د مې په مياشت کې د خپل حکومت د ۱۰۰ ورځو ايجنډا وړاندې کړې وه.