د شانګلې ضلعې سره تعلق لرونکي څلور خواري کښ نن د شورو، چهارشنبې په ورځ په دره ادم خېل سيمه کې د سکرو په کان کې مړه شوي دي.
شانګلې ضلعې ته پرون د نهې، سه شنبې په ورځ هم په کوټه کې د سکرو په کان کې د مړه شوؤ دوه خواري کښو جسدونه وړل شوي وو.
ننۍ پېښه د دره ادم خېلو په کلاخېل سيمه کې رامنځه شوې او د سکرو په کان کې د زهرجن ګېس جمع کېدو له امله څلور خواري کښ مړه شوي دي.
د شانګلې ضلعې مرستيال کمشنر فياض شېرپاؤ د يادې پېښې پخلی کړی دی.
د وي او ای ډيوه خبريال احسان محمد خان وايي کمشنر ورسره په دغه اړوند غږېدلی چې د خواري کښو د جسدونو راوړو په موخه د اړونده چارواکو سره په رابطه کې دي.
د بلوچستان او خېبرپښتونخوا د سکرو په کانونو کې کار کوونکي زياتره خواري کښ د شانګلې ضلعې سره تعلق لري.
د پاکستان د سکرو په کانونو کې وخت په وخت دغه ډول پېښې رامنځته کيږي او خواري کښ وايي کانونه نړيږي او د زهرجن ګېس چاؤدنې پکې کيږي.
خواري کښ وايي په کانونو کې د دوي د حفاظت هيڅ انتظام نه وي ځکه دوي د مرګ ژوبلو ښکار شي.
د غېر دولتي شمېرو ترمخه تېر په کال ۲۰۱۸م کې ۱۲۳ خواري کښ يواځې د بلوچستان صوبې د سکرو په کانونو کې مړه شوي چې پکې ۲۳ د کالام او مدين او نور ټول د شانګلې وو.
او تېر کال د سکرو په کانونو کې په بېلابيلو پېښو کې ۸۰ خواري کښ معذوره شوي او د وجود کومه برخه يې پکې د لاسه ورکړې ده.
