لاس رسیدونکی لینک

Breaking News

کراچۍ: پاکستان په دوېمه ټيسټ سيالۍ کې سري لنکا ته ماتې ورکړه


د پاکستان کرکټ لوبډلې د کراچۍ په لوبغالي کې په دوېمه پينځه ورځنۍ (ټيسټ) سيالۍ کې په ۲۶۳ رنزونو د سري لنکا لوبډلې ته ماتې ورکړه.

د کراچۍ په نیشنل لوبغالي کې دا سيالي نن د ګل، دوشنبې په ورځ ترسره شوه.

کوربه پاکستانۍ لوبډلې په لمړي اننګز کې ۱۹۱ منډې جوړې کړې او په ځواب کې يې د سري لنکا لوبډلې ۲۷۱ رنزونه جوړ کړي وو.

د سري لنکا پرضد په لمړي اننګز کې اسد شفيق تر ټولو زيات ۶۳ رنزونه جوړ کړي او درې پاکستاني لوبغاړي په صفر اؤټ شوي وو، او د سري لنکا کمارا او ايمبوډيلنيا څلور څلور پاکستاني لوبغاړي سوځولي وو.

د پاکستان په بالرانو کې شاهين شاه افريدي د سري لنکا پينځه او محمد عباس څلور لوبغاړي سوځولي وو.

پاکستان په دوېم اننګز کې په پينځه لوبغاړو ۵۵۵ رنزونه جوړ کړي چې پکې څلورو لوبغاړو د سلو نه زياتې منډې جوړې کړې وې.

په بدل کې د سري لنکا ټول لوبغاړي په ۲۱۲ منډو وسوځېده او پينځه لوبغاړي يې په صفر يا د بې د کومې منډې اؤټ شوي دي.

په دوېم اننګز کې د پاکستان نسيم شاه د سري لنکا پينځه لوبغاړي سوځولي دي.

له دې وړاندې د پاکستان او سري لنکا ترمنځ لمړۍ سيالي په راولپنډۍ کې شوې او بې د کومې نتيجې پای ته رسېدلې وه.

XS
SM
MD
LG