پاکستان پرېکړه کړې چې اوس به د تورخم او چمن د لارې افغانستان ته د اړين (ضروري) توکيو سره ټول توکي لېږدول کيږي.
د پاکستان د وزيراعظم عمران خان د ملي امنيت په چارو کې مرستیال معید يوسف ويلي د افغانستان د حکومت په خواست د پاکستان حکومت دغه پرېکړه کړې ده.
يوسف ويلي ګاونډي هېواد افغانستان ته به د اړينو توکیو سره غېر اړين توکي هم پرېښودل کيږي.
"د تورخم او چمن پولې چې د اپرېل د لسمې نېټې نه افغانستان ته د اړينو توکيو دپاره پرانستل شوې او به د هر ډول توکيو لېږلو دپاره پرانستې وي".
هغه ویلي د بلوچستان صوبې پينځې ضلعې چې د ايران نه اړين توکي ترلاسه کوي دغو ضلعو ته به د ايران نه د توکيو د راوړو اجازت وي.
له دې وړاندې د پاکستان لخوا افغانستان ته د سوداګريزو ګاډو د تګ د اجازې ورکړل شوې او په لسم اپرېل د تورخم او چمن د لارې مال وړونکي ګاډي روان شوی وو.
د چمن پوله ۴۰ ورځې وروسته پرانستل شوې او د تورخم پوله په ۱۶م مارچ تړل شوې وه.
پاکستان په اوونۍ کې درې ورځې دغو ګاډو ته د تګ اجازه ورکړې وه.
خو په چمن کې ځینې سوداګرو وروسته د پاکستان د حکومت نه غوښتنه کړې وه چې دوی د افغانستان نه کوم توکي راغواړي په ځانګړي ډول دالونه او په مصالو کې کاروېدونکي توکي، د هغې د راغوښتو دې ورته اجازه ورکړی شي.
پاکستان د کرونا وايرس د مخنيوي په لړ کې په پورته کړی شوؤ ګامونو کې د افغانستان سره خپلې ټولې پولې تړلې وې.
معيد يوسف ويلي د هند سره به پوله تړلې وي خو ځینې پاکستانيان چې په هند کې ايسار شوي او هند ورته د لاک ډاؤن له امله بیرته راتلو اجازه نه ورکوي دوی هڅه کوي چې هغوی هم بيرته راولي.