د خېبرپښتونخوا د بنو ضلعې په جاني خېلو کې د څلورو تنکو هلکانو د وژنې پرضد په پينځمه ورځ احتجاجي ناسته دوام لري، احتجاج کوونکي وايي دغلته يې غوښتنې نه اورېدل کيږي ځکه احتجاجا اسلام اباد ته د مړو سره لاريون کوي.
په جاني خېلو کې د څلورو تنکو هلکانو چې عمرونه يې د 12 نه د 18 کلونو پورې وو، مړي يې په 22 مارچ موندل شوي وو.
د هلکانو د خپلوانو په وېنا د شل ورځې بې درکۍ وروسته ورته د هلکانو مړي د يو خوړ نه په داسې حال کې ترلاسه شوي چې په تشدد وژل شوي او په يو خوړ کې ښخ کړی شوي وو.
خپلوانو يې دغو هلکانو ته د انصاف، د شهدا پېکج او په دغه پېښه کې د ککړو کسانو د مالومولو او قانون منګولو ته سپارلو سره د علاقې نه د ټولو وسله والو لرې کولو او رياستي عملدارۍ په ځای کولو دپاره احتجاجي لاريون پېل کړی دی.
د احتجاجي پرلت يو ګډون وال مشر امان الله وايي دوی د دغه پېښې عدالتي پلټنې غواړي.
هغه وویل پينځمه ورځ يې ده تراوسه يې حکومت غوښتنې ونه منلې او زياته يې کړه دوی د مړو سره اسلام اباد ته د لاريون کولو پرېکړه کړې ده.
يو بل ځايي مشر حاجي الياس وايي په علاقه کې په کال 2009 کې د وسله والو تندلارو پرضد پوځي عمليات شوي خو په علاقه کې بيا هم د بدامنۍ پېښې رامنځته کيږي.
هغه وويل دوی غوښتنه کوي چې په علاقه کې دې د ښه او بدو وسله والو توپير ختم کړی شي.
دوی دعوه کوي تراوسه ورته د صوبې د حکومت لخوا د دوی د غوښتنو پوره کولو ډاډ نه دی ورکړی شوی.
خو د خېبرپښتونخوا د ټرانسپورټ وزير شاه محمد خان وايي د وزيراعلی په استازيتوب د څلورو ورځو راهسې د احتجاج کوونکو سره ناست دی.
هغه وويل د دوی غوښتنې جايز دي پکار ده چې رياست يې ومني او هغه دغه غوښتنې د وزيراعلی سره شريکې کړي هم دي.
پوليس وايي د پېښې مقدمه يې د نامالومه کسانو پرضد درج کړې او پلټنې يې پېل کړي دي.
