(رائټرز) - یورپي پارلېمان نن د شورو/چهارشنبې په ورځ روس د ترهګرۍ یو ملاتړی ریاست وګرځاوه او ویې ویل چې د توانایۍ د اډانو، هسپتالونو، او سکولونو په شان عامو ځایونو باندې د روسانو پوځي حملې، د نړېوال قانون خلاف ورزي ده.
د یورپي پارلېمان غړو د یو قرار داد په حق کې رایه ورکړه چې په کې روس د ترهګرۍ یو ملاتړی ریاست یاد شوی دی.
دا په عمومي توګه یو سېمبولیک ګام دی، ځکه یورپي اتحاد داسې څه قانوني چوکاټ نلري چې د لارې یې روس په دې خبره نېغ په نېغه اغېزمن کړي.
مګر په ورته وخت کې یورپي اتحاد، په اوکراین باندې د روس د پوځي یرغل له امله، په روس داسې پابندۍ پرځای کړي چې تر اوسه یې ساری نه و لیدل شوی.
د اوکراین صدر ولودیمیر زېلنسکي په امریکا او نورو ملکونو زور اچولی چې روس دې د ترهګرۍ ملاتړی ریاست ونوموي. اوکراین په روسي ځواکونو دا تور لګوي چې عام خلک په نښه کوي، مګر ماسکو دا تورونه بې بنیاده ګرځوي.
که څه هم د امریکا د کانګرس دواړه اېوانونو د قراردادونو په تصویب کولو سره د امریکا خارجه وزیر انټني بلېنکن نه غوښتي چې روس دې د ترهګرۍ یو ملاتړی ریاست ونوموي، مګر ښاغلي بلېنکن تر اوسه د دې کار نه ډډه کړې ده.
د امریکا خارجه وزارت اوس مهال څلور ملکونه – کیوبا، شمالي کوریا، ایران، او شام – د ترهګرۍ ملاتړي ریاستونه شمېري، یعنې په دې ملکونو باندې د امریکا له اړخه د دفاعي وسایلو د اېکسپورټ پابندي او مالي محدودیتونه لګېدلي دي.
د یورپي اتحاد د تحقیقاتو سروس تر مخه، په یورپي اتحاد کې دننه هم څلورو ملکونو تر اوسه روس د ترهګرۍ یو ملاتړی ریاست ګرځولی دی، چې هغه لیتوانیا، لاتویا، ایسټونیا، او پولېنډ دي.
