د طالبانو سرلښکر قاري فصیح الدین فطرت د پاکستان هغه تورونه بې بنیاده ګرځولي کوم چې وایي ترهګر د حملو دپاره د افغانستان نه پاکستان ته وراوړي.
د طالبانو د قواوو سرلښکر (لوی درستیز) د اتوار/یکشنبې په ورځ په کابل کې یو پرس کنفرنس ته په خبرو کې وویل په سرحد باندې دواړه غاړې د پاکستان او افغانستان عسکر موجود دي چې د پولې په اوږدو کې د ترهګرو تګ راتګ څارلی شي او پاکستان ته په کار ده چې خپل امن ته پام وکړي.
قاري فطرت په خپلو خبرو کې زیاته کړه: "دا چې د پاکستان دننه کسان شته چې پاکستان کې ناامني راولي، هغوی د پاکستان په خاوره کې دننه دي. دا چې پاکستان په مونږ افغانانو باندې تنقید کوي، بهتره دا ده چې خپلې خاورې ته توجو وکړي."
د طالبانو سرلښکر دا هم وویل چې په پاکستان کې ناامني، د پاکستان د پوځ د کمزورۍ نښه ده چې د هغو ناامنیو عاملین نشي نیولی. هغه یو ځل بیا د طالبانو په دې وینا ټینګار وکړ چې، "د افغانستان له خاورې هېڅ کوم هېواد ته زیان نه رسیږي او هېڅ کوم هېواد باندې برید نه کیږي."
د طالبانو سرلښکر خبرداری ورکړ چې څوک به پرېنږدي چې په افغانستان باندې برید او یا یرغل وکړي. د قاري فصیح الدین وینا وه چې، "غټ غټ ملکونو برید کړی، ماتې یې خوړلې ده، (ترهغو) واړه ملکونه خو هېڅکله برید نشي کولی."
د همدې اګست میاشت په اوومه نېټه د پاکستان د پوځ سرلښکر جنرل عاصم منیر په پېښور کې، په دې اندېښنه ښودلې وه چې ګني افغانستان ترهګرو ته پټنځایونه ورکړي او ترهګر له هغه ځایه پاکستان ته د برید دپاره ورځي. جنرل عاصم منیر دا هم ویلي و چې د ترهګرو د تباه کولو دپاره به د هېڅ ډول کوشش نه لاس وانخلي.
د جنرل منیر د دې خبرو نه وړاندې د شهباز شریف په مشرۍ د پاکستان د پخواني حکومت مشرانو څو څو ځله په طالبانو دا تورونه لګولي و چې ګني د پاکستان مخالفینو ته په افغانستان کې پناه ورکوي، مګر طالبانو دا تورونه په وار وار رد کړي او وایي چې هېچا ته اجازت نه ورکوي چې د افغانستان خاوره د نورو ملکونو په ضد استعمال کړي.
(د وي او اې افغان سروس نه په مننه)
Forum