لاس رسیدونکی لینک

تازه خبر

د افغانستان بحراني اقتصاد: د یو ډالر بېعه ۱۲۵ افغانیو ته لوړه شوه


د افغانستان تېزېدونکی اقتصادي بحران د شورو/چهارشنبې په ورځ د افغانۍ د قدر په کمېدو سره نور هم ژور شو. د کابل په آزاد بازار کې نن (د ډسمبر په ۱۳مه)، د یو ډالر بېعه ۱۲۵ افغانیو ته لوړه شوه چې تر اوسه داسې څه نه و لیدل شوي. د ډالر قیمت صرف یوه هفته مخکې، د ۱۰۰ افغانیو نه ښکته و.

د افغانۍ کم قدره کېدلو، د افغانستان په بازارونو سخت اثر کړی او د خوراکي موادو بېعې ډېرې په بره ختلي دي.

په اګسټ میاشت کې واک اختیار ته د طالبانو د رسېدو نه پس چې په افغانستان بهرني امدادونه یو دم بند شول، د افغانستان کمزوری اقتصاد ته یې سخته جټکه ورکړه او د ملګرو ملتونو د یو راپور له مخې، ممکن د افغانستان د اقتصاد ارزښت په یو کال کې شل فیصده راټیټ شي. د اقتصاد د خرابېدو یو تصویر، د افغانۍ په کم قدره کېدو کې لیدلی شي. مخکې له دې چې طالبان په کابل ولقه ولګوي، یو ډالر به په ۷۷ افغانیو بدلېده، خو د طالبانو د راتګ وروسته پر له پسې د افغانۍ قدر کمیږي او په تېرو ورځو کې دا لړۍ یو دم تېزه شوله.

د کابل د زرمبادلې مشهوره بازار، سرای شهزاده د صرافانو یو مشر محمد طاهر قیومي رائټرز خبري اېجنسۍ ته ویلي چې،"ډالر د بازار نه ورک شوي دي."

د ګل/دوشنبې ورځې په سهار د ډالرو قیمت ۱۱۲ افغانۍ و، خو تر ماسپښینه پورې یې قیمت ۱۲۵ افغانیو ته بره وخوت، چې بیا په شهزاده سرای کې د لنډې مودې دپاره د زر مبادلې اخیستل راخیستل بند شول. ځینو صرافانو ویل چې د خوراکي موادو سترو مارکېټونو سمدستي خپل د موادو بېعې د ډالرو د نوي قیمت په بنیاد بدلې کړې، او دې سره په خلکو باندې چې له وړاندې لا د معیشت له ستونزې سره لاس او ګرېوان دي، فشار نور هم سېوا شو.

د دې ترڅنګ، د کابل ښار په ځینو برخو کې د کورونو په کرایه کې هم یو دم اضافه راغلې، ځکه په ځینو سیمو کې د کورونو کرایه نېغ په نېغه د ډالر د بېعو سره تړلې ده.

د افغانستان د کرنسۍ کم قدره کېدل په داسې حال کې مخې ته راځي چې د طالبانو د واکمنۍ لاندې بنکي سیسټمونه هم بحران ځپلي دي، د امریکا له اړخه د لګېدلو پابندیو له وجهې یې بهرنیو بنکونو سره تعلقاتو کې ستونزې راغلي، او خلک نشي کولای په آسانۍ سره د بنکونو نه خپلې پیسې راوباسي.

د جمعې په ورځ د امریکا د خزانې وزیر یوه هدایتنامه جاري کړه چې له مخې یې اوس امریکا کې خلک کولای شي خپلو خپلوانو ته په افغانستان کې پیسې ولیږي. خو د افغانستان نهه بلینه ډالره خارجي زرمبادله چې د طالبانو د واکمنېدو نه پس په امریکا کې منجمد شوې، اوس هم آزاده شوې نده.

د سرای شهزاده د صرافانو مشر محمد طاهر قیومي وایي چې د طالبانو د نوي حکومت سره سیاسي اختلاف دې داسې استعمال نشي چې عوام افغانان دې په کې وځورېدل شي. هغه وایي: "دا یوازې د طالبانو مسئله نده. دا ټول مشکلات د عوامو خلکو دپاره جوړیږي. خلک کرایه ورکول لري، خوراکي مواد اخیستل لري."

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:58 0:00

بي بي شیرینه

بي بي شیرینه: په ټیلیویژن
please wait

No media source currently available

0:00 1:59:58 0:00

Recommended

XS
SM
MD
LG