یوګانډا دې ته راضي شوې ده چې د امریکا په غوښتنه، په موقت ډول دوه زره (۲۰۰۰) افغان پناه غوښتونکي ومني. یوګانډا د افریقې وچې په منځ کې یو هېواد دی.
د یوګانډا د امداد او مهاجرو چارو وزیره، اېستر انیاکن وایي چې د هغه ملک صدر، یووري موسیویني هغې ته ویلي چې د افغانستان نه راتلونکو شل زره مهاجرو دپاره دې آمادګۍ ونیسي. هغې دا هم زیاته کړې چې یوګانډا دا هرڅه د امریکا حکومت په درخواست کوي.
د امداد رسولو او مهاجرو په چارو کې د یوګانډا وزیرې پخپلو خبرو کې وویل: "هغو مونږ نه غوښتي چې دوه زره مهاجرو ته ځای ورکړو. مونږ تمه لرو چې دا کسان، په څو جوپو کې پنځه پنځه سوه تنان راوړلی شي. د ملګرو ملتونو د کډوالو چارو ادارې په اېنتېبې کې اېمپریال هوټلونه دغو مهاجرو ته د ټرانزیټ مرکز په توګه ځانګړي کړي چې اول هلته راوستلی شي."
بل اړخ ته د یوګانډا هېواد دپاره د ملګرو ملتونو د کډوالو چارو ادارې استازي جوېل بوټرو هم د دې خبرې تصدیق کړی چې افغان مهاجر به هلته کې انتقالیږي.
جوېل بوټرو پخپلو خبرو کې وویل: "مونږ د دې پرېکړې او د یوګانډا حکومت د دې سخاوت هرکلی کوو. او هغه څه چې مونږ لګیا یو کوو يې، هغه دا دي چې مونږ د یوګانډا وزیراعظم د دفتر سره په مشترک کار کې دې ته آمادګي نیسو چې هغه مهاجر له ائیرپورټ نه راواخلو او یو محل ته یې انتقال کړو. او هلته به بیا ټول دا د سکریننګ او ټیسټینګ کارونه کیږي. بیا به ګورو چې نور حکومتونه، په خاص ډول د امریکا حکومت، دوی چېرته اوسېدل غواړي، بیا به د هغه مطابق خپل بل ګام سنجوو."
پس له هغه چې طالبانو د اتوار/یکشنبې په ورځ کابل ونیو، زرګونه تنه افغانان غواړي له افغانستان نه بهر وتښتي. صدر اشرف غني هم د افغانستان نه بهر وتلی او په یو پیغام کې یې ویلي چې دا کار یې په کابل کې د ورانۍ او د خلکو د وژل کېدو د مخنیوي په هدف کړی دی. تر اوسه یې د ځای په اړه څه پته نشته.
طالبانو اعلان وکړ چې نور په افغانستان کې جنګ ختم دی، خو بیا هم زرګونه کسان د طالبانو د وېرې کوشش کوي وطن پرېږدي او بهر ته ولاړ شي.
