لاس رسیدونکی لینک

Breaking News

د امریکا خاص استازی د افغان طالبانو سره خبرو دپاره قطر ته ځي


د امریکا خارجه وزیر انټني بلنکن او د افغانستان دپاره د امریکا خاص استازی ټام وېسټ

د امریکا د خارجه وزارت ویاند نېډ پرایس د نهې/سې شنبې په ورځ وویل چې د افغانستان دپاره د امریکا خاص استازی ټام وېسټ به آینده هفته کې دوحه ته ولاړ شي او هلته به د طالبانو د مشرانو سره دوه هفتې ملاقاتونه ولري.

نېډ پرایس خبریالانو ته وویل: "هغوی به د افغانستان په حوالې سره زمونږ د اهمو قامي مفاداتو په اړه خبرې وکړي چې په کې د ترهګرۍ سره مبارزه، امریکني شهریانو او همدا شان هغو افغانانو دپاره چې مونږ ورسره خاصه وعده کړې ده د ملک نه د خوندي وتلو لاره، بشري امداد، او د افغانستان اقتصادي حالات وڅېړل شي.

د افغانستان دپاره د امریکا خاص استازي ټام وېسټ تر دې وړاندې د روانې میاشتې په سر کې پاکستان ته تللی و، چېرته چې د ټرایکا پلس غونډه جوړه شوې وه او د امریکا سربېره، د پاکستان، چین، او روس استازو د افغانستان په حالاتو بحثونه وکړل. دغو استازو په پاکستان کې د طالبانو له هیئت سره هم ملاقات کړی و.

ټام وېسټ په تېر اکټوبر میاشت کې هم د قطر سرښار دوحه کې د طالبانو له چارواکو سره لیدلي و چې د افغانستان نه د امریکایي قواوو د بشپړه وتلو پس، دا طالبانو سره د یو امریکني چارواکي اولنی ملاقات و.

د اګست په پنځلسمه چې کله طالبانو په افغانستان قبضه ولګوله، ورسره جوخت افغانستان کې د خارجیانو اکثره ترقیاتي منصوبې بندې شولې او د افغانستان اقتصاد هم سخت زیانمن شو. اوس مهال افغانستان کې د پېسو کمی راغلی او غربي ملکونو هم د طالبانو په مشرانو پابندۍ لګولي دي.

د ژمي ساړه موسم په رارسېدو سره، د افغانستان غریب خلک چې تازه د جنګ جګړو نه یو څه آرامه شوي، د بشري بحران سره مخامخ شوي دي. میلینونه افغانان ورځ تر بلې د سختې لوږې سره لاس او ګرېوان دي، د خوراکي موادو بیعې لوړې شوي او د دې ټولو ترڅنګ، خشک سالي هم خلکو ته خطرې پېښې کړي دي.

XS
SM
MD
LG