لاس رسیدونکی لینک

Breaking News

خیبرپښتونخوا: د کرونا وبا په نوې چپه کې هغه خلک ښکار شوي چې ویکسین یې ندی لګولی


د خېبرپښتونخوا صحت محکمې چارواکي وايي د پښتونخوا په غټو روغتونونو کې زياتره هغه ناروغان پراته دي کومو چې د کرونا ضد ويکسين یې نه دی لګولی. چارواکي زیاتوي چې د پېښور په څلورو لویو هسپتالونو کې چې د کرونا په مرض ککړ کسان بستري شوي، نو په هغو کې ٪۹۵ یې تر دې وخت پورې د کرونا ضد وېکسین ندي لګولي.

چارواکي وایي په نشترآباد، لیډي ریډینګ، حیات آباد مېډيکل کمپلکس او خیبر تدریسي روغتون کې، له درې سوه اتیاوو نه زیات د کرونا په مرض اخته کسان داخل دي او په شمار څو کسانو یې د کرونا ضد ویکسین لګولی دی.

بلخوا ډاکټران وايي يو ځل بيا په روغتونونو کې د کرونا د ناروغانو په شمېره کې اضافه روانه ده او په څلورمه چپه هره ورځ ګڼ شمېر تنان اغېزمن کوي.

د خیبرپښتونخوا د صحت څانګې مشر او د کرونا وبا په اړه ټاکلی شوی ویاند ډاکټر اکرام الله خان وي او اې ډیوه ته وویل، خلک باید اوس وېکسین ولګوي او دغې وبا نه ځانونه خوندي کړي. د صحت د چارواکو وینا ده، هغه ناروغان چې په کرونا رنځ اخته شوي او داخل شوي، نو په دې کې د هغو مريضانو حالت ډېر خراب دې کومو چې ويکسين نه دی لګولی.

ډاکټر اکرام الله وايي، کومو کسانو چې د کرونا وېکسین اخیستی دی او سره د دې هم مریضان شوي دي، د دوی د مرض علامات انتهایي کمزوي دي. داسې ندي چې دوی دې وېنټلېټر ته پراته وي او یا د بېړني تحفظ یونېټ کې بستري اوسي. خو هغه کسان چې وېکسینونه یې ندي لګولي او په کرونا رنځ اخته شوي، د هغوی د مرض علامات شدید دي او په هسپتالونو کې وېنټلیټرو ته پراته وي.

د خیبرپښتونخوا د صحت محکمې مشر ډاکټر اکرام الله خان دا هم وویل چې یادې محکمې په خیبرپښتونخوا صوبه کې هره ورځ یو نیم لاکهو کسانو ته د کرونا وېکسین لګولو هدف اېښودلی دی.

ډاکټر اکرام الله وي او اې ډیوه ته دا خبره ومنله چې ملک کې د کرونا څلورمې چپې له امله یو ځل بیا د پېښور، چترال، اېبټ آباد، چارسده، مردان او کرک غوندې سیمو کې د کرونا مرض تازه کېسونه بیا زیات شوي دي.

صحت چارواکي دا هم وایي چې نن سبا د کرونا مرض له امله د خیبرپښتونخوا هسپتالونو کې چې کوم مریضان داخل شوي دي، په هغو کې د ۱۰۶ حالت ډېر خراب دی او ۸۳ کسانو پورې په وېنټلېټر پراته دي.

بل خوا د خیبرپښتونخوا د ډاکټرانو د اتحادیې غړی ډاکټر مدثر اپریدي وي او اې ډیوه ته وویل چې د کرونا وبا څلورمه چپه په تېزۍ سره خوریږي، خو اوس هم خلک احتیاط نه کوي.

ډاکټر اپریدي زیاته کړه: "مختلف قسمه افواه گاني دي، چې ددې نه راوتل په کار دي، خلکو ته وېکسین لګول په کار دي".

د خیبرپښتونخوا حکومت شمېرې ښیي چې په ټوله صوبه کې د کرونا د کېسونو شرحه ۶.۵ فیصدو ته رسېدلې او چترال، کرک، ډي آی خان، او ځینو نورو سیمو کې دا شرحه شل فیصدو ته هم لوړه شوې ده.

  • 16x9 Image

    فرید شینواری

    فرید شینواری د پښتونخوا د خیبر ضلعې اوسېدونکی او په پېښور کې د وي او اې ډیوه د خبریال په توګه کار کوي، چې د سیمې پر ټولنیزو، سیاسي او نورو موضوعاتو رپوټونه جوړوي. هغه له 2012م کال راهیسې له فرنټېر پوسټ انګرېزي ورځپاڼې سره کار کوي او له دې سره سره یې له بېلابېلو سیمه ییزو رېډيوګانو سره هم کار کړی دی.

XS
SM
MD
LG