پاکستان
د افغانستان ولسمشر ډاکټر اشرف غني د مشهور هنر مند سردار علي ټکر فن او هنر ته د پېرزوينو وړاندې کولو لپاره ارګ ته بللی
د افغانستان ولسمشر ډاکټر اشرف غني د پښتو مشهور هنر مند سردار علي ټکر فن او هنر ته د پېرزوينو وړاندې کولو لپاره د ولسمشر ماڼۍ ارګ ته بللی دی.
د افغانستان د سرحداتو او قبایلي چارو وزير ښاغلي محب الله صمیم وي او ای ډیوه ته وویل د صدر غني په خواهش یې سردارعلي ټکر ته بلنه امریکا ته ورلیږلې.
په امریکا کې میشت پښتون هنر مند سردار علي ټکر وي او ای ډیوه ته وویل ویاړکوي چې په ارگ کې ورته د درناوي دستوره جوړیږي.
ښاغلی ټکر وايي له صدارتي درناوي نه پرته دې ته هم ډېر خوشاله دی چې افغانستان ته به سفر وکړي.
د ښاغلي ټکر په غږ کې د وتلي پښتون شاعر غني خان کلامونه په عام او خاص کې ډېر مقبول دي.
ښاغلی ټکر د غني خان د کلامونو د ریکاډنگ لپاره په 1985 کې د افغانستان سفر هم کړی ؤ او هلته ېی د مشهورو نظمونو ،چې مستي وی او ځواني وی، زه یم ناست په تصورکې په گډون 37 کلامونه ریکارډ کړي وو.
ښاغلي صمیم وویل د ښاغلي ټکر په غږ کې د غني خان کلامونه نه یواځې د صدر غني خوښ دي ولې په لر او بر کې گڼ مینه وال لري.
ښاغلي ټکر ته په مارچ 2019 کې د پاکستان حکومت د موسیقۍ او هنر په میدان کې د خدمتونو په سر د امتیاز تمغہ او په کال 1996 کې د موسیقۍ په میدان کې د خدمت په سر د هیواد ستره اولسي جایزه تمغہء حسنِ کارکردگي هم ورکړې وه.
د ښاغلي ټکر یو بل اعزاز دا دی هغه په کال 2014 کې د نوبل د جایزو د ویش په وخت په ناروی کې د پښتو سندره "ته بي بي شيرينه" ویلی وه. دغه سندره د نوبل انعام گټونکې پښتنې پېغلې ملالې یوسفزۍ ته ډالۍ شوې وه. د سندرې لیکوال بهروز خان وحدت دی.
سردار علي ټکرد تېرو لسو کلونو راهسې په امریکا کې د وي او ای ډیوه په واشنگټن کې همکار دی.
ښاغلی ټکر د پښتونخوا د مردان ضلعې په تاریخي کلي ټکر کې د حاجي زرنوش خان کره په 15 جولاي 1956 کې زیږدلی دی.
ښاغلی ټکر وايي د موسیقۍ سره یې مینه له ماشوموالي وه.
ښاغلي ټکر په ریډیو لومړی پروگرام په 1982 کې "زلمی کول" کړی وو.
دغه پروگرام د ښاغلي ټکر د موسیقۍ په میدان کې وړومبی گام وگرځیده.
سردار علي ټکر په ټیلي وژن وړومبۍ سندره فولک (شنه بنگړي دې مات شه) ویلې وه.
خو ښاغلي ټکر نړیوال نوم هغه وخت پیدا کړلو چې د شلمې پېړۍ د نظم منفرد پښتون شاعر غني خان کلامونه یې ریکارډ کړل.
د ښاغلي ټکر د اتیایم په لسيزې کې شورو شوی د موسیقۍ دغه سفر لا روان دی.
See all News Updates of the Day
جنوبي وزيرستان: د ماين په چاودنه کې دوه ماشوم وروڼه ژوبل شوي
د افغانستان سره په پوله پرتې د خېبرپښتونخوا په قبايلي ضلعې بر جنوبي وزيرستان کې د ځمکني ماين چاودنه شوې، دوه ماشومان وروڼه يې ژوبل کړي دي.
انتظامیه دا پېښه تاييد کړې او ويلي يې دي، پېښه د تیارزه تحصیل په کنډې غر سیمه کې شوې ده.
د تیارزه پولیس تاڼې چارواکي وایي چاودنه کې دوه وروڼه موسا خان او یارک خان ژوبل شوي، تنکي ماشومان دي.
د پولیسو په وینا د چاودنې وروسته سمدستي د پېښې ځای ته رسېدلي دي په دې پېښه کې ژوبل ماشومان مولې خان سرای سیمه کې روغتون ته وړل شوي او پولیسو دې پېښې پلتنې پېل کړې دي.
د روغتون چارواکي وايي د يارک د زخمونو حالت معمولي دی او موسا خان یوه پښه پرې شوې او عملیاتو دپاره ډیره اسماعیل خان کې پوځي روغتون ته وړل شوی دی.
د روغتون چارواکو ويلي، هغه ټول عمر د پاره په یوه پښه معزوره شوی دی.
د علاقې نه منتخب د صوبايي پارلیمان غړي محمد اصف خان مسید په دې پېښه اندېښنه کړې او وي او اې ډیوه ته یې ويلي، د متاثره کورنۍ سره د مرستو د پاره یې د صوبې وزیر اعلا علي امین ګنډاپور ته سپارښتنه کړې ده.
د علاقې خلک وايي ځمکني ماین چاودونو یې ژوند ستونزمن کړی او د پاکۍ غوښتنه کوي.
د تیارزه تحصیل چیرمېن شاه فیصل غازي وویل علاقه یې د وړاندې نه ورستې پاتې ده او ځمکني چاودنو خلک ذهني خراب کړي دي او ژوند پکې په ټپه ودرېدلی دی.
هغه وویل دغلته غټ غټ مارکیټونه او بازارونه نشته خلک د خرڅ خوراک د پاره څاروي ساتي خو ماين چاودنو په خلکو کې سخته ويره خوره کړې ده.
په ورستيو کلونو کې د پاکستان پوځ د افغانستان سره په پوله جنوبي او شمالي وزیرستان کې د وسله والو خلاف عملیات کړي او يلي يې دي چې سیمه یې د وسله والو نه خالي کړې ده خو د سیمې اوسيدونکي وايي د علاقې امنیت د تسلۍ وړ نه دی.
د اپریل په 13مه قبایلي ضلعې شمالي وزیرستان کې د ځمکني ماین چاودنې درې تنکي ماشومان وژلي او یو یې ژوبل کړی وو.
پاکستان او ايران متفق شوي چې دوه اړخيزه تجارت به لس اربه ډالرو ته رسوي
پاکستان او ايران د دوه اړخيزه تجارت حجم لس اربه ډالرو ته سېوا کولو باندې اتفاق کړی دی، د امنيت، ساينس او ټېکنالوجۍ سره یې په نورو برخو کې په مرستو سېوا کولو یادداښتونه هم لاسليک کړي دي.
د ايران صدر ابراهيم رييسي د ګل/ دوشنبې په ورځ په درې ورځني سفر پاکستان ته رسېدلی دی. هغه د پاکستان د صدر اصف علي زرداري، وزيراعظم شهباز شريف او نورو لوړ پوړو مشرانو سره هم ليدلي دي.
د ايران صدر په داسې وخت کې د پاکستان سفر کړی چې په اسرايل د ايران نېغ په نېغه حملې وروسته په منځني ختيځ کې حالات کړکېچن دي، هم د روان کال په جنورۍ کې پاکستان او ايران د يو بل په خاوره حملې کړې وې، د دواړو ملکونو اړيکې ترينګلې شوې او بیا یې زر د اړيکو په ځای کولو ویلي وو.
پاکستان وايي، د ايران د صدر د پاکستان سفر د وړاندې نه ټاکل شوی د مينځني ختيځ د حالاتو سره یې هیڅ تعلق نشته.
د يران د صدر سره د ليدو او په څو يادداښتونو د لاسليک وروسته مطبوعاتو سره په خبرو کې د پاکستان وزيراعظم شهباز شریف ویلي، د اقتصادي پرمختيا او اړيکو په اړه پرېکړې کړي او هغه به ښکاره شي.
د ایران صدر ويلي، په ليدنه کې یې په سياسي، اقتصادي او تجارتي اړيکو کې د ممکنه حده پورې سېوا کولو باندې اتفاق کړی دی.
هغه ویلي، پاکستان او ايران د ترهګرۍ پرضد جنګيږي، د دواړو ترمنځ مرستو اړينه ده.
هغه زياته کړې، د پاکستان او ايران ترمنځ د تجارتي او اقتصادي مرستو حجم ډېر کم دی، پرېکړه یې کړې په لومړي پړاو کې به دا حجم لس اربه ډالرو ته سېوا کولی شي.
د پاکستان د وزیراعظم دفتر د ليدنې په اړه ویلي، دواړو مشرانو په ليدنه کې دوه اړيکو ته د ودې ورکولو ترڅنګ په مختلفو برخو کې په مرستو سېوا کولو او ترهګرۍ په مخنيوي بحث کړی دی.
ويل شوي، د ايران صدر به په سفر کې د کراچۍ او لاهور سفر هم وکړي.
د پوهانو په خبره ښيي، د ايران د صدر په سفر کې به نوموړی د پاکستان سره د ايران – پاکستان ګېس پايپ لاين په منصوبه هم خبرې وکړي.
د ايران – پاکستان ګېس پايپ لاين منصوبه د لسو کلونو راهسې د ځنډ ښکار ده، امریکې پاکستان ته په ډاګه ویلي، دغه منصوبه مخ په وړاندې نه بوځي کنه د بنديزونو سره مخ کېدی شي.
یونېسف: موسمي بدلون پاکستان کې ماشومانو ته سخته خطره جوړه کړې، باید ورته فوري توجه وشي
د ملګرو ملتونو متعلقه د ماشومانو دتحفظ اداره (یونېسف) وایي چې موسمي بدلون په پاکستان کې ماشومانو باندې ناوړه اثرات غورځولي دي او په کار ده چې د دوی تحفظ دپاره دې فوري ګامونه واخېستلی شي.
په پاکستان کې د یونېسف ادارې استازي عبدالله فاضل چې د ځمکې د نړېوالې ورځې په مناسبت یې بیان ورکړی، ویلي دي چې په پاکستان کې اوس اوس چې غیرموسمي کوم اورښتونه کیږي، یو ځل بیا یې د ماشومانو ژوند د سختې خطرې سره مخ کړی دی.
فاضل پخپل بیان کې ویلي دي: "دا په ۲۰۲۲ کال کې د تباه کنه المیې یاد راتازه کوي، کوم کې چې پنځه سوه ماشومان هغه مهال مړه شوه چې د سند صوبې په جنوبي علاقو کې د لسو کالو په اندازه بارانونه یو دم واورېدل."
هغه زیاته کړې چې د پراخو مرستو باوجود هم د ۲۰۲۳ کال تر ډسمبر میاشتې پورې په سیلاب ځپلو سیمو کې نهه اعشاریه شپږ (۹.۶) میلینه ماشومانو بشري امداد ته ضرورت درلودلو.
د پاکستان د موسمیاتو د ادارې ترمخه په پاکستان کې په روانې اپریل میاشت کې د بارانونو زیاتوالی د موسمي بدلون لامل دی.
خیبر پښتونخوا او بلوچستان کې زیات بارانونه شوي. په خیبر پښتونخوا کې په بارانونو کې ۹۰٪ زیاتوالی لیدلی شوې. چې د اپریل په میاشت کې په تیرو ۳۰ کلو کې تر ټولو زیات بارانونه دې.
تر دې وړاندې په ۲۰۲۲ م کال کې کیدونکو د بارانونو له امله د پاکستان دریمه برخه سیلاب کې ډوبه شوې وه، چې ۱۷۳۹کسان یې مړه کړي او هیواد ته یی د ۳۰ بیلینو ډالرو زیان اړولی وو، چې پاکستان یې لا هم د بیارغونې هڅې کوي.
ماشومانو ته خطره
د یونېسف د استازي وینا ده چې پاکستان کې د سختې ګرمې له امله د ماشومانو بدن ته د حرارت له امله خطرې مخې ته راغلي او همدا راز د موسمي بدلون له کبله چې هوا خېچنه کیږي، نو د لویانو په نسبت، په ماشومانو باندې یې اثرات زیات دي. فاضل ویلي چې "د پنځو کلونو نه د ښکته عمر پاکستاني ماشومانو کې خواوشا دوولس فیصدي مرګونه د هوا د خېچنوالي له امله دي."
د یونېسف استازي د پاکستان د غټ سېند انډوس/اباسین په صورتحال هم اندېښنه ښودلې او ویلي یې دي: "طاقتوره دریای سېند د پاکستان خلکو او ماشومانو ته حیاتي ارزښت لري، مګر اوس د موسمي بدلون، غفلت، غلط استعمال، خېچنوالي، زیاده استحصال او په کې د زهرجنو خځلو د اچولو له کبله په خطره کې دی."
د ملګرو ملتونو ادارې، یونېسف ټینګار کړی چې په کار ده پاکستان کې د موسمي بدلون د اثراتو مقابله او د ماشومانو تحفظ کې کوششونه سېوا کړی شي. د دې دپاره، د یونېسف استازي طریقه کار هم تجویز کړی او هغه دا چې، "مونږ باید د کوېلې او فوسیل فیولز پیداوار نقصان رسوونکي لوګي (ګرین هاوس ګېس) راکم کړو چې ورسره د ځمکې تحفظ وشي." هغه دا منلې چې اکثره دغه قسم ګېسونه، د مالدارو ملکونو پیداوار دی، مګر زیاته کړې یې ده چې په دې برخه کې باید ټول ملکونه په اتفاق کار وکړي.
د یونېسف استازي همدا راز وړاندیز کړی چې د موسمي بدلون او په ښځو او ماشومانو باندې یې د ناوړه اغېزو د مقابلې دپاره په کار ده پالیسۍ او قوانین جوړ کړی شي. هغه دا هم ویلي چې په کار ده د ماشومانو د غذائیت د معالجې، هغو ته د نویو سکولونو، صحت مرکزونو او بیت الخلآوو د جوړولو دپاره سرمایه کارۍ وشي.
د پاکستان پوځ وايي په ډېره اسماعیل خان او شمالي وزیرستان کې يې ۱۱ وسله وال وژلي
د پاکستان پوځ ویلي د خېبرپښتونخوا ډېره اسماعیل خان او شمالي وزیرستان ضلعو کې يې د عملیاتو په مهال ۱۱ وسله وال وژلي دي.
د پوځ د مطبوعاتو څانګې ايي اېس پي ار د ګل، دوشنبې، په ورځ په یو بیان کې وویل په ډېره اسماعیل خان کې يې د وسله والو خلاف د استخباراتي معلوماتو په بنیاد عملیات کول چې وسله والو سره سخته جګړه شروع شوه.
پوځ وویل د ډزو په تبادله کې ۱۰ وسله وال ووژل شوو.
پوځ وویل په شمالي وزیرستان ضلع کې وسله والو سره جګړه کې یو وسله وال ووژل شو.
د پوځ د مطبوعاتو څانګې دا نه دي ویلي چې ایا په د ډېره اسماعیل خان او د شمالي وزیرستان په جګړو کې امنیتي ځواکونو ته هم څه زیان رسېدلی او که نا؟
د پاکستان پوځ په شمالي وزیرستان او ډېره اسماعیل خان کې د وسله والو د وژلو خبر په داسې حال کې ورکړی چې په نږدې وختونو کې د خېبرپښتونخوا په جنوبي سیمو کې د تشدد یو شمېر پېښې شوې چې ځینې په کې تحریک طالبان پاکستان منلې هم دي.
د پاکستان پوځ وخت په وخت په سیمه کې د وسله والو خلاف د عملیاتو خبرونه هم ورکوي.
پوځ د ګل، دوشنبې، په ورځ په خپل بیان کې وویل وژل شوي وسله وال په سیمه کې د تشدد په پېښو کې ککړ وو او د عملیاتو په مهال امنیتي ځواکونو وسله او ګوله بارود ترلاسه کړي دي.
د افغانستان او د پاکستان تاجران وايي دواړه ملکونه دې د دوه اړخیزه تجارت په اړه فېصلې عملي کړي
د پاکستان او افغانستان سوداګرو غوښتنه کړې چې په کابل کې چې د پاکستاني پلاوي او افغان طالبانو د دوه اړخیزه تجارت په اړه کومې مهمې فيصلې کړي دي هغه دې زر تر زره عملي کړی شي.
تاجران وايي د پاکستان اوافغانستان ترمينځ تجارت زیاتره د سياست او په سرحدونو د امنيتي ستونزو ښکار شوی او زيان يې زیاتره تجارانو او د دواړو هېوادونو اقتصاد ته رسيږي.
سوداګر وايي امید کوي دي چې دواړو خواؤ ته به واکمن د تجارت ښه کولو په لړ کې شوې لوظنامه عملي کړي.
ضياالحق سرحدي د پاک افغان تجارتي تنظیم رابطه کار، وايي د دواړو ملکونو ترمنځ تجارت دپاره د ځینو مشکلاتو ذکر کوي او وايي په ټرانزېټ ټرېډ په ټېکسونو کې اضافه بیا د ډرايورانو دپاره د پاسپورټ او ويزې مسله وه چې د هغه په قول تر څه هدپورې حل شوې ده.
د مارچ په ۲۶مه د پاکستان تجارت نایب وزیر محمد خرم اغا په مشرۍ کې یو پلاوی افغانستان سره د تجارتي ستونزو هواري د پاره په دوه ورځني سفر کابل ته و.
د پاکستان اؤ افغانستان سوداګر دعوه کوي د پاکستان له خوا په ټرانزټ ځينې محدوديتونو د لاسه ۶۰ نه تر اويا (۷۰) فيصده پورې ټرانزټ ايران ته اوښتی دی.
د پاکستان او افغانستان د تاجرانو د مشترکه تنظیم مشر خان جان الکوزی وايي د هند او چين، د ايران او پاکستان، په یورپ او امريکا او د روس او نورو ملکونو په مينځ کې مسلې پېدا کېږي مګر ټرانزټ او تجارت دوام لري.
هغه وویل هيله یې دا ده چې د پاکستان حکومت او افغان طالبان به اقتصاد په سياسي کشالو ورګډ نه کړي. "مونږ هيله لرو خو تر اوسه پورې ډېر هيله مند نه يو خو کومې خبرې چې مېز په سر شوي نو بايد هغه عملي کړئ شي."
د مارچ په ۲۸مه پاکستان او د طالبانو حکومت د ټرانزټ او دوه اړخیز تجارت په اړه په کابل کې دوه ورځنۍ غوندې وروسته تړون لاسلیک کړئ وو او صلاح شوي وو چې د تجارت په لاره کې خنډونه به لرې کوي.
ضياالحق سرحدي وايي د افغانستان سره په تجارت کې خنډان لرې کړی شي نو د پاکستان نه یوازې د مرکزي اېشیا بلکې د یورپ تجارتي مارکېټ ته هم لاس رسي کېدلی شي. "نو پکار ده دواړه هېوادونه په دې خبرو فکر وکړي او په تجارت کې رامينځ ته شوي خنډونه لرې کړي او حل يې راوباسي چې تجارت روان شي."
اقتصاد پوهان وايي که پاکستان د افغانستان سره تجارت کې د ستونزو لرې کولو هڅې ونه کړي نو د افغانستان مارکيت په مکمله توګه د لاسه ورکولئ شي.
Forum