پولیس وایي د خېبر پښتونخوا په ټانک ضلعه کې د جمعیت علماء اسلام ګوند یو سیمه ییز مشر مولانا احسان الله په یو هدفي برید کې وژل شوی دی.
د سیمې نه د پولیس سرچینو وي او ای ډیوه ته ویلي دا پېښه تېره شپه د ټانک په شاه عالم سیمه کې مخې ته راغلې چې دغلته نامعلومه وسله والو د جمعیت علماء اسلام په یو سیمه ییز مشر مولانا احسان الله ډزې کړي اؤ هغه یې وژلی دی.
پولیس وایي له برید وروسته وسله وال له سیمې تښتیدلي اؤ پولیسو د پېښې پلټنې پیل کړي اؤ د برید کوونکو د نیولو په هڅه کې دي.
په ټانک کې د جمعیت علماء اسلام ګوند پخواني عمومي سکتر شمس الزمان شمس ویلي چې مولانا احسان الله د جمعیت علماء اسلام یو مهم فعال ؤ اؤ د هغه وژنه د غندنې وړ پېښه ده.
رسنیو سره خبرو کې ښاغلي شمس ویلي غوښتنه کړې ده چې پولیس باید زر تر زره په پېښه کې ککړ کسان ونیسي اؤ د قانون منګولو ته یې راکش کړي.
هغه ویلي سیمه کې ورځ تر بلې د امنیت وضعه خرابېږي چې خلک ورسره په ویره کې دي اؤ قانون نافذ کوونکې ادارې باید د سیمې امنیت ته کوټلی پام وګرځوي.
تر دې پېښې وړاندې د روانې میاشتې په ۲۱مه نېټه د بنو په سیمه کې هم یو دیني عالم د جومات نه کور ته تلو پرمهال په یو هدفي برید کې وژل شوی وو.
په دغه ورځ د هدفي وژنو دوه پېښې په اورکزو او باجوړ اؤ څلور پېښې شمالي وزیرستان کې هم شوې وې.
Forum