د امریکې صدر ډانلډ ټرمپ لوظ کړی چې د امریکې په کالجونو د فلسطینیانو په حق کې د مظاهره کوونکو طالب علمانو خلاف به اقدامات اخیستل کېږي او د نیویارک د کولمبیا یونېورسټۍ نه فارغ شوي محمود خلیل د نیول کېدو په اړه يې وویل دا د نورو ډېرو ګرفتاریو وړمبۍ ګرفتاري ده.
ټرمپ د ګل، دوشنبې، په ورځ د سوشل ميډیا په خپله وېب پاټه ټروت سوشل وویل "مونږ ته معلومه ده چې په کولمبیا او په ټول ملک کې په نورو یونېورسټیانو کې نور طالب علمان شته چې د ترهګرو په حمایت کې، د یهودیانو خلاف، د امریکې ضد فعالیت کې ککړ پاتې شوي دي او د ټرمپ حکومت به دا نه زغمي."
د امریکې د اميګرېشن یا د مهاجرت په اړه چارواکو خلیل تېره هفته په نیویارک کې ونیولو. خلیل په غزه کې د اسرایل د جنګ خلاف په کولمبیا او د امریکې په نورو کالجونو کې د شروع شويو مظاهرو پېژندلې څېره ګڼل کېږي.
دا مظاهرې په کالجونو کې د تعلیمي کال د پوره کېدو سره ختمې شوې او د تېر کال د مني په موسم کې کالجونه د بیا پرانېستل کېدو وروسته شروع نه شوې.
د امریکې ډپارټمنټ اف هوم لېنډ سېکیورټي، ډي اېچ اېس، وویل خلیل د سټېټ ډپارټمنټ یا د خارجه وزارت سره په هم غږۍ کې او د اېنټي سېمېټېزم یا د یهودیانو نه د کرکې د مخنیوي په اړه د صدر ټرمپ د حکم نامې سره سم نیولی شوی دی. مطابق او نیول شوی دی.
د یواېس ډسټرکټ جج جېسي فرمن د ګل، دوشنبې، په ورځ امر وکړو چې خلیل دې ډيپورټ یا ملک بدر نه کړی شي او د هغه د مقدمې او اورېدنې دپاره د شورو، چهارشنبې، ورځ وټاکله.
د ګرفتارۍ په کاغذونو کې خلیل شام نژاد تن بلل شوی. هغه تېر کال د کولمبیا یونېورسټۍ نه په بېن الاقوامي تعلقاتو کې ماسټرز ډګري واخیستله. هغه په امریکا کې د مستقل پاتې کېدو دپاره ګرین کارډر لرلو. هغه د امریکايي شهري سره واده کړې او مېرمن يې د اتوو میاشتو حامله ده.
په خلیل د څه جرم الزام نه دی لګول شوی.
په سوشل میډیا خپل پوسټ کې ټرمپ وویل که څوک د ترهګرۍ او د بې ګناه سړو، ښځو او د ماشومانو د قتل عام حمایت کوي نو د داسې تن "موجودګي زمونږ د قومي او د خارجه تګلارې د مفاداتو خلاف ده او دلته ستا په راتګ هرکلی نیشته. مونږ د امریکې د هر یو کالج او د یونېورسټۍ نه توقعو کوو چې په دې عمل وکړي."
په غزه کې جنګ د کال ۲۰۲۳ د اکتوبر په اوومه نېټه په اسرایل د حماس د حملې نه شروع شو. د حماس په حمله کې په اسرایل کې تر ۱۲۰۰ پورې کسان وژل شوو او ۲۵۰ پورې نور کسان حماس یرغمال ونیول. قریباً ۲۴ اوس هم د حماس په ولکه کې ګڼل کېږي. امریکې حماس ترهګر تنظیم ټاکلی دی.
د حملې په جواب کې اسرایل په غزه کې د حماس عملیات شروع کړل چې د غزه د صحت وزارت وايي په کې د ۴۸۰۰۰ نه زیات کسان وژل شوي دي. اسرایل وايي په غزه کې ۱۷۰۰۰ وسله وال هم وژل شوي دي.
په منځني ختیځ کې د جنګ خلاف د مظاهرو دلاسه د امريکې په ګڼ شمېر کالجونو کې کلاسونه ګډوډ شوي وو او په کې د اېنټي سېمېټېزم الزامات هم لګېدل. ځینې مظاهرې د تشدد نه ډکې هم وي چې په مهال يې په ودانیو قبضې شوې وې او د اسرایل د پلوي او د مخالفو طالب علمانو جګړې هم شوې وې. د اسرایل حمایت زیاتره یهودي طالب علمانو کولو.
د خلیل وکيلې ويلي چارواکو ورته ویلي چې د هغه ګرین کارډ هم منسوخولی شي. هغه د لویزیینا ریاست په یو حراستي مرکز کې ساتل شوی دی.
د خلیل وکیلانو د عدالت نه غوښتنه کړې چې هغه دې نیویارک ته منتقل کړی شي.
کاونسل ان امېرېکېن اسلامېک رېلېشنز نومې تنظیم چې وايي په امریکا کې د مسلمانانو د شهري حقونو دپاره کار کوي، د ګل، دوشنبې، په ورځ يې د خلیل د ازادۍ غوښتنه وکړه او ويې ويل د هغه د وکیلانو سره همکاري کوي.
کېیر په یو بیان کې د خلیل د ګرفتارۍ دپاره د ډي اېچ اېس امر "بې قانونه" وبللو او ویې ويل د "نسل وژنې خلاف" د هغه "پرامنه د فعالیت په سر د هغه نیول کېدل د ایین د وړمبۍ مادې دلاندې د هغه د بیان "د ازادۍ، د امیګرېشن د قوانینو او د فلسطینیانو د انسانیت خلاف ورزي ده."
د امریکې خارجه وزیر مارکو روبیو د اتوار، يکشنبې، په ورځ په اېکس یو پېغام کې وویل حکومت د حماس د حمایتیانو ویزې او ګرین کارډونه منسوخولی شي چې د امریکې نه ملک بدر کړی شي.
تېر کال د مظاهرو په وخت خلیل او نورو طالب علمانو د اېنټي سېمېټېزم الزامات ردول او ويل يې چې د جنګ خلاف دپراخه تحریک برخه دي چې یهودي طالب علمان او نورې ډلې هم په کې شاملې دي.
خو اسرایل سره د مالي تعلق د ختمېدو حمایت کوونکي ډلې د حماس او د حزب الله د حمایت اظهار هم کړی دی. امریکې حزب الله هم ترهګر تنظیم ټاکلی دی.
کولمبیا یونېورسټۍ د خلیل په معامله د څه ویلو نه ډډه کړې ده.
په کولمبیا کې نوي دفتر د ګڼ شمېر طالب علمانو خلاف د نظم او ضبط په لړ کې الزامات لګولي او د خلیل په اړه يې هم تحقیقات شروع کړي دي.
تېره هفته د ټرمپ حکومت کولمبیا سره د وفاقي حکومت د ۴۰۰ مېلین ډالرو مالیت امداد بند کړو او ويې ويل یونېورسټي په خپل کېمپس د اېنټي سېمېټزم په مخنیوي کې ناکامه شوې ده.
یادونه: د دې خبر ځینې معلومات د ای اېف پي او د ای پي نه اخیستل شوي دي
