د هنګو پوليسو ادعا کړې تېره شپه يې په ترسره کړو عملياتو کې د مهم تندلاري کمانډر اسلام په ګډون څلور ترهګر وژلي دي.
سرکاري ميډیا د هنګو پوليسو له قوله ويلي د نهې، سه شنبې په شپه دا عملیات شوي دي.
د امنيتي سرچينو ترمخه د هنګو د قاضي پمپ سره نزدې د استخباراتي مالوماتو په اساس عمليات شوي او د کمانډر په ګډون پکې څلور ترهګر وژل شوي دي.
د وژل شوؤ کسانو پېژندګلو د کمانډر اسلام، لائق، محب الله او شاهد په نومونه شوې ده.
د کمانډر اسلام په اړوند ويل شوي هغه د اورکزو د تحریک طالبان پاکستان مهم کمانډر او په بم چاؤدنو او نورو ترهګرو پېښو کې ککړ ؤ.
ويل شوي عمليات د هنګو د جوړېدونکي زندان سره نزدې د شاهد نومې ترهګر په کور شوي او ترهګر په دغه کور کې پټ شوي وو.
ياد عملیات د هنګو ښار نه ۲۵ کلوميټره ختيځ پله په دوآبه سړک قاضي پمپ علاقه کې ترسره شوي دي.
د خېبرپښتونخوا جنوبي ضلعې هنګو ختيځه پوله د کوهاټ، جنوب لويديځه د شمالي وزيرستان او شمال ختيځه پوله يې د اورکزۍ قبايلي ضلعې سره لګېدلې ده.
