واشنګټن - د افغانستان د پخواني حکومت د تعلیم وزیر چې په کابل د طالبانو د واکمنېدو په مهال د هېواد نه وتلی و، د شورو/چهارشنبې، په ورځ کابل ته ستون شو.
د پخوانیو چارواکو د پخلاینې دپاره د طالبانو د مرکچي ډلې ترجمان احمدالله وثیق وویل وردک د ترکي نه افغانستان ته بېرته تللی دی.
کابل ته د غلام فاروق وردک بېرته تګ د طالبانو د هغو کوښښونو برخه ده چې وتلي افغان شخصیتونه هېواد ته ستانه کړي.
رویټرز وايي طالبانو غلام فاروق وردک ته د تحفظ ضمانتونه ورکړي دي.
که څه هم د واکمنېدو نه پس طالبانو د عامې بخښنې اعلان کړی خو ملګرو ملتونو او د انساني حقونو تنظیمونو ویلي طالبانو خپل ګڼ شمیر مخالفین او د سلګونو په شمېره کې د پخواني حکومت د امنیتي ادارو غړي وژلي دي. طالبان دا خبره ردوي.
رویټرز وايي اداره په ازاده توګه د نورو پخوانیو چارواکو د ستنېدو تصدیق نشي کولی. وردک کابل ته د رسېدو نه پس حکومتي مطبوعاتو سره خبرو کې وویل د څو کسانو نه علاونه زیاتره پخواني چارواکي هېواد ته ستنېدل غواړي.
فاروق وردک څوک دی؟
فاروق وردک د پخوانیو صدرانو حامد کرزی او د اشرف غني په حکومتونو کې د کابېنې وزیر و. هغه د ۲۰۰۲ او بیا ۲۰۰۴ کلونو په لویو جرګو کې چې د افغانستان د تېر نظام او آئین بنیاد په کې کېښودل شوی و، لوی کردار درلود.
که څه هم ښاغلی وردک وروسته د سیاست په برخه کې پرمختګونه درلودل، مګر د ښاغلي وردک د سیاسي فعالیتونو په لړ کې، هغه باندې د کرپشن/فساد تورونه هم لګول شوي دي. د افغانستان د بیارغونې دپاره د امریکا څارونکې دفتر (سیګار) په خپل یو رپوټ کې ویلي و چې تعلیم وزارت سره مرستې شوو پېسو کې غبن شوی او د داسې سکولونو/مکتبونو په اړه رپوټونه ورکړل شول چې هېڅ موجود نه و مګر په نوم یې بجټ اخېستل کېده، او دا بیا د خیالي مکتبونو په نوم مشهوره شول.
دغه وخت کې د تعلیم وزیر فاروق وردک و، خو دا قضیه په رسمي ډول ونه څېړل شوه.
همدا راز د مخدره موادو او جرمونو په ضد د ملګرو ملتونو ادارې (یو اېن او ډي سي) هم وروسته د تعلیم وزارت د افغانستان په هغو څلورو ادارو کې شامل بللی و چې هلته کې ډېر زیات کرپشن شوی و. فاروق وردک دا رپوټونه رد کړل او هغه وخت ویلي و چې دغسې نړېوالې ادارې پخپله پراخ کرپشن کې لاس لري.
په هغو پخوانیو چارواکو کې چې په دې وروستیو کې کابل ته ستانه شوي، د دفاع وزارت یو پخوانی ویاند (ر) جنرل دولت وزیري او د بجلۍ دپاره د افغانستان د سرکاري ادارې (برېښنا شرکت) پخوانی مشر امان الله غالب هم شامل دي.
جنرال دولت وزیري د پخواني صدر حفیظ الله امین په حکومت کې د داخله وزارت یو چارواکی پاته شوی و، وروسته یې په نورو نظامونو کې هم دنده درلوده او په تېر جمهوریت کې د دفاع وزارت د ترجمانې تر عهدې هم ورسېد.
د طالبانو وعدې:
د پخوانیو چارواکو افغانستان ته د بېرته راوستلو دپاره د خبرو په لړ کې طالبانو څو هفتې وړاندې نهه کسیزه ډله جوړه کړې ده چې پکې د طالبانو د استخباراتو او پوځي چارواکي شامل دي.
طالبانو همدا راز وعده څرګنده کړې چې پخوانیو چارواکو ته عفوه، تحفظ او د روزګار بندوبست د دې ډلې ذمه واري ده.
د پخواني صدر اشرف غني په شمول د هغه د حکومت ګڼ شمېر لوړ رتبه مامورین په کابل د طالبانو د واکمنېدو په مهال د افغانستان ته وتلي دي.
ملګرو ملتونو او د بشري حقونو نړېوالو تنظیمونو فکرمندي ښودلې چې طالبانو د معافۍ اعلانولو با وجود هم د پخواني حکومت ځیني کسان – په خصوص پوځیان، امنیتي او استخباراتي کارکنان – ځورولي، وژلي، او یا بندیان کړي دي.
خو طالبان وايي دغه ډول د رسمي اجازت نه بغیر شوي او چا چې د عمومې عفوې سرغړونه کړې ده په ضد یې ګامونه اخیستل شوي دي.
پخوانی ولسمشر حامد کرزی اوس هم په کابل کې دی، مګر د طالبانو د بیا واکمنېدو وروسته تر اوسه طالبانو هغه ته د ملک نه بهر سفر کولو اجازت ندی ورکړی.
د دې رپوټ زیاتره برخه د رائټرز خبري ادارې نه اخېستل شوی ده.
