لاس رسیدونکی لینک

Breaking News

اسټرېلیایۍ جرنلسټه: طالبانو راته ویل یا ټویټ وکړه، یا جېل ته دې بیایو


واشنګټن - یوه اسټرېلیایۍ جرنلسټه چې په افغانستان کې یې د مختلفو خارجي رسنیو سره کار کړی دی، وايي چې طالبانو هغه د خپلو لیکل شویو خبري رپوټونو په وجه، په جبر سره بخښنې غوښتلو ته مجبوره کړې ده او ګواښلې یې ده چې که داسې ونکړي، نو بندیوانه به شي.

د فارن پالیسي مجلې خبریاله لېن اوډونېل چې مخکې په افغانستان کې د اېسوشيټډ پرس او اې اېف پي خبري ادارو بیرو چیف هم پاته شوې ده، نن د شورو/چهارشنبې په ورځ (د جولائی ۲۰مه) پخپل ټویټر کې لیکلي دي:

"د طالبانو استخباراتو وویل، د بخښنې غوښتلو یو ټویټ وکړه، که نه جېل ته ځه. بس هرڅه چې کیږي. هغو راته ویل، ما ټویټ ولیکل. د هغو خوښ نه شول. ټویټ مې لېرې کړ، بیا مې اېډیټ او خپور کړ. زما ویډیو یې جوړه کړه چې [په کې] وایم په ما جبر ندی شوی. هغه یې هم بیا ځلي جوړه کړه."

د افغانستان د بشري حقونو د کمېشن مشرې شهرزاد اکبر، چې د طالبانو حکومت دا کمېشن نور ختم اعلان کړی دی، د لېن اوډونېل سره خواخوږي ښودلې او ورسره یې لیکلي دي: "طالبان معلوماتو ته د رسایي د مخنیوي دپاره، او په دې خاطر چې افغانستان په تیاره کې وساتي، [پخپلو اقداماتو کې] انتها کوي."

طالبانو تر اوسه د مېرمن لېن اوډونېل د دې نوې دعوې په جواب کې څه ندي ویلي. لېن اوډونېل ویلي چې هغه اوس د افغانستانه بهر وتلې ده. د دې ټویټ نه مخکې، پرون د نهې/سې شنبې په ورځ (د جولائی ۱۹مه) د یو ټویټ په خپرولو سره، د خپلو "۳ یا ۴ رپوټونو" له امله عفوه وغوښته او ویې لیکل چې ګني د افغانستان اوسني واکمنان (طالبان) یې د تنکیو جینکو "په زوره واده کولو او د طالب کمانډرانو له خوا د جنسي کنیزو په حیث د تنکیو جینکو کارولو" باندې تورن کړي و.

لېن اوډونېل پخپل پروني ټویټ کې دا "اقرار" هم کړی و چې ګني د دې رپوټونو د جوړولو مقصد یې د افغاني ثقافت سپکول و. هغې زیاته کړې وه: "دا رپوټونه د کوم کلک ثبوت یا بنیاد بغیر لیکلی شوي و او هېڅ کوم کوشش هم نه و شوی چې د ځایي تحقیق یا د مبینه متآثرینو سره مخامخ ملاقاتو کې د واقعاتو تصدیق وشي."

لېن اوډونېل وایي طالبانو دا ټویټونه په زور ورباندې لیکلي، که نه جېل ته یې لېږله
لېن اوډونېل وایي طالبانو دا ټویټونه په زور ورباندې لیکلي، که نه جېل ته یې لېږله

په افغانستان کې د کم عمره جینکو واده کول کمیابه پېښه نده، او ځیني جینکۍ په کم عمر واده کیږي. د دې ترڅنګ، په دې وروستیو کې چې طالبان افغانستان کې واکمنان شول، په سوشل مېډیا داسې رپوټونه خپاره شول چې ګني ځینو طالب کمانډرانو ځانونو ته نوي ودونه کړي دي. د یو طالب مشر په اړه خو داسې رپوټونه هم ورکړل شول چې ګني د خپلې ناوې راوړلو ته یې پوځي هلیکاپټره وړې وه، مګر طالبانو وروسته په یو بیان کې دا خبر رد کړ.

د لېن اوډونېل پروني ټویټ، زیات کسان چې د هغه د کار او تجربې سره آشنا و، حیرانه کړل. ځینو ورته په ټویټر کې لیکلي و چې دوی پوهېږي مېرمن لېن دا خبره د ټوپک د یرې لیکلې ده.

د یادوني وړ ده چې لېن اوډونېل په ۲۰۱۰ کال کې د افغان ښځو د حالاتو متعلق د خپل یو لړ رپوټونو په سر د بشري حقونو د مطبوعاتو اېوارډ اخېستی دی.

طالبان وخت ناوخت د جرنلسټانو سره په تشدد او بدې رویې تورن شوي دي. په افغانستان کې د ملګرو ملتونو سیاسي دفتر یا یوناما نن د شورو/چهارشنبې په ورځ د "افغانستان بشري وضعیت" په اړه خپل کلنی رپوټ خپور کړ او په کې یې ویلي چې د تېر اګسټ راهیسي افغانستان کې شپږ افغان خبریالان وژل شوي، ۱۲۲ پخپل سر نیول شوي،له ۵۸ خبریالانو سره ناوړه چلند شوی او ۳۳ نور ګواښل شوي دي.

XS
SM
MD
LG