واشنګټن - د صومالیې حکومت د خالي/شنبې په ورځ د هغو رسنیو خلاف د اقداماتو اعلان وکړ کوم چې د حکومت په باور، د الشباب تندلارې اسلامي ډلې پروپګېنډه خپروي، او خبرداری ورکړ چې خلاف ورزانو ته به سزا ورکړل شي.
دا ګام په داسې وخت کې اخېستل کیږي چې د صومالیې وسله وال ځواکونه، چې ځایي ملېشې او نړېوال اتحادیان یې ملاتړ کوي، د القاعده سره تړلې الشباب ډلې په ضد په پوځي عملیاتو بوخت دي.
د صومالیې د اطلاعاتو نایب وزیر عبدالرحمن یوسف ویلي چې، «غواړم صومالیه کې مېډیا او ټولو خلکو ته په عمومي توګه خبر ورکړم چې مونږ د الشباب سره تعلق لرونکې د پروپګېنډه کورېج، په شمول د هغو د ترهګرو اعمالو او نظریاتي پرپګېنډاوو خپرولو ته به د سزا قابل جرمونو په سترګه ګورو.»
هغه چې په سرښار موګادېشو کې د خبریالانو سره خبرې کولې، زیاته یې کړه: «د صومالیه حکومت د الشباب ډلې د ترهګره نظریاتو او وېروونکو اعمالو سره تعلق لرونکي هر رنګه کورېج (رپوټ ورکول) باندې پوره پابندي لګوي. د هغو د آواز او تصویر کليپونه، عکسونه، او پیغامونه خورېدلی نشي.»
یوسف دا هم وویل چې د صومالیه حکومت په سوشل مېډیا باندې د "ترهګرو اېکاونټونو" خلاف سایبري عملیات پیل کړي دي او په ۴۸ ګېنټو کې یې د فېسبوک او ټوېټر په شان سوشل مېډیا پلېټفارمونو کې د څلوېښتو (۴۰) نه زیات داسې اېکاونټونه بند کړي دي. د هغه وینا ده چې نور آنلاین ذرایع او وېب سایټونه چې ترهګر ورنه د خپلو پیغامونو د خپرولو دپاره کار اخلي، هغه به هم پیدا او بند کړی شي.
د صومالیې د اطلاعاتو نایب وزیر په وینا، دا اقدامات په هغه ملک کې د آزادي رای د محدودولو خبره نده، او خبریالان کولی شي چې خپل عادي خبري کورېجونو ته ادامه ورکړي.
صومالیه کې په دې وروستیو کې حسین شیخ محمد د صدر په توګه وټاکل شو او هغه وعده کړې ده چې د اسلامي تندلارو په خلاف به سرسخته جګړه کوي. صدر شیخ محمد دا ژمنه پس د هغه وکړه چې تېر اګسټ میاشت کې په سرښار موګادېشو کې په یو هوټل باندې د تندلارو وسله واله حمله وشوه او یوویشت (۲۱) کسان په کې ووژل شول.
الشباب ډله چې د القاعده ډلې سره تعلق ساتي، د یوې مودې دپاره یې سرښار موګادېشو په ولقه کې ساتلی و، مګر په ۲۰۱۱ کال کې د هغه ځایه وشړل شول. مګر اوس هم کله کله د صومالیې په عسکرو، حکومتي ادارو، او غیرپوځي اهدافو باندې حملې کوي.
