لاس رسیدونکی لینک

Breaking News

د افغانستان بانک وايي د افغانۍ د ثبات دپاره کوښښونه کوي


د افغانۍ د ثبات دپاره د افغانستان بانک د خپلو هلوځلو دغه خبره د نهې، سه شنبې،‌ په ورځ په یو بیان کې وکړه

د ډالر په مقابل کې د افغانۍ د غورځېدو وروسته د افغانستان مرکزي بېنک، د افغانستان بانک، ویلي افغانۍ د ثبات دپاره یې کوښښونه شروع کړي دي.

د افغانۍ د ثبات دپاره د افغانستان بانک د خپلو هلوځلو دغه خبره د نهې، سه شنبې،‌ په ورځ په یو بیان کې وکړه.

رویټرز وايي د افغانستان بانک د بیان نه یوه ورځ وړاندې د ډالر په مقابل کې افغانۍ 12 فیصد غورځېدلې وه.

د رپورټ ترمخه افغانستان نه د خارجي ځواکونو د وتلو وروسته د افغانستان اقتصاد د نسکورېدو څنډې ته رسېدلی دی او د خوراکي شیانو او د تېلو قیموته ختلي دي.

د رویټرز خبري ادارې ترمخه د افغانستان بانک وویل دافغانۍ د ثبات دپاره یې د کرنسۍ تاجرانو، د تجارتي بېنکونو نمایندګانو او کاروباري کسانو سره خبرې کړي دي.

د افغانستان بانک وویل د سټرېټیجک تګلارې په بنیاد بېنک همېشه د داسې ډول ګامونو نه ډډه کړې ده چې په نتیجه کې یې په کرنسۍ کې بې ثباتي راشي او د خلکو قوت خرید ته زیان ورسي.

د طالبانو ترجمان ذبیح الله مجاهد په یو بیان کې وویل په ارګ کې د طالبانو د وزیراعظم د اقتصادي چارو مرستیال مولوي عبدالسلام حنفي په مشرۍ کې په یوه غونډه کې د افغانۍ د ثبات دپاره په ګامونو غور وشو.

د بیان ترمخه په غوڼده کې فېصله وشوه چې د ډالر د قاچاق او د جعلي افغانۍ د وېش مخنیوي دپاره دې هم ګامونه واخیستل شي.

طالبانو ویلي د افغانۍ د ثبات دپاره یې په افغانستان کې په تجارتي لېن دېن کې د غېرملکي کرنسۍ په استعمال یې هم پابندي لګولې ده.

د وي او ای د اشنا څانګې د رپورټ ترمخه د طالبانو د اقتصادي چارو مرستیال مولوي عبدلسلام حنفي د نهې، سه شنبې، په ورځ خبریالانو ته وویل چې دېني عالمانو، ځايي چارواکو او امنیتي ځواکونو ته امر شوی دی چې د غېرملکي کرنسیو د استعمال مخنیوی دې وکړي.

د اشنا څانګې د رپورټ ترمخه افغانۍ د ثبات دپاره د ګامونو په نتېجه کې افغانۍ څه لږ ډیر قدر ترلاسه کړی و او د شورو، چهارشنبې، په ورځ د افغانستان بانک د یو ډالر قېمت یوسل او لس اشاریه شپږ څلوېښت افغانۍ ټاکلی و خو د اشنا څانګې رپورټ وايي په ځینو ولایتونو کې د کرنسۍ په مارکېټونو کې ډالر د افغانستان بانک د قېمت نه په زیاته بېعه کې خرڅېدلو.

رویټرز په خپل رپورټ کې وايي د افغانۍ د غورځېدلو بحران په ورستیو ورځو کې شروع شوی دی او په کابل د طالبانو د واکمنېدو نه مخکې د یو ډالر بېعه اووه اویه افغانۍ وه، یوه هفته وړاندې یو ډالر په اووه نوي افغانیو بدلېدلو خو د ګل، دوشنبې، په ورځ د ډالر بېعه یو سل او پنځوېشت افغانیو ته ورسېدلې وه.

د رویټرز د رپورټ ترمخه د نهې، سه شنبې، په ورځ د افغانۍ قدر راختلی و او د یو سل پنځوېشت په ځای یو ډالر د یوسل او څلوارلسو نه تر یو سل پنځرسلو افغانیو پورې بدلېدلو.

XS
SM
MD
LG