پاکستان ویلي د ترکي او پاکستان د ترمنځ د ایران د لارې د مالبردار رېل ګاډي تګ راتګ به نهه کاله پس دا هفته بیا شروع شي.
د وي او ای د انګریزۍ څانګه په خپل رپورټ کې وايي د پاکستان او ترکي ترمنځ لومړی ازماېښي رېل په کال ۲۰۰۹ کې چلېدلی و چې هدف یې د دواړو ملکونو ترمنځ تجارت او مواصلاتو ته وده ور کول وو.
د لاجسټېک، د بنیادي اسانتیاو پرمختګ او د امنیت په اړه د تشویش په سبب د ترکي او پاکستان دغه رېل په کال ۲۰۱۱ کې وځنډول شو خو د ځنډیدو نه مخکې د دواړو ملکونو ترمنځ د ۱۴ مال ګاډو تبادله شوي وه.
د پاکسان وزیراعظم عمران خان د تجارت او سرمایه کارۍ مشیر عبدالرزاق داود د ترکي او پاکستان د رېل ګاډۍ د بحالېدو د اعلان په لړ کې وویل د استنبول-تهران-اسلام اباد رېل به د یوې مخې سفر په ۱۲ ورځو کې پوره کوي او ۷۵۰ مېټرک ټن تجارتي سامان به وړي.
داود په ټوېټر خپل پېغام کې وویل د ترکي، ایران او پاکستان ترمنځ دغه رېل د دریو واړو ملکونو د ملګرتیا ثبوت دی او د دریو واړو ملکونو ترمنځ د تجارتي سامان په انتقال کې به اسانتیا پېدا کوي.
د وي او ای رپورټ وايي تاجران او ماهرین د ترکي او پاکستان د رېل رابطې د بحالېدو هرکلی کوي او وايي ۶۵۰۰ کلومېټر اوږدې د رېل کرښې د لارې به په تجارت کې د وخت او پېسې بچت کېږي او تجارتي سامان به په لږ وخت کې انتقالېزي.
په موجوده وخت د سمندر لارې یورپ نه پاکستان ته تجارتي شیان په ۴۵ ورځو کې ورسېږي.
د پاکستان نه ترکي ته تلونکی رېل به ایران ته د داخلېدو نه وړاندې د بلوچستان صوبې نه تېرېږي چېرته چې د وي او ای رپورټ وايي حکومتي مامورین په بېلتون خوښو بلوڅ وسلوالو د حکومت په ضد او په حکومتي اسانتیاو د حملو الزام پورې کوي. داعش وسلوالې ډلې هم په بلوچستان کې د حملو مسولېت منلی دی.
د وي او ای رپورټ وايي په بلوچستان کې د وسلوالو خلاف د امنیتي ځواکونو د عملیاتو په نتېجه کې د امنیت صورتحال بهتر شوی دی. چارواکي دا هم وايي د ایران سره په ۹۰۰ کلومېټره پوله په ازغن تار د شروع کېدو وروسته هم حالات ښه شوي دي، وړاندې به په سرحد غیر قانون تګ راتګ په اسان کېدلو.
د پاکستان پوځ ویلي د ایران سره د پولې په ۴۵ برخه ازغن تار لګول شوی او باقي پاتې کار به د سږ کال تر اخېره پورې مکمل کړی شي.
د وي او ای رپورټ وايي پاکستاني مامورین ګڼي چې د ایران سره په پوله د ازغن تار د لګېدو سره به د دواړو ملکونو ترمنځ د غېرقانوني تجارتي توکو د سمګلنګ او د خلکو د غېر قانونو حرکت مخه ونیول شي.
د وي او ای رپورټ وايي په بلوچستان کې د چین او پاکستان د اقتصادي همکارۍ سي پېک لوی منصوبې هم شته او چین د بلوچستان د ګوادر په ساحل د ژورو اوبو بندر هم جوړ کړی او د کار دپاره پرانیستل شوی دی.
د پاکستان د رېل مرکزي کرښه چې د انګریزانو په وخت کې جوړه شوي وه د بحالۍ دپاره به چین او پاکستان کار شروع کوي. اندازه ده چې په دغه منصوبه به شپږ اشاریه اته ارب ډالر خرچه کېږي.